काठमाडौं– एमाले एकता जोगाउने भन्दै पछिल्लो अध्यक्ष केपी शर्मा ओली समूहसँग निरन्तर संवादमा रहेका एमालेको माधवकुमार नेपाल समूहका नेताहरु घनश्याम भुसाल र सुरेन्द्र पाण्डेले ओलीले वार्तालाई दाउपेचका रुपमा प्रयोग गरेको अनुभुति आफूहरुलाई भएको बताएका छन्।
नेपाल समूहको बिहीबार दिउँसो बसेको भचुअल केन्द्रीय कमिटी बैठकमा उनीहरुले आफूहरु धेरै आशावादी नरहेको समेत उल्लेख गरे।
केन्द्रीय सदस्यहरुले यसबारे उठाएका प्रश्नमा भुसाल र पाण्डे दुवैले वार्ताबाटै एमाले जोगाउने पहल गर्न आफूहरु केन्द्रित रहे पनि त्यसबाट आफूहरुले अब कमै आशा गरेको बताएका हुन्।
'केन्द्रीय सदस्यहरुले त्यसबारे प्रष्ट पार्न भनेपछि उहाँहरुले बोल्नुभो', बैठकमा सहभागी एक केन्द्रीय सदस्यले भुसाल र पाण्डेलाई उद्धृत गर्दै नेपाल लाइभसँग भने, 'यत्रो आन्दोलन यत्तिकै किन विघटन हुन दिने भन्ने हामीलाई लाग्यो, केपी ओलीका तर्फबाट पनि निरन्तर बसौं भनिएकाले हामी अनौपचारिक वार्तामा बसेका हौं। तर, यसलाई बालुवाटारले दाउपेचको रुपमा प्रयोग गरेको हो कि भन्ने हामीलाई पनि लागेको छ।'
बैठकमा भुसालले दुई पक्षबीचका वार्ता र छलफलका विषय गोप्य राख्ने सहमति भएको तर ओलीपक्षले त्यसलाई दाउपेचका रुपमा बाहिर ल्याएको र उल्टो आफूहरुलाई आफ्नै समूहमा समस्यामा पार्न खोजेको टिप्पणी गरेका थिए। भुसाल र पाण्डे दुवैले बैठकमा भने, 'अझैं पनि दुइ चार दिन हेरौं, त्यसपछि पनि भएन भने हामी आफ्नो तरिकाले अगाडि बढ्ने त छँदैछ। त्यतिञ्जेल पहल गरेर पार्टी जोगाइयो भने धेरै कुरा गर्न सकिन्छ।'
बैठकमा भीम रावलले पछिल्ला घटनाक्रमको ब्रिफिंग गरेका थिए। उनले अहिले ओली समूहसँग कुनै वार्ता नभएको, वार्ता टिमको संयोजकलाई नै कारवाही गरेपछि कुटनीतिक रुपमा त्यसको औचित्य सकिएको बताएका थिए। 'उनीहरुले दिएको सन्देश नै यही हो', रावलको भनाई थियो, 'तर, पनि जाऔं छलफल गरौं भनेर अनौपचारिक रुपमा केही साथीहरुले छलफल गर्नुभएको मैले पनि सुनेको छु।'
बैठकमा बोल्ने अधिकांश केन्द्रीय सदस्यहरुले आफूहरु एमाले जोगाउने पक्षमा भए पनि अब ओलीलाई विश्वास गर्नै नसकिने बताएका थिए। उनीहरुलाई सम्बोधन गर्ने क्रममा नेपालले पनि ओलीले धोका दिन्छन् भन्ने आफूलाई लागेको बताएका थिए। नेपालले सबैका कुरा सुन्ने र अन्तिममा आफ्नो धारणा राख्ने बताएका छन्।
बैठक अहिले पनि जारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770527955.jpg)
-1764947412.jpg)
-1764146706.png)
