अफगानिस्तानमा खटिएका अमेरिकी सेना मार्न रुसले पैसा दिएको आरोप

विश्व

नेपाल लाइभ सोमबार, असार १५, २०७७ १०:०१

एजेन्सी-अफगानिस्तानमा तैनाथ अमेरिकी सेनाको हत्या गर्न तालिबानसमर्थित लडाकूलाई पैसा दिएको भन्ने आरोपलाई रुसले अस्वीकार गरेको छ। अमेरिकी अधिकारीलाई उद्दृत गर्दै न्युयोर्क टाइम्स, वासिङ्गटन पोष्ट र वाल स्ट्रीट जर्नलले यस्तो समाचार प्रकाशन गरेका थिए।

रुसी सैन्य गुप्तचर निकायले गत वर्ष यसका लागि पैसा दिएको उनीहरुको समाचारमा जनाइएको छ। यही निकायमाथि युरोपमा आक्रमणको आरोप लागेको थियो। तालिवानले पनि यो आरोप अस्वीकार गरेको छ। उसले रुसी गुप्तचर निकायसँग कुनै सम्झौता नभएको दावी गरेको छ।

अफगानिस्तानमा १९ वर्षदेखि चलिरहेको युद्धपछि अमेरिका शान्ति सम्झौता गर्ने प्रयासमा रहेका बेला यस्तो समाचार सार्वजनिक भएको छ । न्युयोर्क टाइम्सले एक अज्ञात अधिकारीलाई उल्लेख गर्दै लेखेको छ–रुसको जीआरयु सैन्य गुप्तचर निकायको एक युनिटले आफ्ना विरोधीमा अस्थिरता फैलाउन गठबन्धन सेनामाथि लुकेर आक्रमण गर्न पैसा दिएको भनेर अमेरिकी गुप्तचर निकायले महिनौंअघि पत्ता लगाएको थियो।

पत्रिकाका अनुसार इस्लामिक आतंकवादी या उनीहरुसँग जोडिएका आपराधिक तत्वले यसरी पैसा लिने कार्यमा संलग्न थिए। अमेरिकी राष्ट्रपति डोनाल्ड ट्रम्पले यसबारेमा आफूलाई थाहा नभएको बताएका छन्। तर न्युयोर्क टाइम्सले यस बारेमा ट्रम्पलाई मार्चमै जानकारी गराएको बताइएको छ। अमेरिकास्थित रुसी दूतावासले यसलाई फेक न्यूज भनेर खण्डन गरेको छ।

२०१९मा अफगानिस्तानमा २० अमेरिकी सैनिकको मृत्यु भएको थियो। रुसको जीआरयू एजेन्सीमाथि मार्च २०१८ मा बेलायतको सेलिसबरीमा रुसका डवल एजेन्ट सर्गेई स्क्रिपल र उनकी छोरी युलियाको हत्या गर्ने प्रयास गरेको आरोप लागेको थियो ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।