अटो

कारको बजार हिस्सामा सुजुकीलाई हुन्डाईले उछिन्यो, यस्तो छ ३ वर्षको तथ्यांक

शिव बोहरा बिहीबार, माघ २२, २०७७ १२:०९

काठमाडौं- सन् २०२० को अप्रिलदेखि डिसेम्बरसम्मको अवधिमा नेपाली बजारमा ७ हजार ५ सय ७४ वटा कार भित्रिएका छन्। भन्सार विभागको तथ्यांकअनुसार उक्त ९ महिनाको अवधिमा सबैभन्दा बढी हुन्डाईका कार नेपाल भित्रिएका हुन्।

यो अवधिमा हुन्डाईका २ हजार २ वटा कार भित्रिएका छन्। नेपालमा आयात भएका कुल कारमध्ये हुन्डाईका मात्र २६.४ प्रतिशत रहेको विभागको तथ्यांकले देखाएको छ।

हुन्डाईलाई पछ्याएको मारुती सुजुकीले उक्त ८ महिने अवधिमा १ हजार ४ सय ९० वटा कार भित्र्याउँदा उसको बजार हिस्सा १९.७ प्रतिशत रहेको छ।

त्यस्तै, २०२० अप्रिलदेखि डिसेम्बरसम्म आयात भएका कारको तथ्यांकका आधारमा तेस्रो स्थानमा महिन्द्रा रहेको छ। यो अवधिमा महिन्द्राका ९ सय ५१ वटा कार आयात भए। उसको बजार हिस्सा १२.६ प्रतिशत छ।

सन् २०२० को पछिल्लो ८ महिनामा नेपाली बजारमा कार ब्रान्डको बजार हिस्सा।

सन् २०२० को पछिल्लो ८ महिनामा आयात भएका कारको तथ्यांकका आधारमा महिन्द्रालाई कियाले पछ्याएको छ। कियाले ७ सय ८० कार आयात गर्दा उसको बजार हिस्सा १०.३ प्रतिशत कायम भएको छ। उक्त अवधिमा फोर्डका ५ सय ४० वटा कार आयात हुँदा बजार हिस्सा ७.१ प्रतिशत छ। सोही अवधिमा टाटाका ४ सय ५० वटा कार आयात हुँदा उसको बजार हिस्सा ५.९ प्रतिशत रहेको छ।

टाटालाई पछ्याएको निसानका ३ सय ७० कार आयात हुँदा बजार हिस्सा ४.९ प्रतिशत छ भने रेनोका २ सय ६४ वटा कार नेपाल भित्रिए। रेनोको बजार हिस्सा ३.५ प्रतिशत कायम भयो।

टोयोटा, फक्सवागन, एमजीलगायत दर्जनभन्दा बढी ब्रान्डका कारको बजार हिस्सा भने ७.१ प्रतिशत छ। २०१८ अप्रिलदेखि २०१९ मार्चसम्म २० हजार २ सय १० वटा र २०१९ अप्रिलदेखि २०२० मार्चसम्म १६ हजार १ सय २९ वटा कार नेपाल भित्रिएको तथ्यांक छ। कोरोना भाइरन संक्रमणका कारण २०२० को मार्चदेखि लकडाउन भएका कारण कार बिक्री उल्लेख्य घटेको हो।

सन् २०२० को पछिल्लो ८ महिनामा नेपालमा आयात भएका कारको संख्या।

सन् २०१८ को अप्रिलदेखि २०१९ मार्चसम्म र २०१९ अप्रिलदेखि २०२० को मार्चसम्मको तथ्यांकमा भने मारुती सुजुकीकै बजार हिस्सा अग्रस्थानमा थियो। तर, २०२० को अप्रिलदेखि डिसेम्बरसम्मको तथ्यांकमा भने हुन्डाईले अग्रता कायम गरेको हो।

सन् २०१८ अप्रिलदेखि २०१९ मार्चसम्मको अवधिमा मारुती सुजुकीका ६ हजार ३ सय २ वटा कार आयात भएका थिए। सो अवधिमा ४ हजार १ सय ३० वटा कार आयात भएको तथ्यांक भन्सार विभागको छ। नेपाली बजारमा मारुती सुजुकीका कार चौधरी समूह अन्तर्गतको सिजी मोटोकर्पले आयात गरी बिक्री गर्दै आएको छ।

सन् २०१८/१९ मा आयात भएका कार।

सन् २०१८/१९ मा नेपाली बजारमा कार ब्रान्डको बजार हिस्सा।

सन् २०१८ अप्रिलदेखि २०१९ मार्चसम्मको अवधिमा हुन्डाईका ३ हजार ९ सय १० वटा कार आयात भएका थिए। त्यसको पछिल्लो वर्ष, २०१९ अप्रिलदेखि २०२० मार्चसम्ममा भने हुन्डाईका ३ हजार ७ सय ६२ वटा कार आयात भएको तथ्यांक छ।

सन् २०१८ अप्रिलदेखि २०१९ मार्चसम्मको अवधिमा महिन्द्राका ३ हजार १ सय ४५ वटा कार आयात भएकोमा २०१९ अप्रिलदेखि २०२० मार्चसम्ममा २ हजार ६ वटा कार आयात भएको भन्सारको तथ्यांक छ।

त्यसैगरी, २०१८ अप्रिलदेखि २०१९ मार्चसम्मको अवधिमा टाटाका २ हजार २९ वटा कार आयात भएकोमा २०१९ अप्रिलदेखि २०२० मार्चसम्ममा २ हजार १ सय ५ वटा कार आयात भएको तथ्यांक छ।

सन् २०१८/१९ मा आयात भएका कार।

यस्तै २०१८ अप्रिलदेखि २०१९ मार्चसम्मको अवधिमा फोर्डका १ हजार २ सय २० वटा कार आयात भएकोमा २०१९ अप्रिलदेखि २०२० मार्चसम्ममा १ हजार १५ वटा कार आयात भएको तथ्यांक छ।

२०१८ अप्रिलदेखि २०१९ मार्चसम्मको अवधिमा निसानका ११ सय २ वटा, रेनोका ७ सय ४० वटा, टोयोटाका ६ सय ६ वटा र फक्सवागनका २ सय ७१ कार आयात भएका थिए।

त्यसैगरी, २०१९ अप्रिलदेखि २०२० मार्चसम्ममा निसानका ९ सय ६५ वटा, रेनोका ४ सय १४ वटा, टोयोटाका ४ सय २१ वटा र फक्सवागनका १ सय ६६ वटा कार आयात भएको भन्सारको तथ्यांक छ।

नेपाली बजारमा दुई दर्जनभन्दा बढी ब्रान्डका कार बिक्री हुँदै आएका छन्। नेपालमा दुईतिहाइभन्दा बढी कार भारतबाट आयात हुने गरेको छ।