काठमाडौं- दाङको तुलसीपुर उपमहानगरपालिका-६ स्याउली बजार सडक छेउमा पार्किङ गरेर राखिएको भारतीय नम्बर प्लेट आर जे ०१ सीसी ०८८५ नम्बरको कारभित्र तीन बालक मृत भेटिएको घटनामा प्रहरीले अनुसन्धान सकेर फाइल जिल्ला अदालत दाङमा पुगेको छ।
इलाका प्रहरी कार्यालय तुलसीपुरले २५ दिन लामो अनुसन्धान सकेर जिल्ला सरकारी वकिल कार्यालय दाङमा उक्त फाइल पेश गरेको थियो। सरकारी वकिल कार्यालयमार्फत् जिल्ला अदालत दाङ पुगेको उक्त घटनाको बिहीबार थुनछेक बहस भएको छ।
तुलसीपुर-६ बस्ने भीमबहादुर परियारका छोरा ९ वर्षीय सन्देश, सन्तोष परियारका छोरा ७ वर्षीय सुर्वण र किरण परियारका ६ वर्षीय छोरा करण कारभित्र मृत फेला परेका थए। उक्त घटनाको अनुसन्धान गरेको प्रहरीले यी तीन बालकको कसैबाट पनि हत्या नभएको निष्कर्ष निकालेको फाइल पेश गरेको छ।
‘हामीले २५ दिनसम्म अनुसन्धान गर्याैं। पोष्टमार्टमदेखि भिसेरा समेत जाँच गर्याैं तर, उनीहरुको कसैबाट हत्या भएको देखिएन। त्यसपछि सोही अनुसार अनुसन्धान टुंग्याएर फाइल पेश गर्याैं’ इलाका प्रहरी कार्यालय तुलसीपुरका डीएसपी शिवबहादुर सिंहले नेपाल लाइभसँग भने।
ढोका लक भएको कारभित्र तीन बालक मृत भेटिएपछि उनीहरुको भिसेरा जाँचका प्रहरीको केन्द्रीय विधि विज्ञान प्रयोगशाला पठाइएको थियो। भिसेरामा विष वा ड्रग्सको मात्रा छ/छैन भनेर जाँच गर्ने गरिन्छ। विधि विज्ञानले दिएको रिपोर्टमा विष र ड्रग्सको मात्रा नदेखिएको डीएसपी सिंहले बताए। ‘भिसेरा रिपोर्टमा ड्रग्स पनि देखिएन, विष पनि देखिएन’ डीएसपी सिंहले भने, ‘कज फ डेथमा भने सफोकेसन लेखिएको छ।’
पोष्टमार्टमदेखि भिसेरा जाँचमा केही नदेखिनु र कज अफ डेथमा सफोकेसन उल्लेख गर्नुले उनीहरुको निसास्सिएर मृत्यु भएको प्रहरीले निष्कर्ष निकालेको छ। ‘भिसेरामा कार्बनमोनअक्साइडको मात्रा देखिनु र कज अफ डेथमा सफोकेसन उल्लेख भएकाले उनीहरुको निसासिएर मृत्यु भएको देखिन्छ’ डीएसपी सिंहले भने।
ढोका खुल्ला भएका बेला कारभित्र पस्नु र आफैं ढोका लक भएपछि अक्सिजनको मात्रा कम भएर निसास्सिएर मृत्यु भएको प्रहरीले निष्कर्ष निकालेको हो। अर्कोतर्फ बालक र उनका परिवारको कसैसँग दुश्मनी नहुनु र कार धनी र चालकसँग कुनै रिसिइबी नहुनुले उनीहरुको कसैबाट पनि हत्या नभएको प्रहरीको निष्कर्ष छ।
तीन बालक मृत भेटिएको जानकारी पाउनासाथ फरेन्सिक विज्ञ र कुकुरसहितको प्रहरी टोली बोलाइएको थियो। उक्त टोली आइसकेपछि मात्रै स्थानीय प्रहरीले क्राइम सिन चलाउने र घटनास्थल मुचुल्का उठाउने काम गरेका थिए। कसैबाट पनि ती बालकको हत्या नभएको निष्कर्ष निकाले पनि केही कुराहरु भने अझै अनुत्तरित भएको बताइन्छ।
कारको बत्ती कसरी बल्यो, लक भएको कारभित्र कसरी बालक प्रवेश गरे? भन्ने प्रश्नबारे डीएसपी सिंहले भने ‘कारभित्र बत्ती बलेको भन्ने भएपछि हामीले शुरुमै मेकानिकल इन्जिनियर बोलाएर अनुसन्धान गरेका थियौं। उनीहरुले गाडीका विभिन्न पार्टपूर्जाहरु हेर्ने क्रममा बालकहरुले विभिन्न पार्टपूर्जाहरु चलाएको पाइएको थियो। कारको रेन्टर लक हुनु, वाइफर अन हुनु, एसी खुलेको हुनुले पार्टपूर्जाहरु बालकले चलाएको मेकानिकल इन्जिनियर निष्कर्ष निकालेका थिए।’ यस्तो अवस्थामा अचानक बत्ती बल्नु र निभ्नु स्वभाविक भएको उनीहरुले बताएको डीएसपी सिंहले बताए।
