काठमाडौं- नेपाली कांग्रेसका वरिष्ठ नेता रामचन्द्र पौडेल पक्षले क्रियाशील सदस्यताको निष्पक्ष रुपमा अन्तिम टुंगो लगाउन माग गरेको छ। शुक्रबार बसुन्धराको एक पार्टी प्यालेसमा आयोजित बैठकमा नेताहरुले कांग्रेसको महत्वपूर्ण आधार नै क्रियाशील सदस्यता भएकाले त्यसलाई निष्पक्ष रुपमा टुंग्याउनुपर्ने निश्कर्ष निकालेको हो।
विधि र विधान अनुसार क्रियाशील सदस्यताको अन्तिम टुंगो लागोस् भन्ने आफूहरुको भनाइ रहेको नेता अर्जुननरसिंह केसीले बताए। उनले अन्य पार्टीबाट कांग्रेसमा प्रवेश गरेकाहरुको हकमा मापदण्डअनुसार जानुपर्ने बताए।
तर, अन्य पार्टीबाट आएकाहरुलाई कांग्रेसले बनाएको मापदण्डविपरीत क्रियाशील सदस्यता दिइएको भन्दै केसीले असन्तुष्टि जनाए। ‘त्यस विषयमा हामीले गम्भीरतापूर्वक छलफल गर्यौं। यसलाई निष्पक्षतापूर्वक टुंग्याऔं भन्ने निश्कर्ष निकालेका छौं’, केसीले भने।
केसीले भदौमा जसरी पनि महाविधेशन हुनुपर्ने बताए। भदौमा महाधिवेशन हुन नसके कांग्रेसमाथि ठूलो वैधानिक प्रश्न उठ्ने चिन्ता व्यक्त गरे। उनले पार्टीको वैधानिकता जोगाउन पनि समयमै महाविधेश गर्नुपर्छ भन्नेमा आफूहरुले शुक्रबार छफल गरेको केसीले बताए।
बैठकमा महामन्त्री शशांक कोइराला, कोषाध्यक्ष सीतादेवी यादव नेताहरु प्रकाशमान सिंह, शेखर कोइराला, रामशरण महत, सुजाता कोइराला, मिनेन्द्र रिजाल, अर्जुननरसिंह केसी, दिलेन्द्र बडुलगायतका नेताहरू सहभागी थिए।
सभापति शेरबहादुर देउवा र उपसभापति विमलेन्द्र निधिले सक्रियता बढाएपछि वरिष्ठ नेता पौडेलले पनि आफूनिकट केन्द्रीय सदस्यहरूको बैठक गरेको हो। भदौका लागि तय १४औं महाधिवेशनका लागि कांग्रेस नेताहरुको सक्रियता बढेको छ। देउवाले फेरि सभापति उठ्ने बताएका छन् भने निधि पनि सभापतिको दौडमा रहेका छन्।
देउवाले यसअघि आफूनिकट सातै प्रदेशका केन्द्रीय सदस्यहरूसँग छलफल गरेका थिए। निधिले पनि विभिन्न भेटघाट र छलफल गरिरहेका छन्।
शुक्रबार नै निधि, शशांक कोइराला र प्रकाशमान सिंहबीच छलफल भएको थियो। बैठकमा तीन शीर्ष नेताले पार्टीभित्र छुट्टै धार निर्माण गर्ने गरी छलफल अघि बढाएका र दीर्घकालीन समूहका रुपमा स्थापित हुने गरी छलफल भएको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
