काठमाडौं- बौद्ध नयाँबस्तीमा जेठ २५ गते एक व्यक्तिको घुँडाभन्दा मुनिको खुट्टाको भाग भेटियो। कुहिन थालेको उक्त खुट्टा कसको हो? कसरी त्यहाँ आइपुग्यो? हत्या नै हो वा अरु कुनै कारण? प्रहरीले यस्ता अनेकौं प्रश्नको जवाफ अहिलेसम्म पाउन सकेको छैन।
यो त भर्खरको घटना भयो। यस्तै प्रकृतिको घटना अघिल्लो पटकको लकडाउनमा पनि भएको थियो। भक्तपुरको हनुमन्ते खोलामा टाउको बिनाको एक युवतीको शव भेटिएको थियो। तर, उक्त हत्या घटना भने अहिलेसम्म गुपचुप छ। घटनाको वर्ष दिन नाघिसक्दा समेत न शवको टाउको भेटियो न मृतकको परिचय नै खुल्यो। न हत्या गर्ने व्यक्तिको पहिचान हुन सकेको छ। घटना अहिलेसम्म रहस्यकै गर्भमा छ।
२०७६ चैत १७ गते मध्यपुर-थिमि नगरपालिका र सूर्यविनायक नगरपालिका सीमानामा पर्ने बालबोट, हनुमन्ते खोलामा एक महिलाको टाउको बिनाको विभत्स शव फेला परेको थियो। गट्ठाघरको नागरिक अस्पताल पछाडिबाट फलामे पुलतर्फ जाने करिडोरमा टाउको बिनाको सड्न थालिसककेको महिलाको शव फेला परेको थियो।
निलो सुरुवाल, कलेजी रङको कुर्था लगाएकी ती महिलाको हातखुट्टा र हिपको भाग जनावरले खाएजस्तो, बाँया हातको पञ्जा नै नभएको अवस्थामा शव भेटिएको थियो। शव नजिकैबाट प्रहरीले बोरा, जेब्रा झोला समेत बरामद गरेको थियो।
शव भेटिएको जानकारी पाएपछि महानगरीय प्रहरी परिसर भक्तपुर र उपत्यकाका तीन जिल्लाको जघन्य अपराधको अनुसन्धान गर्ने जिम्मा पाएको महानगरीय प्रहरी अपराध महाशाखाको टोली घटनास्थल पुगेर अनुसन्धान सुरु गरेका थिए। शवलाई पोष्टमार्टमका लागि त्रिवि शिक्षण अस्पताल महाराजगञ्ज पठाइएको थियो। तर, १४ महिना बितिसक्दा समेत यस घटनाको सत्यतथ्य बाहिर आउन सकेको छैन।
बलात्कारपछि हत्याको आशंका
यौनांगमा चोट हुनु, मृत भेटिएकी युवती अन्दाजी २० वर्षको हाराहारीको हुनुजस्ता कुरालाई आधार मानेर त्यसबेला प्रहरीले उक्त घटना बलात्कारपछि हत्या भएको हुनसक्ने विश्लेषण गरेको थियो।
टाउको बेपत्ता बनाइनु र खोलामा लगेर शव फाल्नुले सामूहिक बलात्कारपछि हत्या भएको हुनसक्ने प्रहरीको अनुमान थियो। अहिले पनि प्रहरीले त्यसैलाई आधार मानेर अनुसन्धान गरिरहेको छ। तर, प्रगति भने शून्य छ।
घटनाको अनुसन्धान प्रगतिबारे महानगरीय प्रहरी अपराध महाशाखाका प्रमुख, एसएसपी चन्द्रकुवेर खापुङ भन्छन्, ‘अनुसन्धान भइरहेको छ भन्ने बाहेक केही भन्न सक्न अवस्था छैन। अनुसन्धान कि हन्ड्रेड पर्सेन्ट कि जिरो पर्सेन्ट हुन्छ। अपराधी पत्ता नलाग्दासम्म जति काम भएनि नतिजा नभएपछि प्रगति शून्य नै भयो।’
सडिसकेको अवस्थामा शव भेटिएकाले कुनै कोठा वा घरमा हत्या भएको र केही समयसम्म हत्या गरिएको घर वा कोठामा शव लुकाएर राखेको, लकडाउन सुरु भएपछि मान्छेको चहलपहल कम हुने भएकाले खोलामा फालिएको प्रहरीको प्रारम्भिक अनुमान थियो।
न भेटियो टाउको न भयो सनाखत
टाउको बिनाको शव भेटिएपछि प्रहरीले टाउकाको खोजी सुरु गरेको थियो। वरपर कतै टाउको हुनसक्ने भन्दै प्रहरीले व्यापक खोजी गरेपनि टाउको फेला पार्न सकेको थिएन। त्यसपछि प्रहरीले स्काभेटर नै ल्याएर शव भएको वरपर खन्दै टाउकाको खोजी गरेको थियो। त्यति गर्दा पनि टाउको फेला परेन।
