फाइल तस्बिर
काठमाडौं-असारदेखि भदौसम्म कुनै पनि खोलाबाट बालुवा र ढुंगागिट्टी निकाल्न पाइदैन। यसरी निकालेको पाइए कैद र जरिवानासमेत गराउने र निकाल्न प्रयोग हुने औजारहरु जफत गर्ने गरिन्छ। तर सिन्धुपाल्चोकको भोटेकोसी, सुकुटे र इन्द्रावतीमा एक समूहले निर्वाध रुपमा बालुवा निकाल्ने अनि नक्कली भ्याट बिलमार्फत् काठमाडौं तस्करी गर्ने गरेको पाइएको छ।
अवैध रुपमा बालुवा निकाल्ने मात्र नभई उक्त समूहले राजस्वसमेत छलि गर्ने गरेको पाइएको हो। जिल्ला प्रहरी कार्यालय सिन्धुपाल्चोकले एकैचोटि २८ वटा टिपर नियन्त्रणमा लिएपछि यसरी अवैध बालुवा निकाल्ने गरेको खुलेको हो।
राजनीतिक दलको संरक्षणमा ठेकेदारले अवैध रुपमा खोलामा स्काभेटर लगाएर बालुवा तथा ढुंगागिट्टी निकाल्ने अनि प्रहरी चेकजाँचबाट उम्कन नक्कली बिल पेश गर्ने गरेका पाइएको छ। यसरी राजस्व छलि र गैरकानुनी काम गर्नेमा कृष्ण भन्ने विकास श्रेष्ठ नेतृत्वको टोली रहेको स्रोतले जानकारी दिएको छ। उनीहरुले फरक–फरक भ्याट बिल काटेर काठमाडौ पठाउने गरेका थिए। प्रहरीले एकै ठाउँबाट बालुवा ल्याउँदा पनि फरक–फरक बिल देखेपछि शंका लागेर टिपर नियन्त्रणमा लिएको थियो।
‘प्रहरीलाई प्राप्त सूचना र फरक-फरक बिल देखिएपछि २८ वटा बालुवा टिपर नियन्त्रणमा लिइएको थियो,’ डिएसपी माधवप्रसाद काफ्लेले भने, ‘तीमध्ये ६ वटा गाडीले नक्कली भ्याट बिल दिएको आशंका छ।’
नियन्त्रणमा लिइएका सबै सवारीसाधन जिल्ला समन्वय समितिमा बुझाइएको उनले बताए। प्रहरीमा बुझाइएकामध्ये २२ वटा गाडीको सक्कली नै बिल भएको भन्दै जिल्ला सम्वन्वय समितिले छोडेको छ। श्रेष्ठको नेतृत्वमा विल काटिएको ६ वटा गाडी भने अहिले पनि जिल्ला समन्वय समितिको निगरानीमा रहेको छ। ‘अहिले अनुसन्धानकै चरणमा छ,’ काफ्लेले भने ‘नक्कली भ्याट बिल प्रमाणित भएमा राजस्व चुहावट आकर्षित हुन्छ।’
कारबाही गर्ने कुरा जिल्ला समन्वय समितिको अधिकार भएकाले उसले अनुसन्धान गरिरहेको काफ्लेले बताए। ‘नक्कली भ्याट बिलको प्रयोग भएको पाइए राजस्व छलि हुन्छ त्यसको बेग्लै अनुसन्धान हुन्छ,’ उनले भने। यो राजस्व अनुसन्धान विभागले गर्नेछ।
नियन्त्रणमा लिइएका टिपरबारे सोध्न खोज्दा जिल्ला सम्वन्वय समितिका प्रमुख कृष्णगोपाल तामाङले अहिले तिनलाई जरिवाना तिर्न सूचना जारी गरिएको बताए। उनीहरु नआएमा अरु अनुसन्धान अघि बढ्ने उनले बताए। ‘नक्कली भ्याट विल नै भन्ने आएको छैन,’ तामाङले भने, ‘अनुसन्धानपछि यो विषयमा थाहा होला।’
टिपर नियन्त्रणमा लिएपछि सप्लायर्स विकाश श्रेष्ठ भने फरार भएका छन्।
दुई महिनादेखि जिल्ला समन्वय समिति सिन्धुपाल्चोक र जिल्ला प्रशासन कार्यालयलाई यो बारेमा जानकारी भए पनि मौन बसेको स्थानीयहरुको आरोप छ। सेटिङमा निकालिएको तस्करी बालुवा सप्लाइ गर्दा नक्कली भ्याटबिल प्रयोग गर्दै राजस्व छलि गर्ने श्रेष्ठको खोजी प्रहरीले खोजी तीव्र पारेको छ।
रातभर नदि बगरबाट निकालिएको बालुवा सप्लाइ गर्न तस्कर समूहले विभिन्न खाले नक्कली भ्याट बिल प्रयोग गरेपछि सिन्धुपाल्चोक प्रहरीले बालुवा सप्लायर्सलाई कुनै पनि बिल नकाट्न भन्दै जानकारी गराएको थियो।
भ्याट बिल काटेपछि राजस्व बुझाउनुपर्नेमा कतै नबुझाएर तस्करी गर्ने गरेको र उक्त रकम राजनीतिक दलहरुलाई बुझाउने गरेको स्रोतको दाबी छ। जिल्ला समन्वय समितिले नै सबै स्थानीय तहसँग छलफल गरेर वर्षायामको ३ महिना खोलामा टिपर लैजान नपाउने तथा नदिजन्य सामग्री उत्खनन गर्न रोक लगाउने गरेको छ। तर रातिराति तस्करी गर्नेहरुले मिलेमतोमा बालुवा निकाल्ने र स्टक भनेर बिक्री गर्दै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
