काठमाडौं- एफएनसीसीआई अपरेसन कोभिड रिलिफ नेपाल अन्तरगत क्षेत्रपाटीस्थित पुरानो गोर्खा अस्पतालको भवनमा स्थापना गरिएको कोभिड आइसोलेसन एवं प्राथमिक उपचार केन्द्र सञ्चालनमा आएको छ।
उक्त आइसोलेसनको नेपाल उद्योग वाणिज्य महासंघका अध्यक्ष शेखर गोल्छा, पूर्वउपप्रधानमन्त्री प्रकाशमान सिंह, काठमाडौं महानगरपालिकाका उपमेयर हरिप्रभा खड्गी (श्रेष्ठ)ले उद्घााटन गरे।
कार्यक्रममा महासंघका वरिष्ठ उपाध्यक्ष चन्द्रप्रसाद ढकाल, महानगरपालिका वडा नम्बर १७ का वडाध्यक्ष नविन मानन्धर, पूर्वमन्त्री भीमसेनदास प्रधान, महासंघको कार्यकारिणी समितिका सदस्यहरू, स्वास्थ्यकर्मी र वडावासीहरूको उपस्थिति थियो।
पूर्वउपप्रधानमन्त्री सिंह र महानगरपालिकाका उपमेयर खड्गी (श्रेष्ठ)ले आइसोलेसन सेन्टरको प्रभावकारी संचालनमा आ-आफ्नो क्षेत्रबाट सहयोग रहने प्रतिवद्धता जनाएका छन्।
महासंघका अध्यक्ष गोल्छाले कोभिड महामारि मुलुकका लागि यतिखेर निकै ठूलो चुनौती भएर आएकालाई यस चुनौतीलाई परास्त गरी आम सर्वसाधारणको स्वास्थ्य सुरक्षामा सहयोग गर्न महासंघ दत्तचित्त भई लागेको बताए।
उनले मुलुक अप्ठेरोमा पर्दा महासंघले सँधै अग्रभागमा रहेर सेवा गरेको स्मरण गरे। महासंघका वरिष्ठ उपाध्यक्ष ढकालले आममानिसको स्वास्थ्य सुरक्षा नै यतिखेर प्रमुख चासो रहेकाले महासंघले एफएनसीसीआई अपरेसन कोभिड रिलिफ नेपाल अभियान नै सञ्चालन गरी संक्रमणको चपेटामा परेका नेपालीलाई सहयोग गर्न हातेमालो गरेको स्पष्ट पारे।
उक्त आइसोलेसन एवं प्राथमिक उपचार केन्द्र स्थापना एवं सञ्चालन गर्ने सम्बन्धमा नेपाल उद्योग वाणिज्य महासंघ र काठमाडौं महानगरपालिका वडा नम्बर १७ बीच गत वैशाख ३० गते एक समझादारीपत्रमा हस्ताक्षर गरिएको थियो। सेन्टर अहिले ५० बेडबाट शुरु गरिएको छ। आवश्यकताका आधारमा विस्तार गर्दै पछि १ सय बेडसम्म पुर्याउने महासंघको योजना छ।
उक्त केन्द्रमा कोभिड भई घर वा कोठामा नै आइसाेलेसनमा बसी हेरचाह, रेखदेख गर्न सम्भव नरहेका कोभिड बिरामीहरूलाई उचित खाना, औषधि, वासस्थानको व्यवस्था गरी स्वास्थ्यकर्मीहरूको निगरानीमा राखी आइसोलेसन सेवा प्रदान गरिने महासंघले जनाएको छ।
केन्द्र अन्तरगत आइसोलेसनमा रहेका बिरामीहरूलाई आपतकालीन रूपमा अक्सिजन दिनुपर्ने भएमा अक्सिजन दिई प्राथमिक उपचार गर्ने वा आवश्यकता अनुसार चिकित्सकको सल्लाहमा बिरामीहरूलाई सम्बन्धित अस्पतालमा पठाउने व्यवस्था हुनेछ।
महासंघ र वडाबीचको सहमति अनुसार वडा कार्यालयले चिकित्सक, नर्स एवं स्वयंसेवकको नियुक्ति एवं परिचालन गर्ने, आइसोलेसनमा रहेका बिरामीहरूको रेखदेख, स्याहार सुसार र स्वस्थकर एवं पौष्टिक खानाको उपयुक्त व्यवस्थापन गर्ने, आइसोलेसनमा रहेका आपतकालीन वा आकस्मिक उपचारको स्थितिमा रहेका बिरामीहरूलाई चिकित्सकको सिफारिसमा सम्बन्धित अस्पतालमा पठाई उपचारको व्यवस्था मिलाउनेछ। महासंघले कोभिड आइसोलेसन एवं प्राथमिक उपचार केन्द्रको सञ्चालन तथा व्यवस्थापनको लागि आवश्यक आर्थिक स्रोतको जोहो गर्नेछ।
त्यसैगरी, महासंघले भगवान महावीर जैन–निकेतन, आरम्भ फाउण्डेसन र काठमाडौं महानगरपालिका-२९ को सहयोग एवं सहकार्यमा वैशाख ३० गतेदेखि काठमाडौंको कमलपोखरीस्थित जैन निकेतमा ५० बेडको ड्राई आइसोलेसन केन्द्रमा (अक्सिजन र आपतकालीन सेवा बाहेकको ) सञ्चालनमा ल्याइसकेको छ। उक्त केन्द्रमार्फत् हाल ४० जनाले सेवा पाइरहेका छन्।
यसका लागि भगवान महावीर जैन निकेतनले स्थान उपलब्ध गराएको छ भने आरम्भ फाउण्डेसनले आइसोलेसनको दैनिक व्यवस्थापन र सञ्चालन गर्ने जिम्मेवारीसहित दुई जना स्वास्थ्यकर्मी र एक जना चिकित्सकको व्यवस्था गरी आइसोलेसनमा रहेका संक्रमितहरूको २४सै घण्टा स्वास्थ्य परीक्षण, स्वास्थ्य परामर्शसहित औषधि उपचारको व्यवस्थापन गरिरहेको छ। स्थानीय तहमा संक्रमितहरूसँग समन्वय गर्ने कार्यमा काठमाडौं महानगरपालिका-२९ ले सहयोग गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