हत्याराले मान्छेको पहिचान हुने भएकाले टाउको र शरीरलाई छुट्टाएको, शरीरका अन्य भागबाट पनि हुलिया खुल्न सक्ने भन्दै हातका पन्जा समेत काटिएको हुनसक्ने प्रहरीले बताएको थियो। अपराध लुकाउन हत्याराले निकै चलाखी गरेको त्यसबेला अनुसन्धानमा संलग्न प्रहरी अधिकारीहरुले बताएका थिए।
टाउको नभेटिएपछि ती व्यक्ति को हुन् भन्नेबारे प्रहरीले अहिलेसम्म खुट्याउन सकेको छैन। सनाखत भएको अवस्थामा हत्यारा सहजै पत्ता लाग्ने प्रहरीले जनाउँदै आएको छ। महिलाको सनाखत नभएपछि ७७ वटै जिल्ला प्रहरी कार्यालयमार्फत् पछिल्लो एक/दुई सातादेखि कोही महिला हराएको भए प्रहरीमा खबर गर्न भनेर शव भेटिएलगत्तै भनेको पनि थियो। तर, अहिलेसम्म सनाखत भने हुन सकेको छैन।
अनुसन्धानको मुख्य समस्या नै यही रहेको एसएसपी खापुङ बताउँछन्। ‘आफ्नो मान्छे हराएपछि त कोही सम्पर्कमा आउनु पर्यो र उहाँहरुले भने अनुसारको हुलिया मिल्यो भने अनुसन्धानले गति लिन्छ। तर, अहिलेसम्म मान्छे पहिचानमै समस्या छ’, एसएसपी खापुङले भने।
दर्जनौं व्यक्तिसँग सोधपुछ, सीसीटिभी फुटेजमा भेटिएन कुनै 'क्लू'
शव भेटिएपछि प्रहरीले उक्त घटनास्थल वरपरका दर्जनौं व्यक्तिसँग सोधपुछ गरेको थियो। तर, कसैबाट कुनै सुराक प्रहरीले अहिलेसम्म पाउन सकेको छैन। कुनै रिसोर्ट वा होटलमा बलात्कारपछि हत्या गरेर शव व्यवस्थापन गरेको हुनसक्ने भन्दै वरपरका होटलहरुमा समेत प्रहरीले सोधपुछ र निगरानी गरेको थियो। त्यसमा पनि कुनै 'क्लू' फेला पर्न सकेन।
घटनास्थल वरपरका सीसीटिभी फुटेज प्रहरीले केलाएको थियो। सीसीटिभी फुटेजमा समेत शव लगेको वा खोलामा फालेको जस्ता कुनै गतिविधि नै नदेखिएको अनुसन्धानमा संलग्न महानगरीय प्रहरी परिसर भक्तपुरका एक जुनियर प्रहरी अधिकृत बताउँछन्।
तीन एसएसपी र दुई एसपी फेरिए, अनुसन्धान जहाँको त्यहीँ
टाउको बिनाको उक्त शवको शुरुआती अनुसन्धान अपराध महाशाखाका एसएसपी सहकुलबहादुर थापा र भक्तपुरका एसपी सविन प्रधानबाट भएको थियो। अहिले महाशाखामा एसएसपी थापापछि थप दुई एसएसपीले नेतृत्व सम्हालिसकेका छन्।
शव भेटिएको बेलाका एसएसपी थापा डीआईजी भएर केन्द्रीय अनुसन्धान ब्यूरो (सीआईबी) मा कार्यरत छन्। उनीपछि महाशाखामा एसएसपी दीपक थापाले जिम्मेवारी सम्हाले। अहिले एसएसपी चन्द्रकुवेर खापुङले महाशाखाको नेतृत्व गरिरहेका छन्। तर, घटनाको अनुसन्धान प्रगति भने जहाँको त्यहीँ छ।
महाशाखाका जघन्य अपराध हेर्ने पिलरका एक अधिकारी भन्छन्, ‘शवको सनाखत नै नभएको अवस्थामा अनुसन्धान अघि बढ्न गाह्रो हुन्छ। यो केसमा भएको त्यही हो। अहिलेसम्म मृतक नै आइडेन्टीफाई हुन सकेको छैन।’
उता भक्तपुर परिसरमा पनि एसपी सविन प्रधानपछि एसपी तारादेवी थापाले नेतृत्व सम्हालिरहेकी छिन्। तर, अनुसन्धान भने शुरुआाती अवस्थामै अवस्था छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
