सबल अर्थतन्त्र निर्माणका लागि निजी क्षेत्रसँग मिलेर अघि बढ्छौँ : अर्थमन्त्री

अर्थ समाचार

नेपाल लाइभ सोमबार, मंसिर १५, २०७७ १०:३३

काठमाडौं-अर्थमन्त्री विष्णुप्रसाद पौडेलले सरकार र निजी क्षेत्र मिलेर कोभिड -१९ बाट सिर्जित आर्थिक चुनौती सामना गर्नुपर्ने बताएका छन्। लगानी वृद्धि, रोजगारी सिर्जना र गरिबी न्यूनीकरणका लागि सरकार र निजी क्षेत्र मिलेर काम गर्नुपर्नेमा उनले जोड दिए।

'उत्पादन र रोजगारीमा केन्द्रित भएर सबल अर्थतन्त्र निर्माणका लागि सरकार र निजी क्षेत्र मिलेर अघि बढ्नुपर्नेछ,' उनले भने, 'निजी क्षेत्रका सबैसँग म सहकार्य गरेर अघि बढ्नेछु।'

नेपाल आर्थिक पत्रकार समाजको वार्षिकोत्सव र वार्षिक साधारणसभामा मन्त्री पौडेलले बजेट र मौद्रिक नीतिमार्फत् सरकारले दिएका सुविधा कार्यान्वयनका लागि निजी क्षेत्रको सुझाव ग्रहण गरेर अघि बढ्ने बताए। 'सरकारको सामर्थ्य हामीले हेर्नुपर्छ, त्यसभित्र रहेर हामी अधिकतम सुविधा दिएर निजी क्षेत्रको मनोबल बढाउने काममा म लागिपर्नेछु,' उनले भने।

नेपाल उद्योग वाणिज्य महासंघका अध्यक्ष शेखर गोल्छाले अर्थतन्त्रले अहिलेसम्मकै ठूलो संकट परेको भन्दै पर्यटन, सेवा क्षेत्र र साना व्यवसाय सबैभन्दा प्रभावित परेको बताए। उनले आर्थिक वृद्धि शून्यजस्तै हुन लागेको भन्दै सरकार र निजी क्षेत्र मिलेर अघि बढ्नुपर्नेमा जोड दिए।

'हामी दोहोरो अंकको आर्थिक वृद्धि, वार्षिक ४ लाख रोजगारी सिर्जना गर्दै गरिबी निवारण गरेर आत्मनिर्भर अर्थतन्त्र निर्माणमा योगदान गर्न चाहन्छौँ,' उनले भने, 'बजेट र मौद्रिक नीतिले दिएका सुविधा पनि पूर्णरूपमा कार्यान्वयन हुन सकेका छैनन्, हामीले त्यसतर्फ ध्यान दिनुपर्छ।'

नेपाल उद्योग परिसंघका अध्यक्ष सतिसकुमार मोरले कोभिडबाट अर्थतन्त्रमा ठूलो प्रभाव परेको भन्दै त्यसको सामना गर्न सबै पक्ष हातेमालो गरेर अघि बढ्नुपर्ने बताए। 'कोभिड-१९ ले सिर्जना गरेको संकट समाधानका लागि हामी सहकार्य गरेर अघि बढिरहेका छौँ,' उनले भने, 'व्यवसाय सञ्चालन सहजीकरण र लगानी वृद्धिका लागि कानुनी अवरोध भए तिनीहरूलाई थाँती राखेर अघि बढ्नुपर्ने बताए।'

नेपाल चेम्बर अफ कमर्सका वरिष्ठ उपाध्यक्ष राजेन्द्र मल्लले अहिलेको कोभिड- १९ को प्रभाव सबै क्षेत्रमा परेको भन्दै आर्थिक गतिविधि सञ्चालन गर्ने र अर्थतन्त्र चलायमान बनाउनेतर्फ काम गर्नुपर्ने बताए।

आर्थिक पत्रकार समाजले वार्षिकोत्सवको अवसरमा सेजन अवार्ड तथा फेलोसिपबाट पत्रकारहरू बालकृष्ण ज्ञवाली, सोभित थपलिया, लक्ष्मी सापकोटा र जीवन बस्नेतलाई सम्मान गरेको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

दार्चुलामा आप्रवासी स्रोत केन्द्र

दुई छोरासहित हमासका वरिष्ठ नेताको मृत्यु

प्रदूषण बढेकाले यी गतिविधि नगर्न महानगरको अपील