श्रीलंकाली क्रिकेटर मुरलीधरनको बायोपिक विवादमा, तमिल अभिनेता सेतुपतिद्वारा फिल्म नखेल्ने घोषणा

समाचार

नेपाल लाइभ बुधबार, कात्तिक ५, २०७७ ०८:२०

एजेन्सी–श्रीलंकाका भेट्रान क्रिकेटर मुथैया मुरलीधरनको बायोपिकमा आधारित भएर निर्माण हुन लागेको तामिल फिल्म विवादमा परेको छ। फिल्ममा मुरलीधरनको भूमिकामा देखिन लागेका तमिल अभिनेता विजय सेतुपतिले फिल्म खेल्न अस्वीकार गरेका छन्।

उनले क्रिकेटर मुरलीधरनको आग्रहमा यस्तो निर्णय गरेको बताएका छन्। मुरलीधरनले फिल्ममा काम नगर्न आग्रह गरेकाले आफू फिल्मबाट हटेको सेतुपतिले बताएका छन्। यो बायोपिकमा अभिनय गर्दा अभिनययात्रामा पनि असर पर्ने सुझाव मुरलीधरनले दिएपछि आफूले फिल्ममा नखेल्ने निर्णय गरेको उनले बताए।

किन फिल्म नखेल्ने दबाब आयो ?
श्रीलंकन भेट्रान स्पिनर मुरलीधरनको बायोपिक ‘८००’ नामको फिल्म घोषणा भएको थियो। घोषणालगत्तै यसमा विवाद सुरु भएको थियो। फिल्ममा तमिल फिल्मका प्रख्यात अभिनेता विजय सेतुपतिले मुरलीधरनको भूमिकामा खेल्ने निधो भएको थियो। यसपछि तमिलनाडुमा यसलाई लिएर निकै विवाद भयो। अभिनेता सेतुपतिका विरुद्ध विरोध प्रदर्शन सुरु भयो।

यसरी सार्वजनिक रुपमा विरोध र र्‍याली निस्कन थालेपछि उनले ट्वीटरमार्फत् आफूले उक्त फिल्म नखेल्ने घोषणा गरे। यो प्रकरणमा मुरलीधरन पनि बोल्न वाध्य भए। उनले भनेका छन्, ‘मेरो बायोपिक ८०० माथि भएको विवादपछि यो भनाइ जारी गरेको छु। केही विवादका कारण मानिसहरुले अभिनेता सेतुपतिमाथि दबाब बनाएका छन् कि उनले फिल्म छाडुन्,’ मुरलीधरनले भनेका छन्, ‘म पनि चाहन्न कि तमिलनाडुका राम्रा अभिनेता सेतुपतिको कुनै पनि प्रकारको आपत्ति नआओस्। त्यसैले म उनीसँग अपिल गर्छु कि उनले फिल्म छाडुन् र भविष्यमा उनलाई कुनै समस्या आइनपरोस्।’

मुरलीधरनसँगै अभिनेता सेतुपतिले पनि आफ्नो भनाइ सार्वजनिक गरेका छन्।

‘म कहिल्यै पनि वाधा र ब्यवधानसँग डराउँदिन किनकि आज म जहाँ छु यस्तै वाधाहरुको सामना गरेर यहाँ आइपुगेको हुँ ’ सेतुपतिले भनेका छन्, ‘म यो बायोपिकका लागि यस कारण राजी भएको थिएँ कि यी क्रिकेटरको यसले कन्फिडेन्स बढाउने छ र उनीहरुका लागि प्रेरणा बन्ने छ।’ उनले फिल्म निर्माता यो दुःखद अवस्थावाट छिटै बाहिर आउने आसा ब्यक्त गरे। उनीहरुले छिटै यस बारेमा निर्णय लिने भनेको र आफू त्यसमा खुसी हुने उनले बताए।

के हो विवाद ?
क्रिकेटर मुथैया मुरलीधरन श्रीलंकाका राष्ट्रपति महिन्दा राजापाक्षेका सर्मथक हुन्। राजापाक्षे सिंहाली भाषी हुन्। श्रीलंकामा सिंहाली भाषीको हातमा सत्ता छ। सिंहाली भाषीले तमिल जाती विरुद्धमा यातना र उत्पीडन गरेको आरोप छ। तमिल टाइगरविरुद्ध राजापाक्षेले अभियानै छेडेर समाप्त गरेका थिए।

यसरी गृहयुद्ध समाप्त पार्दा राजापाक्षेले तमिल भाषी र समुदायमाथि दमन गरेको तमिल समुदायको भनाइ छ। यही कारण अभिनेता सेतुपतिले मुरलीधरनको बायोपिक हस्ताक्षर गरेकोप्रति विवाद भएको थियो। उनलाई तमिलनाडुमा तमिलविरोधी भनेर प्रदर्शन हुन थालेपछि उक्त फिल्म छोडने निर्णय गरेका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।