काठमाडौं- ‘आज धेरै खुशी भएको छु, सबै संक्रमितहरूले कोराना जितेर घर फर्केका छन्’ नरैनापुर गाउँपालिका अध्यक्ष इश्तियाक मोहमद शाहले भने‚ ‘अब १३० जनाको रिर्पोट आउन बाँकी छ उहाँहरूको पनि नेगेटिभ आइदिए हुन्थ्यो।’
गाउँपालिकाको क्वारेनटाइनमा हालै मुम्बईबाट आएका एकजना मात्र रहेको उनले बताए। केही दिनअघि क्वारेनटाइनमा रहेका सबैको स्वाब संकलन गरेर पठाएकोले आज भोलीतिरै रिर्पोट आउने उनले बताए ।
कुनै समय नरैनापुर देशभरी चर्चामा रहेको थियो। एकै समयमा देशभरिकै धेरै संक्रमित देखा परेपछि उक्त क्षेत्र चर्चामा आएको थियो। बाँके जिल्लाको नरैनापुरमा एक जनाले संक्रमणका कारण ज्यान पनि गुमाए। नरैनापुरको क्वारेनटाइनमा बसेका युवाले उपचार नपाएर ज्यान गुमाएपछि यो क्षेत्र चर्चामा आएको थियो।
अध्यक्ष शाहले कोरोना संक्रमितको संख्या देखेर अत्तालिँदै प्रधानमन्त्रीलाई समेत गुहारेका थिए। उनको आग्रहपछि सेना समेत परिचालन गरिएको थियो। सेना परिचालन भएपछि उक्त क्षेत्रका मानिसहरू क्वारेनटाइनबाट भाग्न छाडेका थिए। सुरुमा उक्त क्षेत्रका मानिसहरू क्वारेनटाइनबाट भाग्न थालेपछि समुदायमा फैलने त्रास फैलिएको थियो। उक्त गाउँपालिकामा १ सय १४ जनासम्म संक्रमित पुगेका थिए।
‘सबै ११४ जना नै कोरोना जितेर घर फर्केका छन्’ गाउँपालिका अध्यक्ष शाहले भने‚ ‘तपाईंलाई पनि धन्यवाद छ‚ मलाई पनि‚ जनतालाई पनि।’ नरैनापुरका गाउँपालिकाका अध्यक्ष शाहले प्रधानमन्त्री केपी शर्मा ओलीलाई पत्र पठाएको भोलिपल्ट सेना परिचालन गर्ने निर्णय भएको थियो।
बाँकेको भैरवप्रसाद दल गणबाट सेना गाउँमा गस्तीका लागि पुगेको थियो। बाँके जिल्लाकै सबैभन्दा धेरै संक्रमित रहेका उक्त क्षेत्रका मानिसहरू क्वारेनटाइनबाटै भाग्न थालेपछि गाउँपालिका अध्यक्ष शाहले संघ र प्रदेशलाई गुहारेका थिए।
यो नेपाल–भारत सिमाक्षेत्रसँगै जोडिएको गाउँपालिका हो। नेपालगन्जबाट करिब ३५ किलोमिटर पूर्वी–दक्षिणमा रहेको नरैनापुरमा मधेसी समुदायको बसोबास छ। कुनै समयमा नेपाली रुपैयाँ समेत नचल्ने यहाँका अधिकांश व्यक्ति कृषि पेशामा निर्भर छन्। शिक्षा र स्वास्थ्यमा धेरै पछाडि परेका यहाँका प्रायः युवा वैदेशिक रोजगारीका लागि भारत जाने गर्छन्। यही रोजगारीका कारण अहिले नरैनापुर कोरोनाको हटस्पट बनेको थियो।
सीमापारी आएर रोकिएका ८ सय युवालाई गाउँपालिकाले वैशाख अन्तिम साता उद्धार गरेर ल्याएको थियो। गाउँपालिकाले निर्माण गरेको क्वारेन्टाइनमा उनीहरूलाई राखियो र परीक्षण सुरु गरियो। कोरोना भाइरस प्रभावित क्षेत्र भारतको मुम्बईलगायत स्थानबाट फर्केर आएका व्यक्तिको क्वारेन्टाइनमै स्वाब परीक्षण गर्दा जेठ २ गते पहिलो पटक नै ८ जनामा कोरोना संक्रमण पुष्टि भयो।
त्यसलगत्तै क्वारेन्टाइनमै बसेको अवस्थामा नरैनापुर गाउँपालिका- ५ का २४ वर्षीय युवकको कोरोना संक्रमणबाटै मृत्यु भएको थियो।
एम्बुलेन्सले बोक्न नमान्दा समयमा उनलाई अस्पताल पुर्याउन नसकेपछि उनको ज्यान गएको थियो। उक्त घटनापछि नरैनापुरमा झन् डरलाग्दो अवस्था सिर्जना भएको थियो।
‘पहिलो पटक ८ जनामा देखिएको संक्रमण दोस्रो ४७, तेस्रो पटक १२ हुँदै १ सय १८ जनामा देखिएको थियो’ गाउँपालिका अध्यक्ष शाहले भने ‘कोरोनाबाट एक जना युवाको मृत्युसमेत भयो। चौतर्फी त्रासपूर्ण माहोलको सृजना भयो। संक्रमित भेटिएकाहरूलाई आइसोलशन अस्पताल लैजान लाग्दा कैयौं पटक तनाव भोगे तर सफल भए।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1765273665.jpg)
-1763721444.png)
