फुटबल

सर्वोच्चको फैसलापछि सन्दीप राई भन्छन्- फिफामा लड्न बाटो खुल्यो

सराेज तामाङ मंगलबार, असार २, २०७७ १७:५३

काठमाडौं- २०७२ साल असोजमा खेल मिलेमतो (म्याच फिक्सिङ) को आरोपमा पक्राउ परेका सन्दीप राईले अब अन्तर्राष्ट्रिय फुटबल महासंघ (फिफा) मा लड्ने बाटो खुलेको बताएका छन्। खेल मिलेमतोको आरोपमा पक्राउ परेसँगै उनीहरुलाई एसियाली फुटबल महासंघ (एएफसी) ले आजीवन प्रतिबन्धमा पारेको थियो।

मंगलबार सन्दीप र पूर्वकप्तान सागर थापासहित ६ जना खेलाडीले राज्यविरुद्धको अपराधको मुद्दामा सर्वोच्चबाट सफाइ पाएका हुन्। यसअघि विशेष अदालतबाट सफाइ पाएका उनीहरुले सर्वोच्चले पनि सफाइ दिएको हो।

मंगलबार न्यायाधिश आनन्दमोहन भट्टराई र बमकुमार श्रेष्ठको इजलाशले यसअघि विशेष अदालतले गरेको फैसलालाई नै सदर गरेपछि सागर थापा, सन्दीप राई, रितेश थापा, विकाससिंह क्षेत्री, प्रशिक्षक तथा पूर्वखेलाडी अन्जन केसी र फिजियोथेरापिस्ट डेजिव थापाले सफाइ पाएका हुन्।

सफाइ पाएपछि सन्दीप राईले न्याय पाएको अनुभूति भएको भन्दै प्रहरीले जबरजस्ती मुद्दा चलाएको बताए। ‘एन्फालाई हेर्न नदिएर हामीले यो झुटो हो भन्दा भन्दै पनि प्रहरीले राज्यविरुद्धको अपराध मुद्दा लगाएर अदालतमा पेश गरेको थियो। उनले थपे, ‘हामी त सुरुबाटै विश्वस्त थियौं कि मुद्दा हामी नै जित्छौं।’

यो पनि पढ्नुहोस्

सर्वोच्चबाट सफाइ पाएपछि सागर थापा भन्छन् - मेरो ६ वर्ष कसले फिर्ता गर्छ?मंगलबार, असार २, २०७७

२०७२ साल कात्तिक २२ गते प्रहरीले विशेष अदालतमा म्याच फिक्सिङको आरोपमा राज्यविरुद्धको अपराधका रुपमा मुद्दा चलाएको थियो। विशेष अदालतले २०७५ जेठ २४ गते सागरसहित ६ जना निर्दोष रहेको भन्दै राज्यविरुद्धको अपराध मुद्दामा सफाइ दिएको थियो। तर सरकारी पक्षले फेरी सर्वोच्चमा मुद्दा दिएको थियो।

सन्दीपले विशेष अदालतमा लामो समय लागेको बताए। खुशी हुँदै सन्दीपले भने, ‘विशेष अदालतले पनि सबै कुराहरु हेरेर फैसला गरेको थियो। सर्वोच्च अदालतले पनि सबै कुरा हेरेर विशेष अदालतको फैसलालाई सदर गरिदिएको छ। हामी एकदमै खुशी छौं।’

यसले उनको आत्मविश्वास पनि बढ्यो। लागेका कालो दागहरु पनि मेटिँदै छ भन्ने देखियो। खेलुन्जेल दर्शकका हिरो सन्दीपमाथिको कालो बादल हट्दै छ। अहिले उनको मन फुरुंग छ। सन्दीपलाई अब फिफाबाट पनि सफाइ पाउने विश्वास बढेको छ।

‘अब चाहिँ हाम्रो बाटो भनेको एन्फालाई बाटो बनाएर फिफामा लड्नका लागि बाटो खुलेको छ। क्षतिपूर्तिभन्दा पनि अबको हाम्रो लक्ष्य भनेको लाइफटाइम प्रतिबन्ध विरुद्ध फिफामा लड्नु हो’, सन्दीपले भने।

अहिलेको अवस्थामा आफूहरुमाथि लागेको कालो दाग हटाउनु नै ठूलो कुरा भएको सन्दीपले भने। जिन्दगीभर फुटबलमै रमाएका सन्दीप फुटबलबाट टाढा हुन नसक्ने बताउँछन्। सन्दीपलाई अझै आजीवन प्रतिबन्धबाट उन्मुक्ति पाउँदै फुटबलमै फर्किने इच्छा छ। भन्छन्, ‘फुटबलकै अन्य पक्षमा जोडिएर रहन सक्छौं। फुटबल प्रतिबन्धबाट हटेपछि एकेडेमी सञ्चालनदेखि प्रशिक्षक, व्यवस्थापक हरेक कुरामा जोडिन सक्छौं।’