काठमाडौं- मंगलबार बिहान बौद्धस्थित नयाँबस्तीमा भेटिएको मान्छेको घुँडाभन्दा मुनिको भागको बारेमा विभिन्न एंगलबाट प्रहरीले अनुसन्धान गरिरहेको छ।
करिब तीन साताअघिको जस्तो देखिएको उक्त घुँडाभन्दा मुनिको भागका बारेमा प्रहरीले अहिलेसम्म केही निष्कर्ष निकाल्न सकेको छैन। उक्त खुट्टाको भाग कहाँबाट आयो, कसले ल्यायो भन्दा पनि प्रहरी सुरुआती अनुसन्धान विन्दु त्यो खुट्टा कसको हो भन्नेमा केन्द्रित भएको छ। उक्त खुट्टामात्रै मान्छेको सनाखत भएमा अनुसन्धानले गति लिने भएकाले प्रहरीले खुट्टाको पहिचानका लागि अहिलेसम्म हराए भनेर उजुरी दिएका व्यक्तिको विवरण खोतल्न सुरु गरेको छ।
‘अनुसन्धानको सुरुआती विन्दु नै यो खुट्टा कसको हो भन्ने हुन्छ। यदि खुट्टाको आधारमा सनाखत भएको अवस्थामा अनुसन्धानले गति लिन्छ। त्यसपछि घटनाको वास्तविकता आइहाल्छ,’ घटनाको अनुसन्धान गरिरहेका महानगरीय प्रहरी वृत्त बौद्धका डीएसपी नवीन कार्कीले नेपाल लाइभसँग भने।
खुट्टामात्रै भेटिएको भनिए पनि अहिलेसम्म कोही पनि मेरो मान्छे हराएको थियो भनेर प्रहरीकहाँ पुगेका छैनन्। जसकारण अनुसन्धानले गति लिन सकेको छैन।
खुट्टाको मात्रै भाग भेटिएपछि प्रहरी मुख्यत: तीनवटा कुरामा केन्द्रित भएको छ- हत्या, दुर्घटना वा मुत्युपछिको अवशेषको भाग। यी तीन वटा कुरालाई केन्द्रमा राखेर प्रहरीले अनुसन्धान गरिरहेको छ।
हत्या हुनसक्छ, तर सम्भावना न्यून
अनुसन्धानमा संलग्न प्रहरी अधिकारीले खुट्टा मात्रै भेटिएको व्यक्तिको हत्या भएको हुनसक्ने न्यून सम्भावना रहेको निष्कर्ष निकालेका छन्। हत्या भएको भए ती व्यक्ति करिब तीन सातादेखि आफन्तको सम्पर्कबाहिर हुन्छन्। घटना सार्वजनिक भएपछि उनीहरु सम्पर्कमा आउँछन्। तर, अहिलेसम्म कोही पनि सम्पर्कमा आएका छैनन्।
टाउको र शरीरका भाग नभेटिनु, खुट्टा मात्रै भेटिएकाले शव चिन्न सक्ने हुनाले अन्य भाग अन्यत्रै व्यवस्थापन गरेको र बाँकी भाग अहिले भेटिएको ठाउँमा व्यवस्थापन गरिएको पनि हुनसक्ने प्रहरी अनुमान छ। तर, यो सम्भावना भने न्यून देख्छन् अनुसन्धानमा संलग्न एक अधिकृत। ‘शव वरपर नभेटिनु र खुट्टा मात्रै घनाबस्तीको बीचमा भेटिनुले हत्यापछिको शव व्यवस्थापन हो भन्ने सम्भावना न्यून देखिन्छ,’ एक अनुसन्धान अधिकारीले भने, 'तर हत्याको पाटोलाई भने खुल्ला नै राखेर हामीले अनुसन्धान गरिरहेका छौं।’
दुर्घटनापछिको घटना हो त?
