अटो

लकडाउनपछि अवसर बन्दै मोटरसाइकल बिक्री

सामाजिक दुरी कामय गर्नुपर्ने भएकाले निजी सवारीको बिक्री बढ्ने अपेक्षा

शिव बोहरा मंगलबार, असार ९, २०७७ १६:१९

काठमाडौं- लकडाउनपछि सहज हुँदै गएको जीवनशैलीमा सामाजिक दुरी कायम गर्नुपर्ने अवस्था भएकाले निजी सवारीको प्रयोग बढ्ने अपेक्षा व्यवसायीहरूले गरेका छन्। बजारमा चहलपहल बढ्न थालेपनि तत्काल सार्वजनिक यातायात सञ्चालन हुने अवस्था देखिएको छैन भने संचालन भएकै अवस्थामा पनि कोरोना भाइरसको संक्रमण हुने त्रासका कारण सार्वजनिक यातायातको प्रयोग कमै हुने अवस्था देखिन्छ। अतः निजी सवारीसाधन नै उपयुक्त विकल्प बन्ने अनुमान धेरैको छ।

दुईपांग्रे सवारी बिक्रेताहरुले लकडाउन खुकुलो भएसँगै विभिन्न स्किम, उपहार योजना र फाइनान्सको सुविधाका योजना ल्याउन थालेका छन्। लकडाउन पूरा खुलेपछिबाट उपभोक्तासँग नगद कम भएको अवस्थामा सवारी बिक्रेता कम्पनीले नगद छुट, सहुलियत दरको ब्याज तथा किस्ता तिर्न सक्ने व्यवस्था गर्दै निजी सवारीको उपभोगलाई प्रोत्साहन गर्न थालेका छन्।

मोटरसाइकल कम्पनीहरू बजाज, टिभिएस, यामाहा, सुजुकी, होन्डा, हिरोलगायतले छुटको आकर्षक योजना सार्वजनिक गरिरहेका छन्। कम्पनीहरुले शून्य प्रतिशत डाउन पेमेन्टदेखि शून्य प्रतिशत ब्याजदरमै मोटरसाइकल उपलब्ध गराउने योजना ल्याएका हुन्। यो अफरसँगै धेरैजसो कम्पनीले नगद छुटको योजना पनि सार्वजनिक गरेका छन्।

कोरोना संक्रमणबाट जोगिन सामाजिक दुरी कायम गर्नुपर्ने भएपछि सार्वजनिक सवारीको साटो निजी सवारीको प्रयोग बढ्ने अपेक्षा दुईपांग्रे सवारी बिक्रेताहरुले गरेका छन्। तत्काल सार्वजनिक सवारी सञ्चालनमा आइहाल्ने अवस्था नरहेको र सामाजिक दुरी कायम गर्नुपर्ने अवस्था भएकाले कामकाजीहरुले दुईपांग्रे सवारी खरिद गर्ने अपेक्षा व्यवसायीको छ। चारपांग्रे सवारी तुलनात्मक रुपमा महँगो भएकाले निजी सवारी प्रयोग गर्न चाहने धेरैको रोजाइमा दुईपांग्रे सवारी नै पर्ने बिक्रेताहरुको अनुमान छ।

समग्र रुपमा पोस्ट लकडाउनको अवस्थामा मोटरसाइकल तथा स्कुटरको बजार सकारात्मक हुने देखिएको नेपालका लागि टिभिएसको आधिकारिक बिक्रेता जगदम्बा मोटर्सका उपाध्यक्ष दीपक अग्रवालले बताए। ‘स्कुटर र सस्तो सेगमेन्टका मोटरसाइकलको माग बढी छ,’ उनले भने, 'अधिकांशको चासो फाइनान्समा रहेको पाएका छौं। यसले केही समस्या ल्याउन सक्छ। यद्यपि बजार चलायमान हुने अपेक्षा गरेका छौं।’ सार्वजनिक सवारी चलाएपनि सोसल डिस्टेन्सिङ कायम गर्ने कुरामा दुईपांग्रेलाई नै रोज्ने देखिएको उनको भनाइ छ।

लकडाउन आंशिक रुपमा मात्र खुलेकाले बजारको अवस्था कस्तो हुन्छ भन्ने यकिन गरेर भन्न सकिने अवस्था आइनसकेको एमएडब्लू टु ह्विलर डिभिजनका मार्केटिङ प्रमुख विक्रम पौडेलले बताए। ‘अवस्था अन्यौल नै छ। हामी सकारात्मक हुनु नै पर्छ,’ उनले भने, ‘चारपांग्रे सवारी महँगो भएकाले दुईपांग्रे तर्फ नै उपभोक्ता आकर्षित हुने देखिन्छ।’ तर आम मानिसमा लामो समयको लकडाउनले नगद अभाव भएकाले बजार धेरै नै उत्साहित हुन्छ जस्तो नलागेको पौडेलले बताए।

‘काम गर्नु पर्ने र सुरक्षित हुनुपर्ने नै छ मानिसहरुलाई। सार्वजनिक सवारीलाई प्राथमिकता कम दिने देखिन्छ,’ पौडेलले भने, ‘यो अवस्थामा दुईपांग्रेको बिक्री बढ्ने अनुमान गर्न सकिन्छ।’ दुईपांग्रे सवारीमा पनि सेगमेन्टमा अनुसार बढ्ने अनुमान छ। यसमा स्कुटर र सस्तो सेगमेन्टका मोटरसाइकलको बिक्री बढ्ने अनुमान गरिएको उनले बताए।

