काठमाडौं- कोरोना जोखिम न्यूनीकरणका लागि भन्दै सरकारले गरेको चार महिना लामो लकडाउन अवधिमा १ करोड ४८ लाख ४९ हजार रुपैयाँ बराबरको कन्डम आयात भएको छ। लकडाउन अवधिमा २६ हजार ८ सय ७ केजी कन्डम आयात भएको भन्सार विभागको तथ्यांकमा उल्लेख छ। लकडाउन हुन अगाडि फागुन मसान्तसम्म नेपालले भारत तथा तेस्रो मुलकुबाट १२ करोड ४६ लाख ९६ हजार रुपैयाँ बराबरका १ लाख ३ हजार ८ सय ७६ केजी कन्डम आयात गरेको थियो। तर, आर्थिक वर्षका अन्त्यसम्ममा आइपुग्दा नेपालले १३ करोड ९५ लाख ४५ हजार रुपैयाँ बराबरको १ लाख ३० हजार ६ सय ८३ केजी कन्डम आयात भएको छ।
कोरोना संक्रमण न्यूनीकरणका लागि भन्दै सरकार गत आवका चार महिना लकडाउन गरेपनि परिवार नियोजनको अस्थायी साधन कन्डमको आयात भने बढेको हो। भन्सार विभागले हालै सार्वजनिक गरेको तथ्यांकअनुसार गत आर्थिक वर्ष २०७६/०७७ मा समग्र आयात घटेपनि कन्डम आयात भने बढेको छ।
गत आर्थिक वर्षमा नेपालले १२ देशबाट १ लाख ३० हजार ६ सय ८३ केजी कन्डम आयात गरेको छ। कन्डम आयातमा नेपालबाट १३ करोड ९५ लाख ५४ हजार रुपैयाँ विदेशीको छ। अघिल्लो आर्थिक वर्ष २०७५/०७६ मा भने नेपालले जम्मा १३ करोड ५३ लाख ४७ हजार रुपैयाँ बराबरको कन्डम आयात गरेको थियो। गत आर्थिक वर्षमा कन्डम आयातको परिमाण घटेपनि नेपालबाट विदेशिएको रकम भने बढी हो। अघिल्ला आर्थिक वर्षमा २ लाख २२ हजार ३ सय ६ केजी कन्डम आयात भएको थियो।
कन्डम किन्दा ५ वर्षमै ८० करोड बाहिरियो
नेपालले ५ वर्षमा भारत तथा तेस्रो मुलुकबाट ८० करोड १० लाख २८ हजार रुपैयाँ बराबरको कन्डम आयात गरेको छ। परिवार नियोजको अस्थायी साधनमध्ये सबैभन्दा बढी प्रयोगमा आउने साधन कन्डम हो। त्यसमा पनि सबैभन्दा बढी भूकम्प आएपछि आर्थिक वर्ष २०७२/७३ मा बढी कन्डम आयात भएको छ।
भन्सार विभागका अनुसार आव २०७२/७३ मा सबैभन्दा बढी २१ करोड ११ लाख ३ हजार रुपैयाँ बराबरको ४ लाख ५७ हजार ७ सय ७६ केजी कन्डम आयात भएको थियो।
यसैगरी गत आर्थिक वर्ष २०७६/०७७ मा १३ करोड ९५ लाख ४५ हजार रुपैयाँ १ लाख ३० हजार ६ सय ८३ केजी कन्डम आयात गरेको छ।
यस्तै आव २०७५/७६ मा १३ करोड ५३ लाख रुपैयाँ बराबरको २ लाख २२ हजार ३ सय ६ केजी कन्डम आयात भएको छ। आव २०७४/७५ मा १९ करोड ९३ लाख ३९ हजार रुपैयाँ बराबरको ३ लाख ७ हजार ९ सय ९८ केजी कन्डम आयात भएको थियो भने आव २०७३/७४ मा ११ करोड ५६ लाख ९४ हजार रुपैयाँ बराबरको १ लाख ८३ हजार २ सय ७७ केजी कन्डम आयात भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
