काठमाडौं- कोभिड–१९ महामारीकै समयमा निर्माणको कामले तिब्रता थालेको अवसरमा निर्माण सामग्रीहरुमा भएको अस्वभाविक मूल्यवृद्धिले मारमा परेको नेपाल निर्माण व्यवसायी महासंघले जनाएको छ।
महासंघले सोमबार विज्ञप्ति जारी गर्दै कार्टेलिङ गरेर निर्माण सामग्रीमा अस्वभाविक मूल्यवृद्धि गरिएको प्रति गम्भीर ध्यानाकर्षण भएको जनाएको छ। फलामजन्य विभिन्न साइजका डन्डी, पाता, पत्ती, जिआई तार, ग्याब्लिन तार उत्पादक कम्पनीहरुले र नदीजन्य निर्माण सामग्री ढुंगा, बालुवा गिट्टीमा विभिन्न व्यवसायीहरुले अत्यधिक मूल्यवृद्धि गरेको दाबी महासंघको छ।
’फलामजन्य निर्माण सामाग्री उत्पादक कम्पनीहरुले अन्तर्राष्ट्रिय मुद्रा डलरको दरमा र फलाम ब्लेडको मूल्य थोरै मात्रामा बढेको अवस्थामा पनि अनुपातभन्दा अत्यधिक रूपले मिलोमतोमा मूल्यवृद्धि गरेको देखिएको छ,’ जारी विज्ञप्तिमा उल्लेख छ। अहिले निर्माण सामाग्रीमा गरिएको मुल्यवृद्धि कुनै पनि दृष्टिकोणबाट व्यवहारिक तथा वैज्ञानिक नदेखिएको महासंघको भनाइ छ।
देशको कुनै पनि स्थानबाट नदीजन्य सामाग्रीको उत्खनन र बिक्री वितरण गर्न नपाइने गृह मन्त्रालयको हालैको निर्णयप्रति पनि महासंघले असन्तुष्टि व्यक्त गरेको छ। गृहको निर्णय बमोजिम निर्माणाधीन परियोजनाहरुमा ढुंगा, गिट्टी, बालुवाको चरम अभाव भइ परियोजना नै ठप्प हुन सक्ने अवस्था देखिएको प्रति महासंघले सरोकारवाला सबै निकायको ध्यानाकर्षण गराएको छ।
गृहको सो निर्णयबाट आग्रह र पूर्वाग्रहरूपले क्रसरहरु बन्द हुन गएको र यसबाट अभाव सृजना हुन गइ खानीजन्य निर्माण सामग्रीहरुमा सीमित व्यवसायीहरुको मिलोमतोमा अत्यधिक मूल्यवृद्धि गराइ कालोबजारी गरेको गुनासो महासंघलाई प्राप्त भएको दाबी गरिएको छ।
केही महिना अगाडिको मूल्य र हालको मूल्यमा डन्डी प्रति केजी १५ देखि २० रुपैयाँसम्म मूल्यवृद्धि भएको र ढुंगा, गिट्टी, बालुवाको स्रोतदरको मूल्यमा दोब्बर मूल्यवृद्धि भएको महासंघले उल्लेख गरेको छ।
कोरोना महामारीको विषम परिस्थितिबीच निर्माण कार्य गर्ने सिजनको मौका छोपी गरिएको कालोबजारीलाई तत्काल रोक्न महासंघले सरकारसँग आग्रह गरेको छ। सरकारले प्रभावकारीरुपमा अनुगमन गरी मूल्यवृद्धि नियन्त्रणका लागि ठोस तथा सार्थक पहल गरिदिन महासंघको माग छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
