अटो

अवैध आयात भएको टेस्ला गाडी अदालतको आदेशविपरीत दर्ता गाडी दर्ता नगर्न असार १६ मा भन्सारले पठायाे पत्र, यातायातले भने १८ गते नै गाडी दर्ता गराइदियो

शिव बोहरा बिहीबार, साउन १५, २०७७ ०९:२४

काठमाडौं-सर्वोच्च अदालतको अन्तरिम आदेशको उल्लंघन गर्दै अवैधरूपमा आयात भएका दुईवटा टेस्लाका गाडी दर्ता भएको छ। श्रीमा डिस्ट्रिब्युटर्सले यी दुई गाडी अदातलको आदेश र भन्सार कार्यालयको पत्रविपरीत दर्ता गरेको पाइएको हो।

सर्वोच्च अदालतले मुद्दाको किनारा लागेपछि मात्र कर तथा दर्ताको प्रक्रिया अघि बढाउन भन्दै गाडी सुरक्षित राख्ने गरी आयातकर्तालाई जिम्मा लागाउन भन्सार कार्यालयको नाममा अन्तरिम आदेश दिएको थियो। तर आयातकर्ता श्रीमाले यही आदेशको उल्लंघन गर्दै गाडी दर्ता गरेको भेटिएको हो।

श्रीमा डिस्ट्रिब्युटर्सले गाडी छुटाउन माग गर्दै सर्वोच्च अदालतमा मुद्दा दायर गरेकोमा सर्वोच्चले जेठ २६ गते अन्तरिम आदेश जारी गरेको थियो। वीरगञ्ज भन्सार कार्यालयले यातायात व्यवस्था विभागलाई टेस्लाका दुई गाडी दर्ता नगर्न भन्दै असार १६ मा पत्र पठाएको थियो।

जेठ २६ गते सर्वोच्चले जारी गरेकाे अन्तरिम आदेश

आयातकर्ता श्रीमाले ती गाडी असार १८ मा कम्पनीकै नाममा दर्ता गराएको यातायात व्यवस्था कार्यालय साना/ठूला सवारी एकान्तकुना, बागमती प्रदेशको ढड्डामा छ। भन्सार कार्यालयले यातायात व्यवस्था विभागलाई पत्र पठाएकाले उक्त पत्र बागमती प्रदेश भौतिक पूर्वाधार विकास मन्त्रालय हुँदै हालसम्म पनि कार्यालयमा आइनपुगेको कार्यालय स्रोतले जनाएको छ।

‘सर्वोच्चमा मुद्दा परेको विषयमा हामीलाई पत्र नआएसम्म कार्यालय जानकार हुने कुरा भएन,’ स्रोतले भन्यो, ‘कागजातसहित आएपछि हामीले दर्ता गर्नुपर्ने हुन्छ। थप कुरा थाहा भएन, पत्र आयो भने कानुन र आदेशअनुसार प्रक्रिया अघि बढाउँछौं।’

कार्यालयको रेकर्ड अनुसार टेस्लाका दुई गाडी बागमती प्रदेश–०१–०२३ च–५६५६ र बागमती प्रदेश–०१–०२३ च–५६८८ नम्बरमा दर्ता भएका छन्। ती गाडी आयातकर्ता कम्पनी श्रीमा डिस्ट्रिब्युटर्सकै नाममा छ। गाडी दर्ता भएको ३५ दिनभित्र नामसारी गरिसक्नु पर्ने कानुनी व्यवस्था रहेको कार्यालयले जनाएको छ। तोकिएको अवधिमा दर्ता नभए जरिवाना तिर्नुपर्छ।

सर्वोच्चको अन्तरिम आदेशविरुद्ध भन्सार विभागले जेठ २ मा ’भ्याकेट’ माग गरेको थियो। आयातकर्ता श्रीमा डिस्ट्रिब्युटर्सको पक्षमा दिएको अन्तरिम आदेशविरुद्ध भन्सार विभागको भ्याकेट निवेदनमा अदालतले असार ११ गते अन्तरिम आदेश खारेज गर्न अस्वीकार गरेको हो। असार ११ मा भएको सुनुवाइमा न्यायाधीशद्वय सपना प्रधान मल्ल र पुरुषोत्तम भण्डारीको संयुक्त इजलासले भन्सारको मागबमोजिम आदेश खारेज गर्न अस्वीकार गरेको थियो।