संसारभर नै समस्या भएकाले तरलता अभाव हुने अवस्था छ। समग्रमा बजार बढ्ने नदेखिएपछि केही सकारात्मक प्रभाव पर्छ भन्न सकिने पौडेलले उल्लेख गरे। त्यस्तै बजाजका मोटरसाइकल खरिद गर्न चाहनेका लागि विभिन्न स्किम ल्याएको बजाजको नेपालका लागि आधिकारिक बिक्रेता हंसराज हुलासचन्द एन्ड कम्पनीकी एजिएम पुनम सिंहले बताइन्।

‘अन्तर्राष्ट्रिय बजारले जस्तै हामीले पनि कोरोना महामारीको संक्रमण न्यूनीकरण गर्न लकडाउन सहज बनाउँदै गएपछि दुईपांग्रे सवारीको बजार सकारात्मक हुने नै अपेक्षा गरेका छौं,’ उनले भनिन्, ‘लकडाउन पुरा खुलेपछि बजारको अवस्था विश्लेषण गर्न सकिन्छ।’ सार्वजनिक सवारी संक्रमणको जोखिम धेरै हुने स्थान भएकाले पनि मानिसहरुले निजी सवारीलाई प्राथमिकता दिने उनको भनाइ छ। निजी सवारी खरिदका लागि बजेट धेरै चाहिने भएकाले दुईपांग्रे सवारी नै रोजाइमा पर्छ भन्न सकिने सिंहले बताइन्।

कोभिड-१९ को परिस्थितिका बीच सरकारले केही सहज बनाउँदै लगेको सार्वजनिक सवारी नचलेको र चलेपनि जोखिम बढ्ने भएकाले मोटरसाइकल नै उपभोक्ताको रोजाइमा पर्ने सुजुकी मोटरसाइकलको नेपालका लागि आधिकारिक बिक्रेता भिजी सुजुकीका मार्केटिङ हेड समित सिंहले बताए। ‘सार्वजनिक सवारी चलेको पनि छैन, र तत्काल चल्ने पनि देखिँदैन,’ उनले भने, ‘यस्तो अवस्थामा संक्रमणबाट बच्दै कामकाजमा जान मानिसहरुमा निजी सवारी चाहिन्छ भन्ने देखिएको छ।’

भिजी सुजुकीले मोटरसाइकल तथा स्कुटरको खरिदमा १५ हजार डिस्काउन्ट, पुराना मोटरसाइकलमा पनि त्यसको मूल्यांकन र १५ हजार छुट दिने व्यवस्था गरेको छ। त्यस्तै फाइनान्समा समेत १५ हजार छुट हुने व्यवस्था गरेको जनाएको छ। टिभिएसको मोटरसाइकल किन्दा १२ हजार रुपैयाँ र स्कुटरमा १० हजार रुपैयाँ नगद छुट दिएको छ। यससँगै शून्य फाइनान्समा मोटरसाइकल र स्कुटर किन्ने अफर पनि ल्याएको छ। अहिले डाउनपेमेन्ट मात्र गरेर मोटरसाइकल र स्कुटर किनेका ग्राहकले ६ महिनापछि मात्र बाँकी किस्ता तिर्न सक्ने व्यवस्था टिभिएसले गरेको छ।

बजाजका मोटरसाइकलको खरिदमा १२ हजार छुट, २० प्रतिशत डाउन पेमेन्ट र ५० प्रतिशत डाउन पेमेन्ट गरे पुग्ने व्यवस्था गरिएको छ। शून्य प्रतिशत ब्याजदरमा ५० प्रतिशत डाउन पेमेन्ट गरेर बजाजको मोटरसाइकल खरिद गर्न सक्नेछन्। त्यस्तै बजाजले कोरोना विरुद्ध फ्रन्टलाइनमा काम गर्नेका लागि विशेष छुटको व्यवस्था समेत गरेको जनाएको छ।

होन्डाका मोटरसाइकल एक रुपैयाँको डाउनपेमेन्टमा खरिद गर्न सकिने योजना आधिकारिक बिक्रेता स्याकर ट्रेडिङ कम्पनीले सार्वजनिक गरेको छ। कम्पनीका अनुसार ग्राहकले एक प्रतिशत ब्याजदरमा होण्डा मोटरसाइकल किन्न सक्नेछन्।

यसैगरी यामाहा मोटरसाइकलको अधिकृत बिक्रेता एमएडब्लू इन्टरप्राइजेजले ‘असहज परिस्थिति सहज समाधान’ नारासहित फाइनान्सतर्फ विशेष योजना सार्वजनिक गरेको छ। शून्य ब्याजदरमा शून्य प्रतिशत डाउनपेमेन्टमा मोटरसाइकल खरिद गर्न सकिने अफर ल्याएको छ। कम्पनीका अनुसार ग्राहकले यामाहाको मोटरसाइकल खरिद गर्दा १० हजार रुपैयाँको छुट पाउन सक्नेछन्।

नेपाली बजारमा बजाज, होन्डा, यामाहा, हिरो, टिभिएस, सुजुकीसहित रोष्ल इनफिल्ड, भेस्पा अप्रिलिया, केटिएम, बेनेलीजस्ता विभिन्न महँगा ब्रान्डका मोटरसाइकल समेत बिक्री हुँदै आएका छन्। कोभिडपछिको अवस्थामा १ सय ५० सिसीसम्मका मोटरसाइकल र स्कुटरको बिक्री बढ्ने व्यवसायीहरूको अनुमान छ।