बुटवल- बुटवलका सडकमा जीवन जिउन बाध्य बेसहारा तथा मनोरोगीहरुलाई पुनःस्थापना गर्ने अभियान सुरु गरिएको छ। आगामी साउन महिनासम्ममा बुटवललाई सडकमानवरहित घोषणा गर्नेगरी अभियान सुरु भएको हो।
बुटवल उपमहानगरपालिकाको सहकार्यमा मानव सेवा आश्रमले शनिबारदेखि यस्तो अभियान सुरु गरेको छ। बुटवल उपमहानगरपालिकासँग हालै सम्झौता गर्दै उक्त संस्थाले शनिबारदेखि नै अभियान सुरु गरेको छ।
आश्रमका लागि उपमहानगरपालिकाले बुटवल–१३ जितगढीमा अर्को व्यवस्था नहुन्जेलका लागि भवनसमेत उपलब्ध गराएको छ। सोही स्थानमा आश्रम सञ्चालन हुनेछ।
तीन महिनाभित्रमा बुटवलमा सडकमा जीवन बिताउन बाध्य भएकाहरुलाई औषधोपचारसहित आश्रममा लगेर स्याहारसुसार गरिने अभियन्ता रामजी अधिकारीले जानकारी दिए। बुटवलमा सुरु भएको यो आश्रम दसौं शाखा हो।
एक समारोहबीच आश्रमको अभियान शुभारम्भ गर्दै नगर प्रमुख शिवराज सुवेदीले मानवताको सहरका रुपमा बुटवलको विकास गरिने बताए। मानवीय सेवाका काममा नगरवासीहरुलाई पनि सहकार्य गर्न आग्रह गर्दै प्रमुख सुवेदीले सडकमानवमुक्त अभियानले बुटवलवासी सबैको गरिमा बढ्ने उल्लेख गरे।
आश्रमका केन्द्रीय प्रमुख संरक्षक तथा वरिष्ठ अभियन्ता डाक्टर गोविन्द टण्डनले सेवाभावको उद्देश्यले देशैभरि यस्तो अभियान सञ्चालन गरिएको बताए। उनले आउँदो १० वर्षसम्ममा नेपाललाई नै सडकमानवमुक्त बनाउने गरी आफूहरु अभियानमा जुटेको बताए। देशभरका १० स्थानमा आश्रमहरु सञ्चालन गरी यही अभियानलाई विस्तार गरिएको उनले जानकारी दिए।
सो अवसरमा प्रदेश ५ का सांसद भोजप्रसाद श्रेष्ठ, उपप्रमुख गुमादेवी आचार्य, मानव सेवा आश्रमका केन्द्रीय संस्थापक अध्यक्ष रामजी अधिकारी, प्रदेशसभाका सचिव डाक्टर मानबहादुर विके, वडा नं १३ का अध्यक्ष नारायणप्रसाद पुन, बुटवल उपमहानगरपालिका निमित्त प्रमुख प्रशासकीय अधिकृत विष्णु खनाल, 8सेवी एजाज आलम लगायतले बोल्दै मानव सेवा आश्रमको अभियानको सफलताको कामना गरेका थिए। कार्यक्रमका सहभागीहरुले आफूहरु पनि मानवसेवाका लागि सहयोग र सहकार्य गर्ने बताएका थिए।
आश्रमको मुख्य कार्यालय मकवानपुरको हेटौंडामा रहेको छ। यो कार्यालय ०६९ सालमा स्थापना भएको हो। यस्तै भरतपुर, काठमाडौं, ललितपुर, गोरखा, लमजुङ, वीरगन्ज, बाग्लुङ तथा कास्कीमा आश्रमका शाखाहरु सञ्चालन भइसकेका छन्। शनिबारदेखि बुटवलमा सुरु भएको छ भने केही दिनमै धनगढीमा पनि आश्रम सुरु गरिने संस्थापक केन्द्रीय अध्यक्ष अधिकारीले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786783778.jpg)
-1789386153.jpg)
-1786602170.png)
