काठमाडाैं- इजरायल- प्यालेस्टाइनबीच जारी हिंसालाई लिएर अमेरिकाले खुलेर नबोलेको चीनले आरोप लगाएको छ। अमेरिकाले आफ्नो जिम्मेवारी बहन नगरेको चीनका विदेश मन्त्री वाङ्ग यीले बताए।
‘अमेरिकाका कारण सुरक्षा परिषदले हिंसाविरुद्ध एकीकृत आवाज प्रस्तुत गर्न सकेन,‘वाङ्ग यीले भनेका छन्, ‘अमेरिकाले आफ्नो जिम्मेवारी बहन गरोस् भन्ने हामी चाहन्छौँ।’
अमेरिका इजरायलको सहयोगी देश हो। उसले जेरुसेलमलाई इजरायलको भूमी भएको भन्दै मान्यता दिएको छ। यता, अमेरिकाले गाजामा नियन्त्रणका कायम गरेको हमासलाई आतंककारी समूह मान्दै आएकाे छ।
तर, चीनले भने गाजामा भइरहेको हिंसात्मक गतिविधि रोक्नका लागि अन्तर्राष्ट्रिय समुदायबाट थप कोशिसको खाँचो रहेको बताएको छ।
गएको सोमबारदेखि इजरायल र प्यालेस्टाइनबिचको हिंसा जारी छ। अन्तर्राष्ट्रिय समुदायले वार्ताको माध्यमबाट समस्याको समाधान खोज्न अपील गरेका छन्।
इजरायलले गरेको हवाई आक्रमणका कारण आइतबार एकै दिन ४२ जनाभन्दा धेरैको मृत्यु भएको गाजामा रहेका प्यालेस्टाइनी अधिकारीको भनाई उद्धृत गर्दै अन्तर्राष्ट्रिय सञ्चारमाध्यमले जनाएका छन्।
गाजाका अधिकारिका अनुसार शनिबार एकै दिन १० बालबालिका र १६ महिलासहित ४२ जनाको इजरायली हवाई आक्रमणका कारण मृत्यु भएको हो।
यता, अमेरिकाले भने हमासबाट हुने कुनै पनि आक्रमणबाट आफ्नो रक्षा गर्ने इजरायली अधिकार रहेको बताएको छ।
‘हामी शान्ति तथा दुवै देशका नागरिक सुरक्षित रुपमा बाँच्न पाउनु पर्ने पक्षमा छौं। तर, हमासबाट हुने कुनै पनि आक्रमणबाट आफ्नो रक्षा गर्ने इजरायली अधिकार हो। हामी इजरायलको पक्षमा छौं,’ अमेरिकी राष्ट्रपति जो वाइडेनले भने।
यद्यपि, सुरक्षा परिषद्बाट आधिकारिक बयान जारी गर्न पनि अमेरिका बाधक बनेको छ। उसले हिंसा अन्त्यका लागि भइरहेको प्रयासमा सुरक्षा परिषदको वक्तव्य प्रतिकुल हुन सक्ने बताउँदै आएको छ।
तर, प्यालेस्टाइनको पक्षमा रहेका देशहरुले भने आत्मरक्षाका लागि भन्दै सर्वसाधारण प्यालेस्टाइनीमाथि आक्रमण भएको भन्दै आलोचना गरेका छन्।
इजरायली सेनाका अनुसार प्यालेस्टाइनी विद्रोहीहरुले गएको हप्ताभरमा इजरायलमा तीन हजार भन्दा बढी रकेट प्रहार गरेका छन्।
सोमबार बिहानै इजरायलले गाजा शहरका विभिन्न क्षेत्रमा ८० वटा हवाई आक्रमण गरेको छ। त्यसअघि हमास बिद्रोहीले इजरायलको दक्षिणी क्षेत्रमा रकेट प्रहार गरेका थिए।
गएको हप्ताको सोमबारदेखि हिंसा सुरु भएयता प्यालेस्टाइनी रकेट आक्रमणका कारण दुइए बालबालिकासहित आफ्नो तर्फ १० जनाको ज्यान गएको इजरायलले जनाएको छ।
एकहप्ताको अवधिमा गाजामा ५५ बालबालिका र ३३ महिलासहित १८८ जनाको ज्यान गएको छ। हमासको नियन्त्रणमा रहेको स्वास्थ्य मन्त्रालयका अनुसार १२ सय ३० जना घाइते भएका छन्।
इजरायलले भने मारिनेमा बिद्रोही लडाकुको संख्या बढी रहेको दाबी गरेको छ।
यसैबीच संयुक्त राष्ट्रसंघका महासचिव एन्टोनियो गुटेरेसले हिंसा तत्काल नरोकिएमा पूरै मध्यपूर्वका लागि नियन्त्रण बाहिरको संकट पैदा हुनसक्ने चेतावनी दिएका छन्।
सुरक्षा परिषद्को आइतबार बसेको बैठकमा गाजामा युद्धविराम लागू गर्नका लागि अन्तर्राष्ट्रिय मध्यस्थकर्ताहरुसँग पनि छलफल गरेको छ। तर, बैठकले कुनै ठोष निर्णय भने गर्न सकेन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
