काठमाडौं- गोल्छा अर्गनाइजेसनको तेस्रो पुस्ता अर्थात् व्यवसायी शेखर गोल्छा निजी क्षेत्रको छाता संगठन नेपाल उद्योग वाणिज्य महासंघको नेतृत्वमा पुगेका छन्। महासंघका वरिष्ठ उपाध्यक्ष रहेका गोल्छा ५४ औँ वार्षिक साधारणसभाबाट स्वत: अध्यक्ष भएका हुन्।
महासंघको वरिष्ठ उपाध्यक्ष स्वत: अध्यक्ष हुने विधानको व्यवस्थाअनुसार गोल्छा महासंघको नेतृत्वमा पुगेका हुन्। उनले महासंघको ५७ औँ साधारणसभाबाट चन्द्रप्रसाद ढकाललाई नेतृत्व सुम्पनेछन्।
औद्योगिक क्षेत्रमा लागेको ९० वर्षपछि यो समूहको नयाँ पुस्ता सम्पूर्ण निजी क्षेत्रको नेतृत्वदायी भूमिकामा पुगेको छ। शेखरका हजुरबुबा रामलाल गोल्छाले नै विराटनगरमा जुट निर्यातका लागि कम्पनी स्थापना गरी व्यावसायिक गतिविधि अघि बढाएका थिए।
रामलालपछि हंसराज गोल्छा र हुलासचन्द गोल्छाले यो समूहको व्यावसायिक गतिविधि विस्तार गरे। त्यसलाई निरन्तरता दियो तेस्रो पुस्ता अर्थात् लोकमान्य गोल्छा, स्वर्गीय दिवाकर गोल्छा र शेखर गोल्छाको समूहले।
महासंघको विधान संशोधनको चरम विवादलाई पाखा लगाउँदै गोल्छा नेतृत्वमा स्थापित भएका छन्। वरिष्ठ उपाध्यक्षलाई स्वत: अध्यक्ष बनाउने कि नबनाउने भन्ने विवाद चिर्दै गोल्छा नेतृत्वमा पुगेका हुन्।
गोल्छालाई अब तीन वर्ष उनको सहयात्री भएर साथ दिनेछन् नवनिर्वाचित वरिष्ठ उपाध्यक्ष चन्द्रप्रसाद ढकालले। संयोग नै मान्नुपर्छ गोल्छा र ढकाल एकै प्रतिस्पर्धी किशोर प्रधानलाई पराजित गर्दै महासंघको नेतृत्व सम्हाल्न पुगेका छन्।
शनिबार दिउँसो सम्पन्न निर्वाचन र आइतबार विहान घोषित मत परिणामअनुसार ढकालले कूल मतको ५५ प्रतिशत मतभार प्राप्त गर्दै प्रधानलाई पराजित गरेका छन्। गोल्छाले चुनावी दौडमा प्रधानलाई वरिष्ठ उपाध्यक्षका रूपमा देख्न चाहेका थिए। तर उनको अनुकूल परिणाम भने आएन।
तीन वर्षपछि महासंघको नेतृत्वमा पुग्नका लागि अहिले वरिष्ठ उपाध्यक्षसहित ३ उपाध्यक्ष र कार्यसमितिको निर्वाचन भएको थियो। तीनजना उपाध्यक्षमा प्रधान समूहबाट दिनेश श्रेष्ठ र अञ्जन श्रेष्ठले निर्वाचन जितेका छन् भने ढकाल समूहबाट रामचन्द्र संघाई उपाध्यक्ष निर्वाचित भएका छन्। प्रधान समूहले विजय निश्चित जस्तै ठानेको एसोसिएट उपाध्यक्षको निर्वाचनमा सौरभ ज्योति संघाईसँग पराजित भए।
उदीयमान व्यवसायी ढकाल महासंघको ५७ औँ साधारणसभाबाट अध्यक्ष हुनेछन्। महासंघको कार्यसमितिमा प्रवेश गरेको १३ वर्षमा नै ढकाल अध्यक्ष हुनेछन्। चुनावमा दुई फरक समूहमा रहे पनि अब गोल्छा र उनको जोडीले नै महासंघको नेतृत्व गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
