काठमाडौं– वीरगञ्जस्थित नेशनल मेडिकल कलेजले आवासीय चिकित्सकहरूलाई अस्पताल तथा होस्टल खाली गर्न उर्दी जारी गरेको विषयमा सरकारले माफी मागेको छ ।
बिहीबार शिक्षा तथा खेलकुद मन्त्रालयमा आयोजित छलफलमा प्रथम वर्षका चिकित्सकहरूलाई १२ घण्टाभित्र होस्टेल र क्वार्टर खाली गरी कलेजको सम्पत्ति बुझाउन निर्देशन दिएको विषयमा सरकारको तर्फबाट शिक्षा तथा खेलकुद मन्त्रीका सल्लाहकार शैलेन्द्र झाले माफी मारेको हो ।
उनले यस विषयलाई मन्त्रालयले गम्भीर रूपमा लिएको बताउँदै छिट्टै अध्ययनको वातावरण निर्माण गर्ने प्रतिबद्धता समेत व्यक्त गरे । २४ दिनदेखि आन्दोलनरत आवासीय चिकित्सकहरूले बिहीबार मन्त्रालय पुगेर आफ्ना मागहरू सम्बोधन गरी काम गर्ने वातावरण निर्माण गर्न माग गरे । मन्त्री पोखरेलका सल्लाहकार झाले मेडिकल कलेजको उक्त उर्दी आवेगमा जारी गरिएको र त्यसमा व्यक्तिगत ‘इगो’ प्रदर्शन भएको देखिएको दाबी समेत गरे । उनले मौसमको संवेदनशील अवस्थालाई समेत बेवास्ता गर्दै चिकित्सकहरूलाई होस्टल छोड्न बाध्य बनाउनु अमानवीय र लोकतान्त्रिक शासन व्यवस्थाविपरित भएको भएको समेत बताए । उनले मन्त्री पोखरेलले समेत यस विषयलाई गम्भीरतापूर्वक लिएर काम गरिरहेको जानकारी समेत गराएका छन् ।
उनले भने, ‘तपाईंहरुलाई १२ घण्टाभित्रमा होस्टल छोडिदिनु भनेर नोटिस आयो, जुन नोटिस आवेगमा आएर लेखिएको पनि देखिन्छ । एउटा इगो डेमोस्टेट्र गरेको पनि देखिन्छ । र त्यो अमानवीय पनि हो । मौसमको हिसाबले समेत जटिल र संवेदनशील विषय भएको कारणले भनेर हामीले सूचना समेत जारी गरेका थियौँ । त्यो समयमा त्यहाँ धेरै क्रियाकलाप भएको छ । मलाई मिति चाहिँ याद छैन । हामी यो सबैप्रति एकदमै डिसअपोइन्टेड छौँ । जतिुसकै गल्ती गरेको भए पनि होस्टेल छोड्न बाध्य बनाउनु उचित होइन । यो लोकतान्त्रि शासन व्यवस्थामा कुनै पनि हिसाबले उपयुक्त हुँदैन । त्यसप्रति हामी एकदमै चिन्तित छौँ । यसको लागि हामी राज्यको तर्फबाट एपोलोजिज पनि भन्न चाहन्छौँ । यो विषयमा मन्त्रीज्यूलाई जानकारी दिएर निरन्तर काम पनि गरिरहेको छौँ । उहाँले यो विषयलाई उहाँले गम्भीर रूपमा लिनुभएको छ ।’
आवासीय चिकित्सकहरूले कलेजमा शान्तिपूर्ण र मर्यादित वातावरण निर्माण गरी अध्ययनमा फर्कने अवस्था बनाउन माग गरे । आवासीय चिकित्सक डा.अविश साहले कलेजमा प्रोफेसरको निगरानीमा समेत विद्यार्थीलाई बिरामी तथा केसमा प्रत्यक्ष संलग्न हुन नदिइएको बताए । उनले कतिपय आवासी चिकित्सकलाई तेस्रो वर्षमा प्रवेश गर्दासम्म पनि व्यवहारिक चिकित्सकीय अभ्यासको अवसर नदिइएको बताए । डा. साहले चिकित्सकले पर्याप्त क्लिनिकल एक्सपोजर नपाए कसरी गुणस्तरीय उपचार गर्न पाउँछ ? भन्दै प्रश्न समेत गरे। उनले कलेजमा सुरक्षित, मर्यादित र अध्ययनमैत्री वातावरण सुनिश्चित गर्न माग गरे ।
उनले भने,‘कलेजमा प्रोफेसर हुनुहुन्छ । तर प्रोफेसरको अन्डरमा विद्यार्थीले कुनै पनि केस छुन पाउँदैन । कति जनालाई तेस्रो वर्षसम्म पनि केही गर्न दिइएको छैन । यदि कुनै डाक्टरले एक्सपोजर नै पाएको छैन भने उसले के उपचार गर्छ होला त ? अनि त्यहाँ यति धेरै ह्यारेसमेन्ट छ कि त्यसको व्याख्या गर्न नै गाह्रो छ । यहाँसम्म कि मनमा लागेको प्रश्न र जिज्ञासा समेत सोध्न डर लाग्छ । यस्तो डरलाग्दो अवस्थामा हामी कसरी काम गर्न सक्छौँ ।’
अर्का आवासीय चिकित्सक अजरुद्धिन अन्सारीले कलेज प्रशासनबाट आफूहरूलाई थर्काउने तथा धम्की दिने गरिएको आरोप लगाए । उनले कलेज प्रशासनबाट धेरै बोले छतबाट फालिदिने सम्मको धम्की आउने गरेको दाबी गर्दै यस्तो वातावरणमा अध्ययन गर्न नसकिने बताए। अन्सारीले कलेजमा विद्यमान वातावरणले चिकित्सकको व्यावसायिक दक्षता र उपचारको गुणस्तरमा समेत असर पार्न सक्ने भन्दै सुरक्षित र मर्यादित वातावरण निर्माण गर्न मन्त्रालयको ध्यानाकर्षण गराएका छन्।
उनले भने, ‘साथीहरूले सबै समस्या भनिसक्नुभयो, हाम्रो कलेज प्रशासनमा सबै कुरा खराब नै छ । थर्काउने, धम्की दिने भइरहेको छ । धेरै बोले छतबाट फालिदिन्छुसम्मको धम्कीहरू आइरहन्छन् । अब यस्तो वातावरणमा पढ्नको लागि कतिको पोसिबल छ ? हामी यही वातावरणमा त्यहाँ बढ्न जाने हो भने भविष्यमा हामी कस्तो उपचार गर्छौँ, हाम्रो उपचारको गुणस्तर कस्तो हुन्छ ?’
छलफल सहभागी केही आवासीय चिकत्सकहरुले कलेजमा समेत ‘फेक फाइल’ र ‘फेक फ्याकल्टी’ रहेको दाबी गर्दै त्यसबारे छानबिन गर्न पनि माग गरेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
