डडेल्धुरा- डडेल्धुराको आलिताल गाउँपालिका-६ मा खानेपानीका विषयमा विवाद हुँदा एक बालकको हत्या भएको छ। ७ वर्षीय ती बालकलाई भीरबाट खसालेर हत्या भएको आरोप लागेको छ।
प्रहरीले शनिबार नाबालक हत्यामा संलग्न भएको आरोपमा ७ जना अभियुक्तलाई पक्राउ गरेको छ। पक्राउ पर्नेमा आलिताल गाउँपालिका-६ का १९ वर्षीय लाले भन्ने लालबहादुर खड्का, ४८ वर्षीय पम्फा ओली, २९ वर्षीय अमृता ओली, ४८ वर्षीय कलु खड्का, ३० वर्षीय रिमा ओली, १९ वर्षीय तुल्सी ओली र ३१ वर्षीय पवित्रा ओली रहेका छन्।
पक्राउ परेकाहरुमाथि अनुसन्धान भइरहको जिल्ला प्रहरी कार्यालयका प्रहरी नायब उपरीक्षक दधिराम न्यौपानेले जानकारी दिए। यसअघि प्रहरीले ३० वर्षीय टीकाराम ओली, ५५ वर्षीय निरु भन्ने निरबहादुर ओली, १९ वर्षीय भीमबहादुर खड्का र ३३ वर्षीय हरिकृष्ण भाटलाई पक्राउ गरेको थियो। प्रहरीले उनीहरुमाथि अनुसन्धान भइरहेको जानकारी दिएको छ।
खानेपानीसम्बन्धी विवादले उग्र रुप लिँदा झडप
गत असार २६ गते खानेपानीको विषयमा विवाद भएको थियो। विवादपछि झडप हुँदा गणेश महराका ७ वर्षीय छोरा हिमांशु महरा घाइते भएका थिए। हिमांशुको अनुहारमा ढुङ्गाले हानेर चोट लागेको थियो। घटनापछि घाइते भएका उनलाई उपचारका लागि कैलालीको सारथी अस्पतालमा भर्ना गरिएको थियो। उपचारकै क्रममा असार २७ गते उनको मृत्यु भयो।
आलीताल-६ बाहुना गाउँ घर भएका ती बालकको गाउँलेले लखेटीलखेटी हत्या गरेको आरोप लागेको छ। यतिमात्रै होइन, ११ जनाको समूहले ढुंगा प्रहार गरी हिमांशुलाई भीरबाट धकेलेको आरोप समेत लागेको छ।
यस्तो थियो विवाद
आलिताल गाउँपालिका-६ मा दुई गाउँ छन्। भौना गाउँ र मेलखाली गाउँ। दुवै गाउँबीच वर्षौंदेखि खानेपानीको विवाद थियो। मेलखाली गाउँवासीले २०४१ सालदेखि भौना गाउँवासीले प्रयोग गर्दै आइरहेको खानेपानी आफ्नो गाउँ लग्न खोजेपछि विवाद उत्कर्षमा पुगेको थियो। त्यसपछि १७ परिवार रहेका भौना गाउँवासीले त्यसको विरोध गरे।
१४ घरधुरी रहेको मेलखाली गाउँवासीले षड्यन्त्रपूर्वक खानेपानी आफ्नो गाउँ लैजान लागेको भौनाका गणेश महराले थाहा पाए। वडाबाट बजेट हालेर निर्माण हुन लागेको खानेपानी आयोजनाको उपभोक्ता समितिमा उनकै गाउँवासी हरिकृष्ण भाट पनि थिए।
‘वषौंदेखि हामीले प्रयोग गरिरहेको खानेपानी लिफ्टिङ गरेर माथि रहेको मेलखालीमा लैजान लागेपछि विरोध गरेका थियौं,’ महराले भने, ‘पानीको मूल हाम्रो गाउँमा थियो। मेरै जमिनदेखि मास्तिर।’ २६ गते साँझ सोही विवादलाई लिएर मेलखालीवासी लठ्ठी बोकेर आफ्नो घरमा झगडा गर्न आएको उनले बताए।
'सुरुमा त मैले तपाईंको गाउँको घरघरमा ट्याङकी छ भनेर सम्झाएँ,’ उनले भने, ‘साँझ साढे ६ बजे त्यहाँ आएका भीम खड्का, टीकाराम ओली, लाले खड्काले मेरो कुरा सुन्नुको सट्टा मेरो मुखमा लठ्ठी हिर्काए।’
उनका अनुसार त्यतिबेलासम्म मेलखालीवासीले घर घेरिसकेका थिए। त्यसपछि ‘अरू पनि आउँदैछन्। तेरो छाला निकाल्छु’ भनेर धम्की दिएपछि गणेश भागेका थिए। ‘महिलाहरु समेत भएकाले हातपात गर्न उचित नठानेर म गुहार माग्दै घर तल पुगेर कराएको थिएँ। पछाडिबाट १०–१२ जनाको समूहले लठ्ठी हानेर धकेलेपछि कान्लाबाट तल खसेँ,' उनले भने।
घरपछाडिको भीरबाट धकेलिएका गणेश करिब २० मिटर तल खेसेका थिए। माथिबाट लगातार ढुंगा प्रहार भइरहेको हुँदा उनी रुखको आडमा लुकिरहे। माथि घर अगाडि भने गाउँलेले श्रीमती मीनाकुमारी महरालाई घेरेका थिए।
‘सुरुमा आएर 'तेरा बुढाले गाली गरे' भन्दै ममाथि नै जाइलागे। मैले वडामा जाऔं, प्रहरीमा जाऔं भनेर सम्झाउँदै थिएँ। उताबाट छोराले बुबालाई पिट्यो भनेर कराएपछि म उतै दौडिएँ,’ मीनाले भनिन्, ‘मेरो पछिपछि छोरो पनि आएको थियो। श्रीमानलाई बचाउन गएकी मलाई पनि गाउँलेले ढुंगामुढा प्रहार गर्दै भीरबाट खसालेका थिए। छोरालाई पनि भीरको डिलबाट धकेलिदिए।’
गाउँले गइसकेपछि गणेश हत्तपत्त उठेर जाँदा उनको भाइकी श्रीमती छोरा हिमांशुलाई बेहोस अवस्थामा समातेर रोडमा दगुरिरहेकी थिइन्। घरमा उनकै गाउँका दुई महिला हातमा लठ्ठी बोकेर बसिरहेका थिए। ‘त्यसपछि बेहोस अवस्थामा रहेका छोरा बोकी म एक घण्टा हिँडेर गाडी चल्ने बाटोमा पुगेँ। १० बजे धनगढीको सारथी अस्पतालमा पुर्याएँ,’ उनले भने, ‘राती अस्पतालका डाक्टरले काठमाडौं लैजान भने। तर आफ्नो आर्थिक स्थिति नाजुक भएकाले मैलै हिमांशुलाई काठमाडौं लैजान सकिनँ। २७ गते बिहान ४ बजे छोराले प्राण त्याग्यो।’
मृतक ७ वर्षीय बालकका बुबाआमा दुवै जना अहिले अस्पतालमा उपचाररत छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
