समाचार

९ महिनापछि पशुपति दर्शन [फोटो फिचर ]

काठमाडौं–गत वर्ष चैतदेखि बन्द रहेको पशुपति ९ महिनादेखि आजबाट भक्तजनका लागि खुला गरिएको छ। कोरोना संक्रमण न्यूनीकरणका लागि चैत ११ मा लकडाउन भएयता पशुपति बन्द थियो।

स्वास्थ्य तथा जनसंख्या मन्त्रालयले जारी गरेको स्वास्थ्य सुरक्षाको मापदण्ड पालना गरेर मन्दिर खुला गरिएको हो। मन्दिरमा बिहान ६ बजेदेखि नै श्रद्धालु आएका थिए। दर्शनार्थीहरुलाई दुई मिटरको दूरीमा लाममा राखी दर्शन गर्ने व्यवस्था मिलाइएको छ। यस्तै, अनिवार्यरूपमा मास्क लगाउनुपर्ने व्यवस्था गरिएको कोषले जनाएको छ। हाललाई मन्दिरको पश्चिम ढोकाबाट प्रवेश गरी दर्शनपछि पनि सोही ढोकाबाट फर्कने व्यवस्था मिलाइएको छ।

दर्शनका लागि पशुपतिनाथ मन्दिर खुला गरिए पनि अझै केही समय भक्तजनले रसिद काटेर गरिने विशेष पूजा गर्न पाउने छैनन् । यसैगरी मूल मन्दिर परिसरमा दैनिक हुने गरेको भजनलगायत गतिविधि पनि क्रमशः खुला गरिने कोषले जनाएकाे छ। नौ महिनापछि दर्शनार्थीका लागि खुला गरिने भएपछि मंगलबार राष्ट्रपति विद्यादेवी भण्डारीले क्षमासहित विशेष पूजा गरेकी थिइन्। कोरोना महामारीबाट मुक्ति, देश एवं विश्व शान्तिको सङ्कल्पसहित मूल मन्दिर, परिसरका देवीदेवताको पनि पूजा आराधना गरिएको थियो।