फिचर

लिभरपुलको उपाधि : विश्वासमा बदलियो शंका

ऋग्वेद शर्मा शुक्रबार, असार १२, २०७७ १३:३५

काठमाडौं- सन् २०१५ को अक्टोवर ८ मा लिभरपुलको प्रशिक्षक नियुक्त हुँदा योर्गेन क्लोपले भनेका थिए- ‘हामीले शंका गर्नेहरुलाई विश्वास गर्न सक्ने बनाउनुछ।’ अहिले झण्डै पाँच वर्षको समयमा क्लोप र उनको प्रशिक्षणमा रहेको लिभरपुलमाथि कसैलाई शंका छैन, लिभरपुल विश्व फुटबलको उत्कृष्ट टिम हो।

३० वर्षअघि लिभरपुलले लिग उपाधि जितेको थियो भन्दा हुने खल्लो महसुस समर्थकलाई अब हुने छैन। आधुनिक फुटबलको मैदानमा नै लिभरपुलले आफ्नो उच्च छबि निर्माण गरिसकेको छ। गएको वर्ष च्याम्पियन्स लिग र यो वर्ष प्रिमियर लिग उपाधि जितेर।

लिभरपुलले सन् १९८९-९० को सिजनपछि लिगको उपाधि जित्न सकेको थिएन। प्रिमियर लिगमा कमजोर बनिरहेको लिभरपुललाई ३० वर्षसम्मको उपाधिको भोक ठूलो थियो। यसैले यो सिजन क्लोपको विशेष ध्यान प्रिमियर लिगमा देखियो। आधुनिक फुटबलमा उपाधिबाट टाढा रहँदा पनि लिभरपुल २००२, २००९, २०१४ र गएको सिजन २०१९ मा दोस्रो स्थानमा थियो।

यो सिजन क्रिष्टल प्यालेसलाई ४-० ले हराएको पछिल्लो खेलपछि लिभरपुललाई उपाधिका लागि दुई अंक आवश्यक थियो। बिहीबार राति दोस्रो स्थानमा रहेको म्यानचेस्टर सिटीलाई चेल्सीले हराइदिएपछि लिभरपुलले उपाधि पाएको हो। लिगमा ७ खेल बाँकी रहँदा लिभरपुल २३ अंकले अघि भइसकेको छ।

यसैले कोरोना भाइरस (कोभिड १९) को जोखिमका कारण घरै बस्नु पर्ने आग्रह नमानेरै हजारौँ समर्थक एन्फिल्डमा जम्मा भए। खुसी साटे। चेल्सी र म्यानचेस्टर सिटीको खेल सँगै बसेर हेरिरहेका एलिसन, भर्जिल भ्यान डाइक, एलेक्स सबैले एकसाथ उत्सव मनाए। प्रशिक्षक क्लोपले पहिलो प्रतिक्रिया दिए- ‘मसँग कुनै शब्द नै छैन।’

विश्वभर छरिएका लिभरपुल समर्थकले सामाजिक सञ्जाल मार्फत नै खुसी साटासाट गरे। नेपाली राष्ट्रिय क्रिकेट टिमका पूर्वकप्तान पारस खड्काले जस्तै। सामाजिक सञ्जालमा खुसी छर्दै पारसले लेखेका छन्- ‘३० वर्षको प्रतिक्षा पूरा भयो।’ त्यसको केही समयमा दशरथ रंगशालाअघि उभिएर लिभरपुलको जर्सीसहितको तस्बिरमा पारस देखिए।

कोरोना माहामारीका कारण फुटबल जगतमा सबैभन्दा ठूलो पीडा कसैलाई थियो भने त्यो लिभरपुल समर्थकलाई हुनुपर्छ। लिग कसरी सकिन्छ भन्ने दुविधा ठूलो थियो। सिजन यत्तिकै सकिँदा लिभरपुलको लगभग पक्का भएको उपाधिमा पीडा ठूलो हुने थियो। धन्न प्रिमियर लिग फर्कियो र सँगै लिभरपुलको उपाधि।

समर्थकहरु खुसीयाली मनाउन आफूखुसी जम्मा भए पनि लिभरपुलले यो उपाधिको खुसी समर्थकसँग खुलेर मनाउन अझै समय लाग्नेछ। प्रशिक्षक क्लोप पनि जहिले कोरोना भाइरसपछिको सामान्य अवस्था हुनेछ तब ठूलो मात्रामा भेटघाट र र्‍याली गरिने बताउँछन्। अहिलेको बन्द रंगशालामा यो पर्खाइको जितको उत्सव हुन सक्दैन नै।

