फाइल तस्वीर।
काठमाडौं- नेकपा (एमाले)को माधवकुमार नेपाल समूहका केन्द्रीय सदस्यहरुले पार्टी अध्यक्ष केपी शर्मा ओलीले एमालेलाई एकतावद्ध बनाउनै नचाहेको बताएका छन्। बिहीबार नेपाल समूहको भर्चुअल केन्द्रीय कमिटी बैठकमा बोल्ने सबैजसो केन्द्रीय सदस्यहरुले यस्तो धारणा राखेका हुन्।
बैठकमा सहभागी एक केन्द्रीय सदस्यका अनुसार अहिले पनि केन्द्रीय सदस्यहरुले बैठकमा आफ्नो धारणा राख्ने क्रम जारी छ। 'केपी ओली एकता चाहँदैनन् भन्नेमा केन्द्रीय सदस्यहरुको एकमत देखिएको छ', ती सदस्यले भने।
आफूहरुले एकतावद्ध एमाले चाहेको भए पनि ओलीले नै एकता नचाहेकाले अब अब सुदृढ पार्टी निर्माणका लागि अघि बढ्नुको विकल्प नरहेको उनीहरुले बताएका छन्।
'अब एकताका लागि गरिने संवाद र पार्टी पुनर्गठनलाई सङ्गै लैजानुपर्छ, एकता प्रयत्न कहिलेसम्म जारी राख्ने हो, यो पनि छिटो टुङ्ग्याउनुपर्छ भन्नेमा केन्द्रीय सदस्यहरुको एकमत देखिएको छ', ती केन्द्रीय सदस्यले भने।
बैठकमा ओली समूहका नेताहरुसँग निरन्तर संवादमा रहेका स्थायी कमिटी सदस्यद्वय घनश्याम भुसाल र सुरेन्द्र पाण्डेले पनि ओली समूहले वार्तालाई दाउपेचका रुपमा प्रयोग गरेको अनुभूति आफूहरुलाई भएको बताएका थिए।
केन्द्रीय सदस्यहरुले धारणा राखेपछि स्थायी कमिटी सदस्यहरु योगेश भट्टराई र गोकर्ण विष्टले उनीहरूले उठाएका प्रश्नको जवाफ दिने बताइएको छ। केन्द्रीय सदस्यहरूले भट्टराई र विष्टले ओली समूहसँग गरेको अनौपचारिक वार्ताबारे थुप्रै प्रश्न उठाएका छन्।
बैठकमा पछिल्ला घटनाक्रमबारे कुरा राखेका भीम रावलले अहिले ओली समूहसँग कुनै वार्ता नभएको बताएका थिए। उनले वार्ता टोलीको संयोजकलाई नै कारबाही गरेपछि कूटनीतिक रुपमा त्यसको औचित्य सकिएको सन्देश ओलीले प्रवाह गरेको बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770527955.jpg)
-1764947412.jpg)
-1738557849.jpg)
-1764146706.png)
