इटालीमा कुकुरको बच्चा हरियो जन्मेपछि...

विश्व

नेपाल लाइभ शुक्रबार, कात्तिक १४, २०७७ १२:४१

एजेन्सी–इटलीमा एक कृषकले पालेको कुकुरले अनौठो बच्चा जन्माएको छ। क्रिस्टियन मालोस्सी नामक कृषकले पालेको ‘स्पेलाच्चियो’ नामक पोथी कुकुरले जन्माएका पाँच बच्चामध्ये एउटा हरियो रङ्गको छ।

भूमध्यसागरस्थित सार्डिनिया टापुमा जन्मिएको त्यो छाउराको नाम पिस्टाचियो राखिएको छ। पिस्टाचियोसँगै जन्मेका अरू छाउराछाउरीको रौँ भने माउजस्तै सेतो छ। हरियो रौँ भएको कुकुरको जन्म दुर्लभ मानिन्छ।

गर्भमा हुँदा बिलिभर्डिन नामक हरियो रङ्गका कारण उसको रौँ हरियो भएको मानिएको छ। तर बिस्तारै पिस्टाचियोको रङ्ग उड्न थालिसकेको छ। यो क्रम कायम रहने बताइएको छ। मालोस्सीले पिस्टाचियो आफूले पाल्ने तर बाँकी छाउरा अरू मानिसलाई पाल्न दिने निर्णय गरेका छन्।