सल्लेरी(सोलुखुम्बु)– टिम्स कार्ड (पदयात्री सूचना व्यवस्थापन प्रणाली) निषेध गरेर पर्यटन प्रवेश शुल्क संकलन गर्न थालेको खुम्बु पासाङ ल्हामु गाउँपालिकाले पछिल्लो ७ महिनाको अवधिमा ८ करोड रुपैयाँभन्दा बढी राजश्व संकलन गरेको छ।
गतवर्ष २०१७ को अक्टोबरदेखि २०१८ को अप्रिल महिनाको अन्तिमसम्म ८ करोड २३ लाख ४१ हजार रुपैयाँ पर्यटन प्रवेश शुल्क संकलन गरेको गाउँपालिकाका प्रवक्ता लाक्पा छिरि शेर्पाले जानकारी दिए।
यो अवधिमा ४१ हजार १ सय ७० जना पर्यटकले खुम्बु क्षेत्रको भ्रमण गरेका छन्। यसरी हेर्दा गाउँपालिकाको मासिक आम्दानी १ करोड रुपैयाँभन्दा बढी देखिन्छ। नेपाल पर्यटन बोर्डले टिम्स कार्ड वितरण गरिरहेको भएपनि त्यसलाई पूर्णरुपमा निषेध गर्दै गाउँपालिकाले पर्यटन प्रवेश शुल्क संकलन गर्न थालेको हो। गाउँपालिकाले स्टेसननै खडा गरेर खुम्बु प्रवेश गर्ने प्रति पर्यटक २ हजार रुपैयाँ प्रवेश शुल्क संकलन गर्ने गरेको छ।
गाउँपालिकाको तथ्याँकअनुसार अक्टोबर महिनामा ७ हजार १२ जनाबाट १ करोड ४० लाख ३५ हजार, नोभेम्बर महिनामा सात हजार ४ सय १२ जनाबाट १ करोड ४० लाख ३५ हजार राजश्व संकलन गरिएको छ।
यस्तै, डिसेम्बर महिनामा २ हजार ४ सय १७ पर्यटकबाट ४८ लाख ३४ हजार, जनवरीमा १ हजार पाँच पर्यटकबाट २० लाख १० हजार, फेब्रुअरीमा १ हजार ५ सय ६२ पर्यटकबाट ३१ लाख २४ हजार, मार्च महिनामा ६ हजार ७ सय ४७ पर्यटकबाट १ करोड ३४ लाख ९४ हजार र अप्रिलमा १० हजार २ सय ६४ पर्यटकबाट २ करोड ५२ लाख ८ हजार रुपैयाँ राजश्व जम्मा भएको गाउँपालिकाले जनाएको छ।
पर्यटन बोर्डले टिम्स कार्ड वितरण गरेर करोडौँ राजश्व संकलन गरेपनि खुम्बु क्षेत्रको पर्यटन प्रवद्र्धनमा चासो नदिएको भन्दै गाउँपालिकाले टिम्स कार्डनै निषेध गरेको गाउँपालिका अध्यक्ष ङिमदोर्जी शेर्पाले बताए। पर्यटन बोर्डले भने गाउँपालिकाले टिम्स कार्ड निषेध गरेर प्रवेश शुल्क लिनु गैरकानूनी रहेको जनाउँदै आएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
