समाचार

करोड ‘डिस्लाइक’को अन्तर्य

नेपाल लाइभ आइतबार, साउन ३२, २०७७ १४:२७

काठमाडौं-बलिउड बेला-बेला आफ्ना प्रशंसकहरुको फरक ‘मुड’ र मान्यताको शिकार हुँदै आइरहेको छ। कहिले कहलिएको ब्यानरको भव्य फिल्मले बक्स अफिसमा पानी भन्न पनि पाउँदैन त कहिले सानो बजेट र नयाँ कलाकार तथा निर्देशकको फिल्मले तहल्का मच्चाइदिन्छ। तर यसपटक अर्को अलिक अनौठो परिदृश्य सतहमा आएको छ, त्यो पनि फिल्म सार्वजनिक नहुँदै।

त्यो के हो भने, पछिल्लो समय आलिया भटको अभिनय रहेको र उनकै बुवा महेश भटले निर्देशन गरेको चलचित्र ‘सडक–२’को ट्रेलर अनपेक्षित रुपमा आक्रोशको शिकार बनेको छ। अगष्ट १२ मा यूट्युबमा सार्वजनिक भएको उक्त ट्रेलरले सबैभन्दा धेरै ‘डिस्लाइक’ पाएपछि बलिउड अचम्मित भएको छ।

यो सामग्री तयार पार्ने बेलासम्म ‘सडक–२’को ट्रेलरले उक्त ट्रेलरमा युट्युबमा ५ लाख ८७ हजार ‘लाइक’ हुँदा १ करोडभन्दा बढी ‘डिस्लाइक’ छ। ट्रेलरमा कमेन्ट गर्नेहरु अधिकांशले सकारात्मक प्रतिक्रिया दिएका छैनन्। उनीहरुको भनाइ छ, ‘यो फिल्म डिसलाइकका लागि नै योग्य छ।’ यसमा ९ लाख ३ सयभन्दा बढीले प्रतिक्रिया दिएका छन्।

ठूलो ब्यानर र भव्य भनिएको यो फिल्ममा यतिधेरै ‘डिसलाइक’ किन आयो त?

बलिउडका जानकारहरुका अनुसार अभिनेता सुशान्त सिंह राजपूतको आत्महत्या प्रकरणपछि बलिउडका प्रशंसकहरुले यतिबेला आफूलाई यहाँ विद्यमान परिवारवाद अर्थात् नेपोटिज्मका विरुद्ध एक ठाउँमा उभ्याउने प्रयास गरिरहेका छन्। भट बाबुछोरीको यो फिल्मको ट्रेलर यही प्रतिक्रियाको शिकार भएको बताइएको छ। बलिउडसम्वद्ध सञ्चारजगतले पनि यो आश्चर्यको जरा परिवारवाद भएको विश्लेषण पेश गरिरहेको छ।

पछिल्लो दिनमा सामाजिक सञ्जालहरुमा नेपोटिज्मलाई प्राथमिकता दिएको आरोप खेप्दै आएका निर्माता तथा निर्देशक, जो फिल्मी घरानासँग जोडिएका छन्, को कडा आलोचना हुँदै आइरहेको छ। यस्ता नामहरुमा करण जोहर, नायिका आलिया भट, अभिनेता सलमान खान, निर्माता तथा निर्देशक सञ्जय लिला भन्साली, निर्माता आदित्य चोपडालगायत छन्। यतिसम्म कि, यसमा ऋतिक रोशन, अभिषेक बच्चन, करिश्मा कपुर र यस्ता अरु नामहरु पनि छन्।

गत जुन १४ मा अभिनेता सुशान्तले मुम्बईस्थित आफ्नो फ्ल्याटमा आत्महत्या गरेपछि कतिपयले यसलाई आत्महत्या नभएर यो बलिउडमा हुने नियोजित चलखेल र नयाँहरुलाई गरिने दुव्र्यवहारको परिणाम भएको बताए। अभिनेत्री कंगना रनावतले त सुशान्तले आत्महत्या गरेको नभइ ‘प्लान मर्डर’ भएको आरोप लगाएकी थिइन्। उनले निरन्तर रुपमा बलिउडको परिवारवाद र यसको दादागिरीबारे बोलिरहेकी छिन्।

यस्तै मतको जगमा रहेर अहिले बलिउडमा परिवारवादको विरोधस्वरुप सामाजिक सञ्जालका प्रयोगकर्ताहरुले अभियान नै चलाएका छन्। उनीहरुको भनाइ छ, ‘यस्तो सिण्डिकेट बन्द हुनुपर्छ। नयाँ र बाहिरबाट आएका कलाकारहरुको संघर्षको सम्मान हुनुपर्छ।’

सोही सिलसिलाको कडिका रुपमा सडक–२ को ट्रेलरलाई भारतको सबैभन्दा धेरै डिस्लाइक पाउने ट्रेलर बनाउने सामाजिक सञ्जाल प्रयोगकर्ताहरुको यो अभियान सफल रुपमा प्रकट भएको छ। यो फिल्मका निर्माता तथा निर्देशक महेश भटमाथि सुशान्तको आत्महत्याका लागि जिम्मेवार भएको आरोपसमेत सामाजिक सञ्जाल प्रयोगकर्ताहरुले लगाएका छन्। उनले सुशान्तकी प्रेमिका भनिएकी रिया चक्रवर्तीलाई सहयोग गरेको र सुशान्तबाट टाढा बस्न दबाब दिएको दाबी उनीहरुको छ।