काठमाडौं-अवैध रुपमा आयात भएको टेस्लाका दुई वटा इलेक्ट्रिक कार रोड वर्दिनेस टेस्ट (सडक विश्वसनीयता परीक्षण) नै नगरि यातायात व्यवस्था कार्यालय साना/ठूला सवारी बागमती प्रदेशले दर्ता गरेको खुलेको छ। आयातित सवारी दर्ताका लागि यातायात व्यवस्था विभागबाट ‘रोड वर्दिनेस टेस्ट’ गर्नुपर्ने कानुनी व्यवस्था छ।
असार १६ गते भन्सार कार्यालयले यातायात व्यवस्था विभागलाई टेस्लाका दुई कार दर्ता नगर्न पत्र पठाएको थियो। भन्सारको उक्त पत्रपछि यातायात व्यवस्था विभागले टेस्लाका दुई इलेक्ट्रिक कारको ‘रोड वर्दिनेस टेस्ट’ तत्काल गर्नुपर्ने भन्दै प्रक्रिया अघि नै बढाएन। अवैध रुपमा टेस्लाका गाडी आयात गरेको श्रीमा डिस्ट्रिव्युटर्स नेपाल प्रालि सोझै यातायात व्यवस्था कार्यालय साना÷ठूला सवारी एकान्तकुना, बागमती प्रदेश पुग्यो।
कार्यालयले टेस्लाका दुवै गाडी ‘रोड वर्दिनेस टेस्ट’ बिनै दर्ता गरेको तथ्य बाहिर आएको हो। गाडी दर्ताका लागि यातायात व्यवस्था विभागले ‘रोड वर्दिनेस टेस्ट’ गरेको पत्र नपठाई कुनै पनि कार्यालयले सवारी दर्ता गर्नै सक्दैन। विभागको ‘रोड वर्दिनेस टेस्ट’ गरिएको पत्र नै नभई कार्यालयले के आधारमा सवारी दर्ता गर्यो भन्ने गम्भीर प्रश्न उठेको छ।
श्रीमा डिस्ट्रिव्युटर्सले त गाडी नै अवैध रुपमा आयात गरेकाले ऊ अन्य कामसमेत अवैध रुपमा गर्न लागिपरेको देखिन्छ। श्रीमाको अवैध कार्यमा सर्वोच्चले साथ दिएपछि विभागबाट आवश्यक कागजात नै नल्याई गाडी दर्ता गराउन गएको थियो।
श्रीमाले दायर गरेको मुद्दामा सर्वोच्च अदालतले जेठ २६ मा गाडी छुटाउन अन्तरिम आदेश दिएको थियो। त्यसविरुद्ध भन्सार विभागले असार २ गते भ्याकेट माग गरेको थियो। सर्वोच्चले असार ११ मा भन्सारको भ्याकेट अस्वीकार गरेपछि श्रीमाले १४ गते वीरगन्ज भन्सार कार्यालयबाट गाडी बुझेको थियो।
श्रीमालाई टेस्लाका दुई गाडी दिएपछि भन्सार कार्यालयले असार १६ गते यातायात व्यवस्था विभागलाई ती गाडी दर्ता नगर्न पत्र पठाएको थियो। उक्त पत्रमा सर्वोच्चले गाडीको कर र दर्ताको विषय अन्तिम फैसलापछि हुने र गाडी संरक्षणका लागि आयातकर्तालाई दिन भनेकाले दर्ता नगर्न भनिएको थियो।
तर श्रीमा असार १८ गते यातायात व्यवस्था कार्यालय साना/ठूला सवारी एकान्तकुना पुगेर टेस्लाका दुवै गाडी दर्ता गरेको थियो। कार्यालयले विभागले दिने ‘रोड वर्दिनेस टेस्ट’ को प्रमाण नहेर्दा अवैध आयात भएको टेस्ला दर्ता भएको हो। कार्यालयले हेर्नुपर्ने डकुमेन्ट नहेर्दा समस्या आएको कार्यालयले जनाएको छ।
‘आवश्यक कागजात हेरेको भए समस्या आउने थिएन। फाँटवाला साथीहरुले कमजोरी गर्नुभयो,’ कार्यालयका एक अधिकृतले भने, ‘सबै डकुमेन्ट पुरा गरेर आए भन्ने विश्वासमा पनि फाँटवालाले काम गरेका हुन सक्छन्। तर आयातकर्ताले बदमासी गरिदिएको जस्तो छ।’
यता यातायात व्यवस्था विभागले समयमै कार्यालयलाई पत्र नपठाउँदासमेत यो समस्या निम्तिएको कार्यालयको भनाइ छ। विभाग भने भन्सारले असार १६ मै पत्र पठाएको र कार्यालयले ‘रोड वर्दिनेस टेस्ट’ नभएको गाडी दर्ता नगर्ला भन्ने विश्वासमा भन्सारको पत्र कार्यालयलाई नपठाएको बताउँछ। ‘विभागले भन्सारको पत्र आएपछि टेस्टको प्रक्रिया नै सुरु गरेन। टेस्ट विना गाडी दर्ता हुँदैन भन्ने विषयमा कार्यालय जानकार नै भएकाले पत्र फरवार्ड गरिएन,’ विभागका एक प्राविधिकले भने, ‘अहिले आएर समस्या उत्पन्न भएको छ।’
सम्बन्धित समाचार
टेस्ला र अउडीको आधिकारिक प्रमाणपत्र दिने कम्पनी एउटै
सुरक्षित राख्ने गरी भन्सारले श्रीमालाई टेस्लाका गाडी बुझायो
अवैध आयात भएको टेस्ला गाडी अदालतको आदेशविपरीत दर्ता
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751372795.jpg)
-1751267101.jpg)
-1751273553.jpg)
-1749826086.png)
