सुरक्षा/अपराध

डडेल्धुरामा नक्कली बैंक ग्यारेन्टी बनाएर बोहरा निर्माण सेवाले ठग्यो १० लाख, कारबाही प्रक्रिया सुरू

ललित बोहरा सोमबार, कात्तिक १७, २०७७ १५:१५

डडेल्धुरा- डडेल्धुरामा नक्कली बैंक ग्यारेन्टी बनाएर एक निर्माण कम्पनीले १० लाख भुक्तानी लिएको भेटिएको छ।

जिल्लाको परशुराम नगरपालिकाको वडा नम्बर ५ को वडा कार्यालय भवनको ठेक्कामा नक्कलि बैङ्क ग्यारेन्डी बनाएर बोहरा निर्माण सेवा परशुरामले १० लाख भुक्तानी लिएको पुष्टि भएको अधिकारी स्रोतले बताएको छ।

बोहराले भुक्तानी लिन निर्माण गरेको नेपाल बैंक लिमिटेड महेन्द्रनगर शाखाको नक्कली बैंक ग्यारेन्टीका कागज पत्र समेत नेपाल लाइभलाई प्राप्त भएका छन्।

परशुराम नगरपालिकासँग वडा कार्यालय निमार्णका लागि पेस्की १० लाख भुक्तानी दिएको कागजात पनि प्राप्त भएको छ। ठेकेदार दिलबहादुर बोहराको निर्माण कम्पनी बोहरा निर्माण सेवाले लकडाउनको समयमा सो बैंक ग्यारेन्टी बनाएको हो।

परशुराम नगरपालिले कम्पनी सञ्चालकलाई तीन दिनको समय दिई सो बैंक ग्यारेन्टी सक्कली हो भने प्रमाण जुटाउन भनेको थियो। तर निर्माण कम्पनीका संचालक बोहराले उपलब्ध नगराएपछि नगरपालिका नेपाल बैंक लिमिटेड महेन्द्रनगर शाखालाई कागजपत्र भेरिफाई गरिदिनू भनी पत्र पठाएको र अहिलेसम्म केही प्रतिक्रिया प्राप्त नभएको प्रमुख प्रशासकीय अधिकृत तारानाथ पनेरुले बताए।

उनले भने, ‘लकडाउनमा फोटोकपी पेश भएको थियो, सक्कली बैंक ग्यारेन्टी ल्याउन भनेपछि उनले ल्याएका थिए‚ तर त्यो शंकास्पद देखेर सक्कली जुटाउन तीन दिन समय दिइयो तर केही प्रतिक्रिया नआएपछि बैंकलाई पत्र काटिएको छ।’

उनले उपलब्ध गराउन नसकी नक्कली नै भएको स्वीकार गरेका स्रोतको दाबी छ। नगरपालिकाले पनि उनलाई कानुनी कारबाहीको प्रक्रिया भित्री रुपमा अगाडि बढाएको आधिकारी स्रोतले बताएको छ। कुला स्टमेट रकम करिब ७२ लाख भएपनि बोहरा निर्माण सेवासँग परशुराम नगरपालिकाले ४१ लाख, ४४ हजार ५ सय ११ रुपियाँ ३६ पैसाको सम्झैता गरेको थियो।

उता ३ वर्षदेखि नेपाल बैंक लिमिटेड महेन्द्रनगर शाखामा शाखा प्रमुखको जिम्मेवारी सम्हालेका कमल चन्दले सो बैंक ग्यारेन्डीमा आफ्नो हस्ताक्षर नभएको बताएका छन्। उनले भने, ‘मैले मेरो हस्ताक्षर नचिन्ने कुरा हुँदैन। त्यो मैले गरेको हस्ताक्षर हैन, म ३ वर्ष भो महेन्द्रगर शाखामा प्रमुख भएको अरु कोही आएका छैनन् तर पनि म यो नगरपालिकाले पठाएको पत्र हेड अफिसलाई पठाउँदैछु।’ आवश्यक कारबाही के गर्छ हेड अफिसले गर्ने उनको भनाइ छ। अनौपचारिक कुरामा भने यो नक्कली भएको तर कारबाही के गर्ने भनेबारे माथिको निर्देशन लिन खोजिएको प्रष्ट पारे।

बैंक ग्यारेन्टीमा प्रयोग भएको लेटरप्याट र छाप आफ्नो बैंकको जस्ताको त्यस्तै भएपनि हस्ताक्षर आफ्नो नभएको उनको दाबी छ।

यता आफूले पेश गरेको बैंक ग्यारेन्टी सक्कली भएको निर्माण कम्पनीका सञ्चालक तथा ठेकेदार दिलबहादुर बोहराले दाबी गरे। उनले भने, ‘मलाई नगरपालिकाले ३ दिनको समय दिएको थियो। आज सकियो। म प्रक्रियामा छु। प्रमाण पेश गर्छु। म कुरा बुझ्दै छु।’