काठमाडौं– अधिकांश फिल्ममा एकसाथ काम गरेका पल शाह र आँचल शर्मा मंगलबार ललितपुरमा सँगै देखिए। सन्दर्भ थियो, ‘स्नेही काख’ नामक संस्थाका लागि सहयोग हस्तान्तरण कार्यक्रम।
फिल्मी पर्दामा रोमान्टिक भावमा प्रस्तुत हुने यो जोडीबीच वास्तविक जीवनमा कस्तो सम्बन्ध छ त? आम दर्शकमा रहे जस्तै प्रश्न पंक्तिकारमा पनि थियो।
संस्थाको परिसरमा जब उनीहरुको भेट भयो, दुईबीचको औपचारिकता मुस्कान साटासाटमै सकियो।
सडकमा अलपत्र परेका मानसिक रोगीहरुको उद्धारमा ८ वर्षदेखि क्रियाशील ‘स्नेही काख’मा आँचल केही महिनाअघि आफ्नो जन्मदिनमा पुगेकी थिइन्। त्यो समयदेखि उनी त्यहाँ आश्रय लिइरहेकाहरुका लागि वरदान नै बनिन्।
संस्थाका लागि उनले व्यक्तिगत खर्च त गरेकी थिइनन्, तर उनको प्रचारपछि संस्थाले धेरै सहयोगी हातहरु पायो। त्यसै कारण आँचल र संस्थाबीच आत्मीय सम्बन्ध गाँसिएको रहेछ। संस्थामा रहेका असहायहरु आँचल–आँचल भन्दै रमाइरहेका थिए। पहिलो पटक गएका पल भने आफ्नो परिचय दिन र असहायहरुका क्रियाकलाप नियाल्दै थिए।
पल र आँचल विभिन्न व्यक्तिले उक्त संस्थालाई पठाएको पैसा हस्तान्तरण गर्न गएका थिए। यही सन्दर्भ उनीहरुको व्यक्तिगत र पेशागत विचार नजिकबाट बुझ्ने अवसर बनेको थियो।
पल र आँचल युवा पुस्ताका दर्शकमाझ लोकप्रिय छन्। स्क्रिनमा मात्र नभई वास्तविक जीवनमै उनीहरुको जोडी बनेको हेर्न चाहनेहरु उत्तिकै छन्। तर, यो विषयबाट उनीहरु टाढै बस्न रुचाउने रहेछन्।
मिडियामा आउने गसिप र सम्बन्धबारेका प्रश्नले गलेको यो जोडी फिल्म ‘शत्रुगते’को रिलिजपछि मिडियाबाट अलि टाढै छन्। भन्छन्, ‘हाम्रो प्रगाढ मित्रतालाई धेरैले शंकालु नजरले प्रश्न गर्छन्। त्यही भएर मिडियामा कम आउने चाहना हो।’
गसिप रोक्ने जुक्ति?
करिअरको सुरुवाती चरणमा म्युजिक भिडियोबाट लोकप्रिय बनेक पलका लागि फिल्मभन्दा बढी म्युजिक भिडियोकै प्रस्ताव आउँदा रहेछन्। अझ आँचलसँगै अभिनय गर्न भनेर कति हो कति! यसबाट पल हैरान छन्। भन्छन्, ‘जस्तो पायो त्यस्तो भिडियोमा अभिनय गर्ने हो भने त दिनको एउटा टुट्दैन।’
आँचल पनि पलको कुरामा सहमत छिन्। उनी भन्छिन्, ‘अफर आएजति अभिनय गर्ने हो भने हाम्रो अस्तित्व के हुन्छ होला!’
निकै छानेर मात्र म्युजिक भिडियो गर्ने उनीहरुको साझा चाहना देखियो। यसले उनीहरुलाई पहिले म्युजिक भिडियोमा एकसाथ बारम्बार देखिँदा लागेको बात पनि अब मेट्ला कि !
‘शत्रुगते’मा छायामा परेको जोडी
पछिल्लो समय पल र आँचल फिल्म ‘शत्रुगते’मा सुरज र सन्ध्याको भूमिकामा देखिएका थिए। चैत ९ देखि प्रदर्शनमा आएको फिल्म चौथो सातामा निरन्तर चलिरहेको छ। यो सफलताले कलाकारसँगै सिंगो फिल्म युनिट नै रमाइरहँदा यो जोडी भने फिल्ममा खासै नोटिस्ड भएन। केही समीक्षक र दर्शकबाट फिल्ममा यो जोडी अन्य कलाकारको छायामा परेको भन्ने विश्लेषण आयो।
यो प्रसंगमा उनीहरुले बजारमा यस्ता विषयको चर्चा चले पनि आफूहरुको करिअरलाई कुनै असर नगर्ने बताए। ‘फिल्ममा आफूले पाएको भूमिकालाई कसरी निर्वाह गरेको छ भन्ने प्रश्न महत्वपूर्ण हुन्छ’, उनीहरुको एकै स्वर छ’, ‘शत्रुगतेमा हामीले पाएको भूमिकालाई उत्कृष्ट रुपमा निर्वाह गरेकाले छायामा परेको भन्ने कारण नै छैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
