काठमाडौं– ३८ सय किलो सुन तस्करी तथा सनम शाक्य हत्या प्रकरणमा मोरङ जिल्ला अदालतमा थुनछेक बहस सुरु भएको छ।
सुरुमा जिल्ला सरकारी वकिलको कार्यालयका तर्फबाट सरकारी वकिलले आरोपीहरुलाई थुनामै राखी मुद्दाको प्रक्रिया अगाडि बढाउन माग गर्दै बहस थालनी गरेका छन्। कर्तव्य ज्यान, सुन तस्करी र संगठित अपराध जस्ता ३ अभियोग लागेका व्यक्तिलाई मुद्दाको किनारा नभएसम्म धरौटीमा छोड्न नहुने माग गर्दै बहस सुरु भएको स्रेष्तेदार नवराज दुलालले बताए।
सरकारी वकिलको बहस सकिए पनि आरोपीहरुका तर्फबाट बहस गर्ने तयारी भइरहेको उनले बताए। आरोपीको तर्फबाट ७९ जना कानुन व्यवसायीले बहस गर्नेछन्। ६३ जना अभियुक्तविरुद्ध दायर भएको सुन तस्करी, संगठित अपराध र कर्तव्य ज्यान मुद्दामा यति धेरै कानुन व्यवसायीले बहस गर्न लागेका हुन्।
कानुन व्यवसायीको बहस समाप्त भएपछि अदालतले धरौटीमा छोड्ने कि थुनामै राखी मुद्दाको किनारा गर्ने भन्ने विषयमा आदेश सुनाउनेछ।
अहिले न्यायाधीश नारायणप्रसाद पौडेलको इजलासमा सुनुवाइ सुरु भएको छ। जिल्ला अदालतले सोमबारसम्म आरोपपत्रसँगै पेस भएका ३० प्रतिवादीको बयान सकेको थियो।
प्रहरीको एक महिना लामो अनुसन्धानपछि गत बुधबार जिल्ला सरकारी वकिलको कार्यालयले बहालवाला प्रहरी अधिकृतसहित २९ जनालाई पक्राउ गरी आरोपपत्रसँगै अदालतमा पेस गरिएको थियो। एक जना अभियुक्त भने अदालतमै उपस्थित भएका थिए। प्रहरी हवल्दार अमरबहादुर थापा राष्ट्रसंघीय शान्ति मिसनबाट फर्काइएपछि उनी मोरङ जिल्ला प्रहरी कार्यालयमा सम्पर्कमा आएका थिए।
उनीहरुविरुद्ध संगठित अपराध अन्तर्गत आपराधिक समूह स्थापना गरी सुन चोरी–पैठारी र निकासी गरेको, अपहरण तथा शरीर बन्धक र कर्तव्य ज्यान शीर्षकमा मुद्दा दर्ता भएको छ।
सरकारी वकिलको कार्यालय मोरङले गत बुधबार बहालवाला एसएसपी, अन्य प्रहरीका उच्च अधिकारी लगायत ६३ जनाविरुद्ध मुद्दा दायर गरेको थियो।
मिलेमतोमा सुन तस्करी गर्ने चूडामणि उप्रेती ‘गोरे’ समूहले मात्रै हालसम्म त्रिभुवन अन्तर्राष्ट्रिय विमानस्थलबाट ३८ सय किलो सुन तस्करी गरेको प्रहरीले जनाएको छ। यसबापत १७ अर्ब १ करोड ८० लाख रुपैयाँ राज्यलाई नोक्सान पुर्याएको दाबी गरिएको छ।
सरकारी वकिलको कार्यालयले उक्त रकम बिगोका रुपमा उनीहरुसँग असुल हुनुपर्ने माग–दाबी गर्दै जिल्ला अदालत मोरङमा मुद्दा दायर गरेको थियो।
मोरङ सरकारी वकिल कार्यालयका प्रमुख पुण्यप्रसाद पाठकका अनुसार सुन काण्डमा बहस गर्न सहन्यायाधिवक्ता गोपाल रिजाल, चिरञ्जीवी पराजुली, उपन्यायाधिवक्ता हिमालय त्रिताल, मनोज आचार्य, जिल्ला न्यायाधिवक्ता पुण्यप्रसाद सापकोटा, पुण्यप्रसाद पाठक, सहायक जिल्ला न्यायाधिवक्ता रोहित पोखरेल र पदम वस्ती गरी ८ सरकारी वकिलको टिम बनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
