काठमाडौं। भारतको राजधानी दिल्लीमा मतदाता सूचीमा अनियमितता भएको आरोप लगाउँदै प्रदर्शन गर्न पुगेका पूर्वमुख्यमन्त्री अरविन्द केजरीवाल र ममता बनर्जीसहित एक हजारभन्दा बढी प्रदर्शनकारीलाई प्रहरीले हिरासतमा लिएको छ।
जन्तरमन्तरमा प्रदर्शन गर्न जाने क्रममा केजरीवाल र बनर्जीलाई प्रहरीले नियन्त्रणमा लिएको हो। जन्तरमन्तर, कनाट प्लेस र मिन्टो ब्रिजलगायत दिल्लीका विभिन्न स्थानबाट अहिलेसम्म एक हजारभन्दा बढी प्रदर्शनकारीलाई हिरासतमा लिइएको विवरणमा उल्लेख छ।
ककरोच जनता पार्टी (सीजेपी) का संस्थापक अभिजीत दीपकेलाई मुम्बईबाट दिल्ली पुगेको विमानभित्रै प्रहरीले नियन्त्रणमा लिएको थियो। उनीसँगै सीजेपीका नेता सौरभ दास र आशुतोष रांकालाई पनि प्रहरीले हिरासतमा लिएको जनाइएको छ।
हिरासतमा लिनुअघि दीपकेले आफूहरू पक्राउ पर्नकै लागि आएको भन्दै प्रहरीलाई पक्राउ गर्न चुनौती दिएका थिए। उनले भने,‘हामी यहाँ पक्राउ पर्न आएका हौं। आउनुहोस् र हामीलाई पक्राउ गर्नुहोस्।’
युट्युबर ध्रुव राठीलाई पनि बिहान गुरुग्रामको सेक्टर–५६ स्थित घरबाट प्रहरीले हिरासतमा लिएको छ। उनी प्रदर्शनमा सहभागी हुन विदेशबाट आएको विवरणमा उल्लेख छ। यसैगरी, केरलका पूर्वमुख्यमन्त्री पिनराई विजयन, त्रिपुराका पूर्वमुख्यमन्त्री माणिक सरकार र भारतीय कम्युनिस्ट पार्टी (मार्क्सवादी) का सांसद जोन ब्रिटासलाई पनि प्रहरीले नियन्त्रणमा लिएको छ।
दिउँसो करिब १ बजे आकाशवाणी भवननजिकै इम्तियाज अली मार्गमा प्रदर्शनकारीले अवरोध पार गरेर प्रहरीमाथि ढुंगामुढा गरेका थिए। त्यसक्रममा दुई प्रहरी घाइते भएका छन्। प्रदर्शनकारीले प्रहरीद्वारा लगाइएको अवरोधसमेत तोडेपछि प्रहरीले उनीहरूलाई लखेटेर नियन्त्रणमा लिएको थियो। घटनाका क्रममा एक प्रदर्शनकारीको टाउकोमा चोट लागेको भारतीय सञ्चारमाध्यमलले जनाएको छ।
सीजेपीले मतदाता सूचीमा अनियमितता भएको आरोप लगाउँदै भारतका मुख्य निर्वाचन आयुक्त ज्ञानेश कुमारको राजीनामा माग गरेको छ। संस्थाले मतदाता सूचीको विशेष गहन पुनरावलोकन (एसआईआर) प्रक्रिया रोक्नसमेत माग गर्दै प्रदर्शन गरेको हो।
प्रदर्शनमा सहभागी विभिन्न राजनीतिक व्यक्तित्व तथा समर्थकलाई प्रहरीले नियन्त्रणमा लिएपछि दिल्लीका विभिन्न क्षेत्रमा तनावपूर्ण अवस्था सिर्जना भएको समाचारहरूमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
