श्रीनगर- भारतकाे जम्मू-कश्मीरकी एक बालिकाले कोरोना महामरीमा विद्यालयले निरन्तर अनलाइन कक्षा लिएकाे र अत्यधिक ‘होमवर्क’ दिएको भन्दै प्रधानमन्त्री नरेन्द्र मोदीसमक्ष ‘कम्प्लेन’ गरेकी छिन्।
माहिरा इर्फान नामकी ६ वर्षीया बालिककाले मोदीलाई सम्बोधन गर्दै निरन्तर अनलाइन कक्ष र अत्यधिक ‘होमवर्क’ले बालबालिकामा दबाब परेको बताएकी छिन्।
‘मेरो कक्षा बिहान १० देखि दिउँसो २ बजेसम्म छ। एउटा इङ्ग्लिस हुन्छ, त्यसपछि म्याथ, त्यसपछि इभिएस र त्यसपछि कम्प्युटर। साना बच्चाहरूलाई यति धेरै हाेमवर्क किन दिइन्छ, मोदी साहेब?,’ उनले प्रश्न गरेकी छिन्।
१ मिनेट ११ सेकेन्डको उक्त भिडियो अहिले सामाजिक सञ्जालमा भाइरल बनेको छ।
दुई दिन अगाडि जम्मू–कश्मीरका उपराज्यपाल मनोज सिन्हाले पनि उक्त भिडियोलाई रिट्वीट गर्दै लेखेका छन्, ‘धेरै राम्रो गुनासो। मैले ४८ घण्टा भित्र स्कुल बच्चाहरूको गृहकार्य भार घटाउने नीति ल्याउन शिक्षा विभागलाई निर्देशन दिएको छु।’
कसरी बन्यो भिडियो?
माहिराका अभिभावकले उनलाई अनलाइन कक्षाको लागि मोबाइल फोन दिएका थिए।
तर, केहीदिन अघि विद्यालयले उनी लगायत अन्य विद्यार्थीलाई अत्याधिक ‘होमवर्क’ दिइयो। यसबाट हैरान भएकी उनले प्रधानमन्त्री माेदीलाई आफ्नो समस्या सुनाउने सोचिन्। उनले १ मिनेट ११ सेकेन्डको छोटो भिडियोमा आफ्ना समस्या बताइन्।
उनले भनेकी छिन्, ‘अस्सलाम वालेकुम मोदी साब। म एउटी बालिका बोल्दैछु। म ६ वर्षकी छु। म जुम कक्षाको बारेमा छोटो केही भन्नेछु। ६ वर्षका जो साना बच्चा हुन्छन् उनीहरुलाई म्याडम र टीचरले अनलाइन कक्षामा किन धेरै बेर राख्छन्। म बिहान उठेर १० बजेबाट कक्षा थाल्छु। २ बजेसम्म हुन्छ कक्षा। एउटा हुन्छ इङ्ग्लिस, त्यसपछि म्याथ, त्यसपछि इभिएस र त्यसपछि कम्प्युटर। यतिधेरै काम ठूलाहरुले बच्चालाई दिन्छन्। जो ६/७/१० वर्षका हुन्छन्। साना बच्चालाई यतिधेरै काम किन दिन्छन् मोदी साब? अब के गर्ने? अस्सलाम वालेकुम मोदी साब, गुड बाइ।’
करिब दुई हप्ता अघि उनका पिताले त्यो भिडियो ह्वाट्सएपमार्फत आफ्ना साथीहरुलाई पठाए। उनको भिडियोलाई पत्रकार औरङजेव नक्विसबन्दीले ट्वीटरमा शेयर गरेका थिए। उनको क्याप्सन थियो स् ६ वर्षे कश्मीरी बालिकाको प्रधानमन्त्री मोदीलाई कम्प्लेन। जुन भिडियो निकै भाइरल बन्यो।
इन्डिया टूडेले माहिरासँग सम्पर्क गरेर सोधेको थियो– किन यो भिडियो बनाएको?
‘मैले यो भिडियो बनाएँ किनभने मेरो साह्रै धेरै ‘होमवर्क’ थियो र कक्षाहरु पनि धेरै लामो थिए,’ माहिराको जवाफ थियो।
लिइयो ‘एक्सन’
माहिराको भिडियो भाइरल भएपछि जम्मू–कश्मीरको शिक्षा विभागले नयाँ निर्देशिका जारी गरेको छ। जम्मू–कश्मीरका उपराज्यपाल मनोज सिन्हाले जारी गरेकाे नयाँ निर्देशिकामा विद्यालयका बालबालिकाको लागि अनलाइन कक्षको समय तय गरिएको छ। जस अनुसार प्रि-प्राइमेरीका विद्यार्थीलाई आधा घन्टा र प्राइमेरीका विद्यार्थीलाई ९० मिनेटको मात्र कक्षा लिन पाउने व्यवस्था गरिएको छ।
कक्षा १ देखि ८ सम्मका लागि एक घण्टा ३० मिनेटको कक्षा दुई सेसनमा गरेर सञ्चालन गराउनु पर्नेछ। त्यस्तै, कक्षा ९ देखि १२ सम्मको कक्षा लगातार ३ घण्टाभन्दा लामो हुनुहुने छैन।
सिनियर लेभलका विद्यार्थीका लागि पनि दुईवटा कक्षाको बीचको समयमा १०/१५ मिनेटको समय फ्रेस हुन दिने र अर्को कक्षामा केन्द्रित हुनका लागि अवसर दिनेछ।
त्यस्तै, प्रि-प्राइमेरी लेभलका लागि बढीमा ३० मिनेटको मात्र कक्षा राख्न र कक्षा ५ सम्म ‘होमवर्क’ नदिन निर्देशन दिइएको छ। तर, एकदम महत्त्वपूर्ण ‘होमवर्क’ भने दिइनेछ।
नयाँ निर्देशिकामा कक्षा १ र २ का शिक्षकलाई ‘जोएफूल लर्निङ’ का लागि योजना बनाउन भनिएको छ। त्यस्तै, शिक्षकहरुलाई विद्यार्थी र अभिभावकसँगै भिडियो कन्फ्ररेन्स गराएर उनीहरुको अनुभव सुनाउन लगाउन पनि गाइडलाइन्समा भनिएको छ।
कश्मीरमा पछिल्लो वर्षदेखि नै कक्षाहरु डिस्टर्ब हुँदा कमैमात्र भौतिक कक्षाको अनुभव गरेका छन्। जम्मू कश्मीरलाई केन्द्र अन्तर्गत ल्याइएपछि बनेको माहोल र त्यो राम्ररी साम्य हुन नपाउँदै कोरोना महामारीका कारण विद्यालय बन्द गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1766648928.png)
