बाढीका कारण जापानमा मृत्यु हुनेको संख्या ५८ पुग्यो

विश्व

नेपाल लाइभ बुधबार, असार २४, २०७७ १५:००

टोकियो- वर्षासँगैको विनाशकारी बाढीका कारण जापानमा मृत्यु भएकाहरुको संख्या कम्तीमा ५८ पुगेको छ।

बाढीले जापानको दक्षिणी क्षेत्रका सयौं बस्ती तथा घरहरु डुबानमा परेको र ठूलो क्षती पुर्‍याएको अधिकारीहरुले बुधबार जानकारी दिएका छन्।

जापानको टेलिभिजन संस्था एनएचकेले प्रसारण गरेको फुटेजमा बाढीबाट प्रभावित क्षेत्रमा बाढीसँगै आएको हिलोले सडकहरू पुरिएका र विद्युत्, सञ्चार, सडकलगायतका सेवामा पनि अवरुद्ध भएको देखाइएको छ।

प्रभावित क्षेत्रका सयौं नागरिकहरुलाई सुरक्षित स्थानतर्फ स्थानान्तरण गरिएको छ भने अरु ३६ लाख मानिसलाई पनि अन्यत्र सार्नुपर्ने सुझाव दिइएको छ। तीमध्ये आधालाई खाली गर्न थालिसकिएको अधिकारीहरुले जनाएका छन्।

जापानमा हरेक वर्ष बाढी, पहिरोमा परेर सयौंको मृत्यु हुने गरेको छ। विशेष गरेर वर्षायामको बेलामा यस्ता घटना धेरै हुने गरेका छन्।