कोरोना अपडेट

हटस्पट नरैनापुर : गाउँपालिका अध्यक्ष भन्छन्- सेना आए, अब डाक्टर र बिजुली पठाइदेऊ

दुर्गा दुलाल सोमबार, जेठ १२, २०७७ ११:०१

काठमाडौं- सोमबार बिहान फोनमा कुराकानी गर्दा बाँके, नरैनापुर गाउँपालिकाका अध्यक्ष इस्तियाक अहमद शाह केही प्रफुल्ल थिए। इद मनाउने तयारीमा व्यस्त रहेका शाह शुक्रबारसम्म भने निकै त्रसित देखिन्थे।

कोरोना भाइरसको संक्रमणले भयावह रुप दिन थालेको र क्वारेनटाइनमा रहेका मानिसहरु भागेर समुदायमा जान थालेपछि उनी त्रसित भएका थिए। क्वारेनटाइन र अस्पतालमा सीमित रहेको कोरोना संक्रमण गाउँगाउँमा पुग्ने अवस्था आउन लागेपछि उनी निकै डराएका थिए। यही डरका कारण उनले प्रधानमन्त्री कार्यालयदेखि प्रदेश सरकारसम्मलाई गुहारेका थिए।

सोमबार उनको अवस्था परिर्वतन भएको थियो। उनी खुसी हुँदै गाउँमा सरकारको उपस्थिति वृद्धि भएको सुनाइरहेका थिए। ‘नेपालगञ्जबाट सेनाको टोली आएको छ, अब छिट्टै अन्य सहयोग पनि आउने आश लागेको छ,’ अध्यक्ष शाहले टेलिफोनमा भने, ‘अब चाहिँ यहाँका जनतालाई बचाउन सकिएला भन्ने लागेको छ।’ तर, नरैनापुरका लागि अझै धेरै चिजको आवश्यकता रहेको उनले सुनाए।

‘सरकारले नरैनापुरमा डाक्टरको विशेष टोली नै खटाउनुपर्छ, यसको लागि नरैनापुरमा सरकारले छिटोभन्दा छिटो बिजुली बत्तिको पनि व्यवस्था गर्नुपर्छ,’ उनले भने, ‘बत्ति भइदियो भने धेरै समस्याको समाधान हुन्छ।’ बिजुली आएमा यहाँ कोरोना अस्पताल स्थापना गर्न सम्भव हुने उनको आशा छ।

बाँकेको नरैनापुर गाउँपालिकामा सोमबार बिहानसम्म कोरोना संक्रमितको संख्या १ सय १४ पुगिसकेको छ। जिल्लामा कूल १ सय ४६ जनामा कोरोना संक्रमण हुँदा नरैनापुरमामात्र १ सय १४ संक्रमित छन्। नरैनापुरमा एक सातामै संक्रमित ह्वात्तै बढेर यो बिन्दुमा पुगेको हो।

नरैनापुरमा किन एक्कासि बढ्यो त कोरोना संक्रमण?
नरैनापुर गाउँपालिकामा ४३ हजारको हाराहारीमा जनसंख्या छ। भारतबाट आउनेलाई राख्न १३ क्वारेन्टाइन बनाइएका छन्। अहिले ७ सय जनालाई क्वारेनटाइनमा रािखएको छ। यो नेपाल–भारत सीमा क्षेत्रसँगै जोडिएको गाउँपालिका हो।

नेपालगञ्जबाट करिब ३५ किलोमिटर पूर्वी-दक्षिणमा रहेको नरैनापुरमा मधेसी समुदायको बसोबास छ। कुनै समयमा नेपाली रुपैयाँ समेत नचल्ने यहाँका अधिकांश व्यक्ति कृषि पेसामा निर्भर छन्। शिक्षा र स्वास्थ्यमा धेरै पछाडि परेको नरैनापुरका प्रायः युवा वैदेशिक रोजगारीमा भारत जाने गर्छन्। रोजगारीबाट फर्केका व्यक्तिका कारण अहिले नरैनापुर कोरोनाको हटस्पट बनेको छ।

सीमापारी आएर रोकिएका ८ सय युवालाई गाउँपालिकाले वैशाख अन्तिम साता उद्धार गरेर ल्याएको थियो। गाउँपालिकाले निर्माण गरेको क्वारेन्टाइनमा उनीहरुलाई राखियो र परीक्षण सुरु गरियो। कोरोना भाइरस प्रभावित क्षेत्र भारतको मुम्बई लगायत स्थानबाट फर्केर आएका व्यक्तिको क्वारेन्टाइनमै स्वाब परीक्षण गर्दा जेठ २ गते पहिलो पटक नै ८ जनामा कोरोना संक्रमण पुष्टि भयो।

त्यसलगत्तै क्वारेन्टाइनमै बसेको अवस्थामा नरैनापुर गाउँपालिका वडा नम्बर ५ का २४ वर्षीय युवकको कोरोना संक्रमणबाट मृत्यु भयो। एम्बुलेन्सले बोक्न नमान्दा समयमा अस्पताल पुर्‍याउन नसकिएको र त्यही कारण उनको ज्यान गएको गाउँपालिका अध्यक्ष इस्तियाक अहमद शाह बताउँछन्।

