बलिउडमा लागुऔषध प्रकरण : ‘मिडिया ट्रायल’ भएको भन्दै रकुल सिंह दोस्रो पटक अदालत पुगिन्

समाचार

नेपाल लाइभ सोमबार, असोज १२, २०७७ ०८:४०

मुम्बई–भारतीय सञ्चारमाध्यमले ‘मिडिया ट्रायल’ गरेको दावी गर्दै दोस्रो मुद्दा दायर भएको छ। बलिउड अभिनेत्री रकुल प्रीत सिंहले दिल्ली उच्च अदालतमा मुद्दा दायर गरेकी हुन्। यसअघि पनि उनले उच्च अदालतमा मुद्दा हालेकी थिईन्। उक्त मुद्दामा अन्तरिम आदेश जारी भएको थियो।

सुशान्तसिंह राजपूत मृत्यु प्रकरणमा जोडिएको लागुऔषधमा नाम जोडिएपछि अभिनेत्री रकुलले आफ्नोविरुद्ध मिडिया ट्रायल चलाइएको भन्दै त्यसलाई रोक्न अन्तरिम आदेश माग गर्दै उजुरी दिएकी हुन्।

उनले आफ्ना वकील हिमांशु यादव, अमन हिंगोरानी तथा श्वेता हिंगोरानीमार्फत् मुद्दा हालेकी हुन्। उजुरीमा प्रीत हैदराबादमा चलचित्रको छायांकन गरिरहेका बेला मिडियामा आएको रिपोर्ट देख्दा अचम्ममा परेको उल्लेख गरिएको छ।

चलचित्रको छायांकनमै रहेका बेला २३ सेप्टेम्बर मिडियामा आएको समाचार देखेरमात्र आफूलाई लागुऔषधबारे जानकारी भएको उनको दाबी छ। लागुऔषध नियन्त्रण ब्युरो (एनसिबी) ले आफूलाई पत्र पठाएकोबारे जानकारी पनि मिडियामार्फत् मात्र थाहा पाएको उनको भनाइ छ।

ब्यूरोले उनीसँग शुक्रबार सोधपुछ गरेको थियो। उनले आरोप अस्वीकार गरेकी छन्। तर, उनी सुशान्तकी प्रेमिका रिया चक्रवर्तीसँग गरिएको लागुऔषधबारेको च्याटमा भने सहभागी भएकी थिइन्। रियाले आफ्नो घरमा लागुऔषध छोडेर गएको र त्यही विषयलाई लिएर दुई जनाबीच च्याटमा कुराकानी भएको रकुलको दाबी छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।