समाज

बालुवा तस्करी प्रकरण : जिसस प्रमुख र पत्रकार महासंघ सिन्धुपाल्चोकबीच 'दोहोरी'

पित पत्रकारिता भयो : जिसस प्रमुख, महासंघ भन्छ- पत्रकारिताको मानमर्दन नगरौं

काठमाडौं- सिन्धुपाल्चोक जिल्ला समन्वयन समितिका प्रमुख कृष्णगोपाल तामाङ र नेपाल पत्रकार महासंघ सिन्धुपाल्चोक जिल्ला शाखा आपसमा 'दोहोरी'मा उत्रिएका छन्। बालुवा तस्करी प्रकरणमा प्रमुख तामाङको समेत नाम मुछिएपछि उनले आफूविरुद्ध ‘पित पत्रकारिता’ गरिएको आरोप लगाएका छन् भने पत्रकार महासंघले भने पत्रकारिताको मानमर्दन नगर्न स्मरण गराएको छ।

नेपाल लाइभले निरन्तर रूपमा नक्कली बिल बनाएर र अवैध रुपमा बन्द खोलाबाट अवैध बालुवा निकालेर तस्करी गरेको समाचार प्रकाशन गरेसँगै अन्य सञ्चार माध्यमले पनि उक्त प्रकरणमा पछ्याएपछि बुधबार एक विज्ञप्ति जारी गर्दै जिसस प्रमुख तामाङले यस्तो आरोप लगाएका हुन्।

‘अधिकारप्राप्त अधिकारीको गलत क्रियाकलापलाई आम जनसमुदाय सामु ल्याउनु राज्यको चौथो अंगको रुपमा मानिएको पत्रकार जगतको कर्तव्य नै हो,’ विज्ञप्तिमा भनिएको छ, ‘यथार्थ नबुझी सत्यतथ्य बिना कसैको मानमर्दन गर्ने मनसायले मात्र प्रकाशन र प्रसारण गरिने पत्रकारिताको भूमिका पित पत्रकारिता अन्तर्गत पर्ने व्यहोरा सबैमा स्मरण गराउन चाहन्छु।’

पत्रकार महासंघ सिन्धुपाल्चोकले जिसस प्रमुख तामाङको विज्ञप्तिप्रति ध्यानाकर्षण भएको भन्दै अर्को विज्ञप्ति निकालेको छ। महासंघका अध्यक्ष महेश श्रेष्ठले जारी गरेको विज्ञप्तिमा आफ्नो बचाउ गर्दा अरुको मानमर्दन नर्गनसमेत सचेत गराएका छन्।

सञ्चार माध्यममा प्रकाशित सामाग्री गलत भएमा उपचारको अन्य विकल्प नपनाई जन निर्वाचित संस्थाले पत्रकारीता क्षेत्रलाई नै आक्षेप लगाउन गरी विज्ञप्ति निकाल्नु शोभनीय नभएको महासंघको विज्ञप्तिमा उल्लेख छ। खण्डन छपाउने, त्यसबाट पनि चित्त नबुझे प्रेस काउन्सिलमा जाने र अन्य प्रक्रिया हुँदाहुँदै जिससले विज्ञप्ति जारी गरेर पित पत्रकारीतालगायतको भाषा प्रयोगप्रति महासंघको ध्यानाकर्षण भएको भनिएको छ।

समाचारप्रति ध्यानाकर्षण भएको भन्दै जिसस प्रमुख तामाङले नियमविपरीत नदीजन्य पदार्थ उत्खनन तथा बिक्रीमा भएका अनियमित गतिविधि रोक्न आफू क्रियाशील रहेको अवस्थामा आफूलाई जबरजस्ती मुछिएको समेत दाबी गरेका छन्।

साउन १४ गते सशस्त्र प्रहरी बल नेपाल १६ नम्बर गण हे. क्वा. सिन्धुपाल्चोकले चेकजाँचको क्रममा नियमानुसारको कर बापतको शुल्क नतिरी बालुवा लिएर आएको बा ४ ख ५८६४ नम्बरको टिपरलाई नियन्त्रणमा लिई आवश्यक कारबाहीको लागि लेखी पठाइएको स्वीकार विज्ञप्तिमा गरिएको छ।

आवश्यक जाँचबुझ गर्दा उक्त टिपरले सिन्धु स्टोन एन्ड कन्ट्रक्सन प्रालिबाट मिति साउन १४ नियमानुसार बिल काटेर बालुवा ढुवानी गरेको देखिएको दाबी विज्ञप्तिमा गरिएको छ।

यो पनि पढ्नुहोस्

बालुवा तस्करीमा पनि नक्कली भ्याट बिल, २८ टिपर प्रहरीको नियन्त्रणमा, २२ छुटे शनिबार, भदौ २०, २०७७

जिल्ला अनुगमन समितिले वर्षायाममा (असार १ गतेदखि भदौ मसान्तसम्म) नदीजन्य पदार्थ उत्खनन र संकलन कार्यमा रोक लगाइएको र यस विपरीत कार्य गर्नेलाई मात्र सवारी साधनको प्रकृतिअनुसार दण्ड तथा जरिवाना तोकेको जिसस प्रमुख तामाङले दाबी गरेका छन्। उक्त टिपरले अवैध तवरबाट नदी खोलाबाट उत्खनन र संकलन गरी बालुवा नल्याएको दाबी उनले गरेका छन्।

मौज्दात नै नभइकन बालुवा बिक्री गरेको भनी सम्प्रेषित समाचारको विषय छानबिन हुँदा सो अनुसार नै प्रमाणित भएको अवस्थामा सम्बन्धित क्रसर उद्योग जिम्मेवार रहने उनको विज्ञप्तिमा भनिएको छ।

सिन्धुपाल्चोकमा असारदेखि भदौसम्म खोलाबाट बालुवा निकाल्न रोक लगाएको समयमा केही स्थानबाट बालुवा निकालेर नक्कली बिल बनाई तस्करी गरेको पाइएपछि शशस्त्र प्रहरीले २८ वटा टिपर नियन्त्रणमा लिएको थियो।

यी मध्ये २२ वटा विना कारबाहीमा छुटे्का थिए भने ६ वटा टिपरबाट नक्कली बिल भेटाइएको थियो। अर्कै प्रयोजनका लागि दर्ता भएको विकास सप्लायर्सको भ्याट बिलमा बालुवाका टिपरहरु काठमाडौ छिर्ने प्रयास गरेपछि प्रहरीले पक्राउ गरी जिससलाई बुझाएको थियो। जिससले साउन १४ गते पक्राउ परेको टिपरलाई १६ गतेको मितिमा काटिएका बिल पेस गरेकै आधारमा बिना कारबाही छोडेको थियो।

सञ्चार माध्यमले यो विषयमा समाचार प्रकाशन गरेपछि जिसस प्रमुख तामाङले एउटा मात्र टिपरको नम्बर उल्लेख गरेर पित पत्रकारिताको आरोप लगाएका थिए। उनको भूमिकामाथि प्रश्न उठाएपछि उनले पत्रकारिता क्षेत्रलाई नै गम्भीर आरोप गरेको भन्दै महासंघले आपत्ति जनाएको हो।