एउटा खुट्टाको घुँडामुनिको भाग मात्रै भेटिनुलाई प्रहरीले दुर्घटनापछिको घटनासँग जोडेर पनि अनुसन्धान गरेको छ। कुनै सवारी दुर्घटना वा अन्य दुर्घटनाका कारण खुट्टै काट्नुपर्ने कारणसमेत आउन सक्छन्। उपचारका क्रममा खुट्टा काट्नुपर्ने भएकाले अस्पतालले खुट्टा काटेर फाल्ने सम्भावना छ। यही सम्भावनालाई विश्लेषण गर्दै प्रहरीले यसतर्फ पनि अनुसन्धान अघि बढाएको छ।
खुट्टाको मात्रै भाग भेटिएपछि प्रहरीले नजिकका अस्पतालहरुमा सोधपुछ गर्ने तयारीमा प्रहरी जुटेको छ। अस्पतालले खुट्टा काटेर फालेको र उक्त खुट्टा कुकुर वा कुनै जनावरले त्यहाँ लगेको हुनसक्ने विश्लेषण गरेर प्रहरीले यसतर्फ पनि अनुसन्धान अघि बढाएको स्रोतले नेपाल लाइभलाई जानकारी दियो।
कि मृत्युपछिको अवशेष?
शव बोराभित्र भनिए पनि बोराभित्रै नभएको घटनास्थलमै खटिएका एक प्रहरी अधिकारीले नेपाल लाइभलाई बताए। ‘ठ्याक्कै बोराभित्रै भन्ने त देखिँदैन। बोराको मुखलाई छुएको अवस्थामा बाहिरै खुट्टा देखेपछि स्थानीयले प्रहरीलाई खबर गरेका हुन्,’ ती अधिकारीले भने, ‘बोराभित्र खुट्टा नहुनुले हत्या नै हो भन्ने सम्भावना न्यून छ।’
भेटिएको भाग केही जलेको जस्तो देखिएको अनुन्धानमा संलग्न प्रहरी अधिकारीले बताएका छन्। उक्त भाग जलेकै रहेछ भने यसले झनै हत्याभन्दा पनि मृत्युपछिको अवशेष हो भन्ने विश्लेषण प्रहरीले गरेको छ। ‘हत्या गरेर मान्छे जलाउन एकान्त ठाउँ चाहिन्छ। एकान्त ठाउँमा जलाएर घनाबस्तीमा खुट्टामात्रै फाल्ने सम्भावना कम देखिन्छ,' अनुसन्धानमा संलग्न ती अधिकारीले नेपाल लाइभसँग भने, ‘यो पाटोबाट हेर्दा हत्याको सम्भावना कम देखिन्छ।’
हत्याको पाटो कम देखिनु र खुट्टाको केही भागसमेत जलेको जस्तो अवस्थामा देखिनुले मृत्युपछिको अवशेष हुनसक्नेतर्फ पनि प्रहरीले विश्लेषण गरेको छ। ‘अहिले दैनिक बागमतीमा सयौंको संख्यामा लासहरु जल्ने गरेका छन्। यहाँबाट बागमती नदी पनि नजिकै छ। जल्यो भनेर छोडिएको शवको केही अवशेष बाँकी रहेको र ती अवशेष कुनै जनावर वा कुकुरले ल्याएको हुनसक्ने सम्भावना पनि खाली छ,’ अनुसन्धानमा संलग्न अधिकारी बताउँछन्। प्रहरीले यो कोणबाट पनि घटनाको अनुसन्धान गरेको छ।
खुट्टाको डीएनए गरिने
भेटिएको खुट्टाको डीएनए गरिने प्रहरीले बताएको छ। त्यसका लागि त्रिवि शिक्षण अस्पताल महाराजगञ्जमा पठाइसकिएको प्रहरीले जनाएको छ। त्यसो त घटनास्थलमै शिक्षण अस्पतालका फरेन्सिक विज्ञसहितको टोलीसमेत पुगेका थिए। पोस्टमार्टमसँगै गरिन लागिएको डीएनएको अर्थ भने महिला वा पुरुष छुटाउनका लागि मात्रै हो। यसबाट अनुसन्धानमा कुनै महत्त्वपूर्ण सहयोग भने हुँदैन। खुट्टा हेर्दा वयस्क मान्छेको जस्तो देखिएको छ।
तालिमप्राप्त कुकुरसहितको टोली पनि पुगे पनि कुनै प्रगति हुन सकेन। शव पुरानो भएकाले कुकुर स्निफिङले काम नगरेको प्रहरीले बताएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
