काठमाडौं– प्रमुख प्रतिपक्षी दल नेपाली कांग्रेसका सभापति शेरबहादुर देउवाले सरकारको नीति तथा कार्यक्रम प्रस्तुत गर्दा सभामुख र राष्ट्रियसभाका अध्यक्षलाई सम्मान नगरेको भन्दै प्रतिनिधिसभा बैठकमा व्यंग्य गरेका छन्।
‘राष्ट्रपतिजीले नभने पनि म भन्छु सम्मानीय सभामुखज्यू,’ उनले सुरुमै सम्बोधन गरे।
उनले गरेको सम्बोधनमा नेपाली कांग्रेसका सांसदहरुले समर्थन जनाएमा थिए। नीति तथा कार्यक्रम प्रस्तुत गर्दा राष्ट्रपति विद्यादेवी भण्डारीले 'सभामुख महोदय' र 'राष्ट्रियसभाका अध्यक्ष महोदय' भनेकी थिइन्। तर, सम्माननीय भन्नुपर्ने भन्दै मीनेन्द्र रिजालसहित १७ सांसदले नीति तथा कार्यक्रमा संशोधन नै हालेका थिए।
मंगलबार संसदीय दलको बैठक बसेरै नेपाली कांग्रेसले संसदको अवहेलना भएको भनेको थियो। गणतन्त्र स्थापनापछि ‘सम्मानीय सभामुख महोदय’ भन्ने शैली र मर्यादा स्थापित भएको भन्दै देउवाले त्यसभन्दा बाहिर कसैले पनि जान नमिल्ने तर्क गरे।
प्रधानमन्त्री केपी शर्मा ओलीले नीति तथा कार्यक्रमा छलफल गरियोस् भन्ने प्रस्ताव लगत्तै देउवाले आज सम्बोधन गरेका थिए। कांग्रेसले विकास निर्माणको जग गाउँसम्म पुर्याएको र उदार अर्थनीति ल्याउँदै देशलाई आर्थिक रुपमा अगाडि बढाएको देउवाले दाबी गरे। २०४८ देखि हालसम्म भएका विकासका कार्यमा नेपाली कांग्रेस साक्षी रहेको भन्दै उनले सरकारले ल्याएको कार्यक्रममा कुनै नयाँपन नभएको दाबी गरे।
सरकारसँग दुरदृष्टि नदेखिएको पनि उनले आरोप लगाएका छन्। संघीयताको मर्म हेरी सिंहदरबारको अधिकार गाउँगाउँमा पुर्याउनुपर्नेमा यस्तो नदेखिएको देउवाले बताए।
राष्ट्रवाद नसिकाउनुस्, सबै सचेत छन्
ओली सरकारले महत्वपूर्ण समय खेर फाल्ने र हावादारी कुरा गर्ने गरेको आरोप पनि सम्बोधनका क्रममा देउवाले लगाएका छन्।
संसदमा बुधबारदेखि सुरु भएको नीति तथा कार्यक्रममाथिको छलफलमा भाग लिँदै देउवाले सरकारले ल्याएको नीति तथा कार्यक्रम जनताले चाहेको समृद्धि र विकासको लक्ष्य पूरा गर्ने खालका कुनै पनि कार्यक्रम नरहेको जिकिर गरे।
शासन चलाउने कुरालाई हल्का रुपमा नलिनु होला भन्दै देउवाले राष्ट्रवादबारे सीमामा बसेका मानिसलाई नसिकाउन आग्रह गरे। ‘हिमाल, पहाड र मधेसमा बसेका सबै जनता राष्ट्रवादप्रति सचेत छन्,’ देउवाले भने, ‘यहाँ बसेर सीमा मिचिएको बारेमा तपाईंहरुले राष्ट्रवाद सिकाउन जरुरी छैन।’
बिपी कोइरालाले थालेको भूमिसुधार र जनताको विकासलाई सरकारले यथेष्ठ ध्यान दिन नसकेको देउवाले आरोप लगाए। ‘सरकारले ल्याएको नीति तथा कार्यक्रममा कुनै नयाँपन छैन, समय अनुकूल हुँदाहुँदै पनि सरकारले देशको समृद्धि र विकासको खाका ल्याउन सकेन,’ देउवाले भने, ‘सरकारले राम्रो अवसर गुमाएको छ।’
नीति तथा कार्यक्रमले राजनीतिक आन्दोलनका उपलब्धlलाई नजरअन्दाज गरिएको पनि देउवाले बताए। ‘नीति तथा कार्यक्रममा एक वर्षमा सरकारले केके गर्छ भन्ने कुरा हुनुपर्ने हो तर यसमा सरकारले एक वर्षमा के गर्छ भन्ने पाइएन,’ उनले भने, ‘यो दिशाहीन र अस्पष्ट रहेको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
