काठमाडौं–दाङको तुलसीपुर उपमहानगरपालिका–६ स्याउली बजार सडक छेउमा पार्किङ गरेर राखिएको भारतीय नम्बर प्लेटको कारभित्र मृत भेटिएका तीनवटै शवको पोष्टमार्टममा शरीरमा कुनै पनि चोटपटक नदेखिएको रिपोर्ट आएको छ।
जिल्ला प्रहरी कार्यालय दाङका एसपी गणेश चन्दका अनुसार पोष्टमार्टम रिपोर्टमा शरीरमा चोटपटक नभएको पाइएको हो। रिपोर्टअनुसार मृत्यु कुनै चोटपटकका कारण नभएको प्रष्ट भएको प्रहरीले जनाएको छ।
आर जे ०१ सीसी ०८८५ नम्बरको भारतीय कारभित्र शनिबार साँझ तुलसीपुर– ६ बस्ने भीमबहादुर परियारका ९ वर्षीय छोरा सन्देश, सन्तोष परियारका ७ वर्षीय छोरा सुर्वण र किरण परियारका ६ वर्षीय छोरा करण मृत भेटिएका थिए। उनीहरु वैशाख १६ गते हराएका थिए।
कारभित्र तीन बालकको शव भेटिएपछि पोष्टमार्टमका लागि बुटवलबाट विशेषज्ञ झिकाएर पोष्टमार्टम गरिएको थियो। रिपोर्टमा कुनै चोटपटक नदेखिएपछि उनीहरुको मृत्यु निसास्सिएर भएको हुनसक्ने प्रहरीको प्रारम्भिक अनुसन्धान छ।
कारको कुनै एउटा ढोका खुल्ला भएकाले उनीहरु भित्र प्रवेश गरेको र पछि ढोका लक भएकाले निसास्सिएर मृत्यु भएको हुनसक्ने प्रहरीको अनुसन्धानमा देखिएको छ। बालकहरुको शरीरमा कुनै पनि चोटपटक नभएको पोष्टमार्टम रिपोर्ट आउनुले पनि प्रहरीको प्रारम्भिक अनुसन्धानलाई पुष्टि गर्ने घटनाको अनुसन्धान गरिरहेका एक अधिकारीले बताए।
गाडीधनी र चालकविरुद्ध ५ दिनको म्याद थप
तीन बालक मृत फेला परेपछि गाडीधनी र चालकलाई प्रहरीले पक्राउ गरेर अनुसन्धान सुरु गरेको छ। कार तुलसीपुर–६ कै यादव गैरे र चालक पदम बस्नेतविरुद्ध अनुसन्धान गर्न जिल्ला अदालत दाङले पाँच दिनको म्याद दिएको एसपी चन्दले बताए।
गैरेले उक्त कार करिब तीन महिना अघि भारतबाट ल्याएका थिए। उक्त कारका चालक भने बस्नेत रहेको प्रहरीले जनाएको छ। उक्त कार गैरेले किन ल्याए भन्नेबारे प्रहरीले अनुसन्धान गरिरहेको जनाएको छ।
लक भएको कारभित्र कसरी बालक प्रवेश गर्न सम्भव भयो भन्नेबारे पनि प्रहरीले गैरे र बस्नेतसँग सोधपुछ गरेको छ। उनीहरुले भने कारको ढोका लक नै गरेको प्रहरी समक्ष बताएका छन्।
उनीहरुले कारको ढोका लक गरेको बताएपछि कारभित्र तीन बालक कसरी प्रवेश गरे भन्ने अझै रहस्य नै छ। प्रहरीले शव निकाल्ने बेला समेत कारको ढोका लक थियो। ढोका फोडेर नै शव निकालिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
