काठमाडाैं- भियतनाममा भेटिएको भनिएको कोरोनाको नयाँ ‘हाइब्रिड भेरियन्ट’ नभएको विश्व स्वास्थ्य संगठन (डब्लुएचओ)ले बताएको छ।
भियतनामस्थित डब्लुएचओका प्रतिनिधिले यो भाइरस भारतमै भेटिएको डेल्टा भेरियन्टको प्रकार भएको दाबी गरेका छन्।
केही दिन अगाडि भियतनामका स्वास्थ्यमन्त्री गुयन थान लङ्गले भारत र बेलायतको मिश्रणयुक्त ‘हाइब्रिड भेरियन्ट’ फेला परेको दाबी गरेका थिए। उनले हाइब्रिड भेरियन्ट अत्यन्त खतरनाक भएको र हावाबाट छिट्टै मानिसमा फैलिने पनि उनले बताएका थिए।
यद्यपि, उनको यो दाबीमा कुनै सत्यता नभएको डब्लुएचओका भियतनाम प्रतिनिधि किदोङ पार्कले बताएका छन्।
‘डब्लुएचको परिभाषाअनुसार अहिले भियतनाममा कोरोनाको कुनै हाइब्रिड भेरियन्ट छैन,’ उनले भने।
सन् २०१९ को अन्तिममा चीनको उहानमा पहिलो पटक फेला परेको भनिएको कोरोना भाइरस हजारौंपटक उत्परिवर्तन भएको पाइएको छ। यसका बेलायत र भारतीय भेरियन्ट ज्यादा खतरनाक भएको वैज्ञानिकहरुले जनाएका छन्।
गतवर्ष काेराेना महामारीलाई सफलतापूर्ण रुपले नियन्त्रणमा लिएकाे भियतनाममा गत अप्रिलदेखि काेराेना संक्रमितकाे संख्यामा वृद्धि हुन थालेकाे छ। अहिलेसम्म भियतनाममा ६ हजार ८५६ संक्रमित फेला परिसकेका छन् भने ४७ जनाले ज्यान गुमाएका छन्।
भियतनामकाे चि मिन्ह सहरमा एक धार्मिक समारोहबाट १०० जनाभन्दा बढीमा कोरोना संक्रमण फैलिएको पाइएसँगै साेमबारबाट सबै मानिसको नमुना परीक्षण शुरु गरिएकाे छ। उक्त सहरमा इशाई धर्मको एक समारोहबाट संक्रमण फैलिएको थियाे। याेसँगै भियतनाम सरकारले सबैभन्दा ठूलो सहरमा नौ लाख मानिसहरुकाे काेराेना परीक्षण गर्ने योजना बनाएकाे छ।
दैनिक १ लाख नमुना परीक्षण क्षमताको साथ आफ्नो सम्पूर्ण जनसंख्याको परीक्षण गर्ने सरकारी योजना छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
