हङकङ- प्रजातन्त्रको पक्षमा आन्दोलन गरेको आरोपमा हङकङका प्रसिद्ध व्यापारी जिमी लाईलाई थप १४ महिना जेल सजाय सुनाइएको छ।
सन् २०१९ अक्टोबर १ मा प्रजातन्त्रको पक्षमा आन्दोलन गरेको भन्दै उनलाई शुक्रबार हङकङ सर्वोच्च अदालतले थप १४ महिना जेल सजाय सुनाएको हो।
लाईलाई चीनले बलपूर्वक कार्यान्वयन गराएको विवादास्पद राष्ट्रिय सुरक्षा कानुनअन्तर्गत पक्राउ गरी थुनामा राखिएकाे थियाे। लाई दुईवर्ष अगाडि हङकङमा भएको प्रजातन्त्रवादी आन्दोलनका समर्थक र त्यहाँको सबैभन्दा ठूलो एपल डेली समाचारपत्रका प्रकाशक हुन्। उनीसँग बेलायतकाे नागरिकता पनि छ।
उनीविरुद्ध विदेशी शक्तिहरूसँग मिलेमतो गरेको आरोप पनि लगाइएकाे छ।
७१ वर्षीय लाईलाई दुई वर्ष अगाडि पनि अवैधानिक रूपमा भेला भएको र बलजफती गरेको अभियोग लगाइएको थियो। पछि उनी धरौटीमा छुटेका थिए।
तर, गत महिना जिमीलाई प्रजातन्त्रको पक्षमा आन्दोलन गरेको दोषी ठहर गरियाे र उनलाई ६ महिनाको जेल सजाय सुनाइएको थियो।
शुक्रबार सुनाइएको सहित जमीको जेल सजाय अवधि २० महिना पुगेको छ। २५ वर्षीय अभियानकर्ता फिगो चानका साथै पूर्वविधायक ली चेक यान र लिङ क्वाङ हङसहित अन्य सात कार्यकर्ताहरुलाई पनि १८ महिना जेल सजाय सुनाइएको छ।
सन् २०१९ अक्टोबर १ मा भएको प्रजातन्त्र समर्थीत अन्दोलनमा दश हजारभन्दा बढीलाई पक्राउ गरिएकाे थियाे। लगभग दुई हजार पाँच सयलाई विभिन्न अपराधका लागि दोषी पाइएको थियो।
जिमी लाई को हुन्?
जिमी लाई एक अर्ब डलर मूल्याङ्कन गरिएको सम्पत्तिका मालिक हुन्। उनले पहिला कपडा उद्योगबाट धेरै धन कमाए। पछि उनी सञ्चार क्षेत्रमा आए। उनले एपल डेलीको स्थापना गरे।
उक्त पत्रिकाले हङ्कङ र चिनियाँ नेतृत्वको बारम्बार आलोचना गर्ने गरेको छ। हङकङमा चीनको बढ्दो प्रभावविरुद्ध उनी आफैँ सक्रिय अभियानमा लागेका छन्।
सन् २०१९ मा हङकङमा सुधारका लागि आयोजित विरोध प्रदर्शनहरूमा उनी सहभागी भएका थिए।
गत वर्षकाे आरम्भतिर उनलाई मुद्दा चलाइँदा चिनियाँ सरकारी सञ्चारमाध्यमले लाईलाई दङ्गाका प्रमुख योजनाकारको संज्ञा दिँदै उनले मुख्यभूमि चीनबारे घृणा र नकारात्मक सूचनाको लहर फैलाएको आरोप लगाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