शुरुमा कारको एउटा ढोका खुल्ला भएकाले कारभित्र बालक प्रवेश गरेको र पछि आफैं ढोका लक भएपछि उनीहरु बाहिर निस्कन नसकेको अनुसन्धानबाट खुलेको छ।
पक्राउ परेका दुई जनाविरुद्ध कर्तव्य ज्यानमा मुद्दा
तीन जना बालकको ज्यान गएको घटनामा अनुसन्धान गर्न प्रहरीले दुई जनालाई पक्राउ गरेको थियो। कारका चालक तुलसीपुर-६ का ५७ वर्षीय पदमबहादुर बस्नेत र भारतबाट कार लिएर आउने सोही वडाका ३३ वर्षीय यादवप्रसाद गैरेलाई पक्राउ गरेको थियो। उनीहरु दुवै जनाविरुद्ध प्रहरीले कर्तव्य ज्यानको कसूरमा मुद्दा चलाएको छ।
उनीहरुले तीन जना बालकको हत्या गरेको नदेखिए पनि उनीहरुकै कारण बालकहरुको ज्यान गएको देखिएकाले कर्तव्य ज्यानमा मुद्दा चलाइएको डीएसपी सिंहले बताए।
‘हत्या भएको त देखिँदैन तर उनीहरुले लापरबाही गरेर कार पार्किङ गरेका कारण ज्यान गएको देखिएकाले कर्तव्य ज्यानमा मुद्दा चलाइएको हो’ डीएसपी सिंहले भने।
कसरी आइपुग्यो भारतीय कार ?
भारतीय कारभित्र तीन बालकको शव भेटिएपछि त्यसबेला धेरै शंका उपशंका गरिएको थियो। अझ करिब तीन महिना पहिलादेखि उक्त कार रोकिराखेको भनेपछि प्रहरीले त्यो कार चोरी गरेर नेपाल ल्याएको हुनसक्ने आशंका गरेको थियो। तर, अनुसन्धानको क्रममा उक्त कार अहिले हिरासतमा रहेका गैरले भारतबाट ल्याएको खुलेको छ।
भारतको एक कम्पनीमा काम गर्ने गरेका गैर र उनकी श्रीमतीबीच सम्बन्ध बिच्छेदको मुद्दा चलिरहेको र बेला बेलामा दाङ अदालत आउनु पर्ने भएकाले कम्पनीका साहुले नै आफ्नो कार लिएर जान भनेपछि गैरेले कार ल्याएको अनुसन्धानबाट खुलेको छ। ‘साहुसँग गैरेको राम्रो सम्बन्ध रहेछ। बेला बेलामा लकडाउन पनि हुने भएपछि दाङ अदालत जाँदा आफ्नै कार दिएर पठाएका रहेछन्’ डीएसपी सिंहले भने।
बालकका परिवारलाई नगद २५ हजार, नगरपालिकाले १ लाख दिने
मृतक तीनजनै बालकका परिवारले घटना भएको १३ दिनपछि वैशाख ३१ गते बल्ल शव बुझेका थिए। तीनै जनाको परिवारलाई जनही २५ हजार रुपैयाँ दिने र नगरकार्यपालिकाले थप एक/एक लाख दिने सहमति भएपछि उनीहरुले शव बुझेका थिए।
त्यसैगरी, दलित आयोगले पनि उनीहरुलाई थप पाँच लाख रुपैयाँ दिन पहल कमदमि थाल्ने सहमति भएको थियो। तर, उक्त रकम अहिलेसम्म नपाएको उनीहरुको गुनासो छ। पीडित परिवारका छोराछोरीलाई उच्च शिक्षासम्म नि:शुल्क पढाउने र परिवारका एक जना सदस्यलाई रोजगारी समेत दिलाउने सहमति भएपछि उनीहरुले शव बुझेका थिए।
सम्बन्धित समाचार :
दाङ घटना: कारभित्र मृत भेटिएका तीन बालकको शरीरमा चोटपटक देखिएन
दाङ घटना : कारमा भेटिएका तीन बालकको शवको पहिचान खुल्यो, दुई जना पक्राउ
दाङमा भारतीय नम्बरप्लेटको गाडीभित्र ३ बालबालिकाको शव फेला, चालक पक्राउ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1763559424.jpg)
-1764080971.png)