सन् १८९२ देखि १९९२ सम्म इंग्ल्याण्डको माथिल्लो डिभिजनलाई ‘फुटबल लिग फस्ट डिभिजन’ का नामले चिनिन्थ्यो। जसमा १९००-०१ मा लिभरपुलले पहिलो उपाधि जितेको थियो। त्यसपछि १९०५-०६, १९२१-२२, १९२२-२३ लिग जित्यो। १९३९ देखि दोस्रो विश्वयुद्धका कारण रोकिएको लिग १९४६-४७ को सिजनमा हुँदा उपाधि लिभरपुलले नै जितेको थियो।

त्यसपछि भने लिभरपुलले उपाधि जित्न १७ वर्ष पर्खनुपर्‍यो। १९६३-६४ को सिजनमा र त्यसपछि १९६५-६६, १९७२-७३ मा उपाधि जितेको लिभरपुलले त्यसपछिको लामो समय एकछत्र राज गरेजस्तो भयो। १९७५-७६, १९७६-७७, १९७८-७९, १९७९-८०, १९८१-८२, १९८२-८३, १९८३-८४, १९८५-८६, १९८७-८८ हुँदै १९८९-९० मा लिभरपुलले १८ पटक उपाधि जितिसकेको थियो।

फुटबलको स्वर्ण युगमा चलिरहेको लिभरपुलको लागि १९९२ मा प्रिमियर लिगकै सुरुवातपछि अहिलेसम्म उपाधि जित्न नसक्नु ठूलो दुःखको विषय थियो। हुन पनि १९७३ देखि १९९० सम्ममा नै ११ पटक उपाधि जितेको लिभरपुलको यो पर्खाइ सोचेभन्दा निकै लामो हो।

सात खेल बाँकी रहँदैको उपाधि प्रिमियर लिगमा कीर्तिमान नै हो। बाँकी रहेका खेललाई हेर्दा लिभरपुलले अझै केही कीर्तिमान बनाउन सक्ने ठाउँ बाँकी नै छ। सिजनमा सर्वाधिक धेरै खेलमा जित, घरेलु मैदानमा सर्वाधिक जित, अवे मैदानमा सर्वाधिक जित र दोस्रो स्थानको क्लबसँगको ठूलो अन्तर जस्ता कीर्तिमान बनाउन बाटो खुला छ।

यो सबैका पछाडि एक विशेष पात्र छन्- प्रशिक्षक योर्गेन क्लोप। जसले प्रिमियर लिगको दशौँ स्थानमा रहेको क्लबलाई उपाधि जिताउने यात्रा गराए। २०१५ को अक्टोवरमा ब्रेन्डान रोजर्सलाई हटाएर क्लोप प्रशिक्षकका रुपमा आउँदा लिभरपुल लिगको दशौँ स्थानमा थियो। जसपछि क्लोपले आफ्नो ‘हेभ्भी मेटल फुटबल’ शैलीलाई अझ उचाइ दिए।

लिभरपुलको चार सिजनमा दुई पटक चौथो, एक पटक दोस्रो स्थानमा रहँदै क्लोपले यो सिजन त उपाधि नै जिताए। जसमा क्लोपले मोहम्मद सलाह र सडियो माने जस्ता खेलाडीलाई आफ्नो योजना अनुरुप प्रयोग गर्न सक्ने ठूलो गुण देखाए।

क्लोपको समयअघि आएका रोबर्टो फर्मिनोमाथिको उनको विश्वास र योजना पनि विशेष देखियो। तीन सिजनभन्दा कम समयमा ती तीन खेलाडीले २ सय ११ गोल गरेका छन्। जसमा सलाहको ९२, मानेको ६५ र फर्मिनोको ५४ गोल छ। गोलबाहेक पनि गोलकिपर एलिसन र सेन्टर ब्याक भर्जिल भ्यान डाइकको शैलीलाई नदेख्न मिल्दैन। त्यसबाहेक पनि फेरिएका जोर्डन हेन्डरसन र युवा खेलाडी एलेक्जेण्डर आर्नोल्ड त छँदैछन्।

त्यो सबैका पछाडि क्लोपको उत्कृष्ट योजना। हुन पनि उनी आफ्नै खेलाडीहरुसँग शतप्रशित हुन्छन्, सँगै शतप्रतिशत बाँच्छन्। योजना बनाउँछन् र त्यसको कार्यान्वयन गर्छन्। निर्णय लिन्छन् र पूरा गर्छन्। समयको ख्याल गर्छन् र सबैलाई समय अनुसार नै चलाउँछन्। यसैले उनी सच्चा नेतृत्वकर्ता देखिएका छन्। यसैले त क्लब आएकै दिन उनले भने जस्तै अहिले विश्वासमा बदलिएको छ शंका।