एजेन्सी–फिलिपिन्समा २२५ किलोमिटर प्रतिघन्टाको आँधी ‘गोनी’ ले जनजीवन तहननहस पारेको छ। आँधीका कारण भारी वर्षा भएको छ भने तीव्र गतिको हावाका कारण जनजीवन अस्तव्यस्त भएको छ। आँधीका कारण हालसम्म चार जनाले ज्यान गुमाएका छन् भने धेरै मानिस घरबारविहीन भएका छन्।
बाढीले सडक क्षतिग्रस्त बनाउँदा यातायात अवरुद्ध भएको छ। मौसम विभागका अनुसार स्थानीय समयअनुसार बिहान ४.५० बजे क्यान्टेडुनस टापुबाट आँधी सुरु भएको थियो। यसपछि यो मुख्यद्विप लुजोनसम्म पुगेको थियो। राजधानी मनिला लुजोनमा पर्दछ।
आँधी आएपछि करिब ७० हजार मानिसको बसोबास रहेको सहर बिराक सम्पर्कविहीन भएको छ। मौसम विभागले आफ्नो बुलेटिनमा भारीमात्रामा वर्षा, बाढी र पहिरो आउने चेतावनी दिएको छ। सामाजिक सञ्जालमा टिनका छानाहरु उडिरहेको तस्बिर र भिडियोहरु शेयर भइरहेका छन । स्थानीय पशासनले विद्युत्त आपूर्ति बन्द गरेको छ। तस्बिरमा आँधीले सडकहरु ध्वस्त भएको देखिन्छ।
आँधीमा परि ज्यान गुमाउनेमा अलबाय प्रान्तका एक पाँच वर्षका बच्चासमेत छन्। दुई जना पानीमा डुवेको खबर छ भने एक जनाको वाढीमा वगेर मृत्यु भएको छ। त्यस्तै एक जनाको रुख ढलेर लागेर मृत्यु भएको हो। फिलिपिन्समा गोनी आँधीलाई रोलीको नामले चिनिन्छ। फिलिपिन्समा २०१३मा यस्तै तुफान हेयान आएको थियो। त्यसयताको यो शक्तिशाली भएको मानिएको छ । हेयानले फिलिपिन्समा ६००० मानिसको ज्यान लिएको थियो।
कोरोना महामारीले जटिल अवस्था भएको समयमा शक्तिशाली आँधी आएको हो । फिलिपिन्समा हालसम्म ३ लाख ८० हजार ७ सय ३९ जना कोरोना संक्रमित भएका छन् भने ७ हजार २ सय २१ जनाको मृत्यु भएको छ। हालसम्म आँधीप्रभावित ३ लाख ४७ हजार मानिसलाई सुरक्षित रुपमा उद्दार गरिएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