यो पनि पढ्नुहोस्

अवैध आयात भएको टेस्ला छुटाउन सर्वोच्चको आदेशबिहीबार, असार ११, २०७७

अदालतले भन्सारको माग अस्वीकार गरेपछि टेस्लाका गाडी छुटाउने बाटो खुलेको थियो। श्रीमा डिष्ट्रिब्युटर्सले भन्सारले साविकबमोजिमकै कर तिरेको आधारमा गाडी छुटाउन पाउनुपर्ने मागदाबी गर्दै रिट दायर गरेको थियो। तर सर्वोच्चले मुद्दाको अन्तिम किनारा लागेपछि मात्र कर र सवारी दर्ताको बाटो खुल्ने उल्लेख गरेको छ।

जेठ १५ मा आगामी आर्थिक वर्षको बजेट ल्याइएसँगै नयाँ आर्थिक ऐनबाट लगाइएको जरिवाना तथा कर गैरकानुनी भएको र आफूलाई त्यसअनुसार व्यवहार गर्न नहुने मागदाबी गर्दै श्रीमा सर्वोच्च पुगेको थियो। वीरगञ्ज भन्सार कार्यालयले जाँचपास गर्दै छुटाएका गाडी कानुनविपरीत छुटेको समाचार सार्वजनिक भएपछि धादिङको गजुरीबाट फर्काइएको थियो।

भन्सारको यार्डमा रहेका दुईवटा टेस्ला गाडी छुटाउन चाहे आयातकर्ताले जेठ १५ गते परिवर्तित करको दरअनुसार भन्सार शुल्क तिरी ३० प्रतिशत जरिवानासमेत तिरेर मात्रै छुटाउन सक्ने आर्थिक ऐनको व्यवस्था आफूलाई लागू हुन नहुने दावीसहित श्रीमा अदालत पुगेको थियो।

भन्सार ऐन, २०६४ को दफा २८ को उपदफा ८ बमोजिम एकपटक जाँचपास भएका मालवस्तु भन्सारबाट छुटाई लैजानुपूर्व पुनः पूरा वा आंशिक जाँचपास गर्न पाइने व्यवस्था छ। श्रीमा डिस्ट्रिब्युटर्सले ल्याएका दुईवटा टेस्लाका इलेक्ट्रिक कार २०७६ माघ १५ गते भन्सार जाँचपासमा शंका लागेको भन्दै फिर्ता गरिएको थियो।

श्रीमाले वाणिज्यबाट लिएको प्रमाणपत्रलाई आधार मानेर आफू टेस्लाको नेपालका लागि आधिकारिक बिक्रेता भएको जिकिर गरेको थियो। कम्पनीले ती कार हङकङको कम्पनीबाट किनेको थियो। कम्पनीले टेस्ला मोटर एचके लिमिटेडसँग ३१ नोभेम्बर २०१९ मा टेस्ला मोडल एक्स खरिदको सम्झौता गरेको रिटमा उल्लेख छ। २ वटा गाडी खरिद भने साउथ चाइना एक्जिम लिमिटेडसँग खरिद गरेको थियो।

आर्थिक ऐन २०७७ मा एकपटकका लागि आधिकारिक बिक्रेता बिना नै अवैधरूपमा ल्याएका गाडी भन्सारपछि ३० प्रतिशत जरिवाना तिरेर ल्याउन पाउने व्यवस्था छ। भन्सार विभागले श्रीमा डिस्ट्रिब्युटर्स नेपाललाई सोही आधारमा गाडी छुटाउन भनेको छ।

टेस्लाकै इलेक्ट्रिक कार नेपालमा श्रीमाका साथै अर्को कम्पनी ग्यालेक्सी अटोमोटिभ्स प्रालिले समेत आयोत गरेको थियो। सर्वोच्च अदालतले असार ११ गते भन्सारको भ्याकेट खारेज गरेपछि आयातकर्ता श्रीमा डिस्ट्रिब्युटर्स १३ गते भन्सार पुगेको थियो। १३ गते शनिबार भएकाले १४ गते आइतबार श्रीमाका प्रतिनिधिलाई भन्सार कार्यालय वीरगञ्जले टेस्लाका दुई इलेक्ट्रिक कार सुरक्षित राख्ने गरी बुझाएको थियो।

याे पनि

टेस्ला र अउडीको आधिकारिक प्रमाणपत्र दिने कम्पनी एउटै

सुरक्षित राख्ने गरी भन्सारले श्रीमालाई टेस्लाका गाडी बुझायो

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।