नेपालमा दोस्रो कोरोना संक्रमितको मृत्यु थियो। उक्त घटनापछि नरैनापुरमा झन् डरलाग्दो अवस्था सिर्जना भयो। नरैनापुरमा पुष्टि भएका पहिलो संक्रमितको कन्ट्रयाक्ट ट्रेसिङका आधारमा थप व्यक्तिको स्वाब संकलन थालियो। यसरी संक्रमितको खोजी हुँदा संख्या झन्-झन् वृद्धि हुँदै गयो। नरैनापुरमा अहिलेसम्म पुष्टि भएकामध्ये ८ जनालाई दाङको बेलझुण्डीस्थित कोरोना विशेष अस्पतालमा राखिएको छ भने बाँकी संक्रमित नेपालगञ्ज, खजुरा र कोहलपुरका आइसोलेसनमा छन्।

समुदायमा गलत बुझाइले फैलायो कोरोना
कोरोना भाइरसबारे यहाँका समुदायमा अहिले पनि बुझाइ गलत भएका कारण पनि संक्रमण फैलिएको अध्यक्ष शाह बताउँछन्। कोरोना महामारीको मौका छोपेर कतिपय व्यक्तिले राजनीतिक लाभ लिन खोजिरहेका छन्। समुदायको गलत बुझाइ भएका कारण संक्रमित आइसोलेसनमा बस्नै चाहँदैनन्। केही दिनअघि संक्रमितलाई आइसोलेसनमा लैजान स्वास्थ्यकर्मी र सुरक्षाकर्मी नरैनापुर पुग्दा एक समूहले अवरोध गर्ने प्रयास गरेको थियो।

‘गाउँपालिकामा धेरै युवा भारतको मुम्बईबाट फर्केर आएका छन्, उनीहरु भारतबाटै संक्रमित भएर आएको आशंका छ,’ अध्यक्ष शाहले भने, ‘त्यस कारण धेरै जनामा एकै पटक कोरोना फैलिएको हुनसक्छ।’

कलेजले निकाल्छ भनेर भ्रम फैलाइयो
गाउँपालिका अध्यक्ष शाहले क्वारेन्टाइनमा रहेका युवामाथि राजनीति गरिएको आरोप लगाए। ‘केही बदमास व्यक्तिले गलत हल्ला फैलाए, जसका कारण यहाँबाट मानिस भागे र समुदायमा फैलाउने त्रास सिर्जना भयो,’ शाहले भने।

शिक्षामा पछाडि परेको नरैनापुरमा कोरोना भाइरस सम्बन्धी गलत बुझाइ भएका कारण समस्या बल्झिएको उनको भनाइ छ। ‘कोरोना भाइरसविरुद्ध एकजुट भएर लड्नुपर्ने बेलामा उल्टो केही व्यक्तिले कलेजबाट निकाल्छन् भनेर भ्रम फैलाए। त्यसैले मानिस क्वारेन्टाइनबाट भागे,’ अध्यक्ष शाहले भने।

बाँकेका प्रमुख जिल्ला अधिकारी कुमारबहादुर खड्काले नरैनापुरमा भारतबाट ठूलो संख्यामा मानिसहरु भित्रिएको र स्वाब परीक्षणको दायरा बढाएका कारण एकै पटक धेरैमा संक्रमण देखिएको बताए। ‘एक त भारतमा काम गर्ने मजदूरहरु नरैनापुरमा अधिकतम फर्के, अर्को, त्यहाँ परीक्षणको दायरा पनि ब्यापक गरियो, त्यही भएर संख्या बढेको हो,’ प्रजिअ खड्काले भने। भारतबाट आएका व्यक्ति नै कोरोना भाइरसबाट संक्रमित भएको प्रष्ट देखिएको उनले बताए।

भारतबाट आएका व्यक्ति संक्रमित हुने सम्भावना बढी भएको हुँदा अन्य ठाउँमा पनि नरैनापुरको जस्तै संख्या बढ्न सक्ने देखिन्छ। ‘कोरोना भाइरसविरुद्ध गाउँपालिकाले मात्र प्रयास गरेर अब सम्भव नहुने देखिएकाले यसका लागि संघ र प्रदेश सरकारले नै विशेष ध्यान दिनुपर्छ,’ अध्यक्ष शाहले भने।

कोरोना भाइरस संक्रमणको अवस्था भयावह बन्न थालेपछि बाँकेको नरैनापुरलाई निषेधित क्षेत्र घोषणा गरिएको थियो। जिल्ला प्रशासन कार्यालय बाँकेले आइतबार राति ८ बजेबाट लागु हुने गरी निषेधित क्षेत्र घोषणा गरेको थियो। त्यहाँ भैरवप्रसाद गणवाट सेना परिचालन गरियो।

नरैनापुर गाउँपालिका अध्यक्ष शाहले पहिलेको भन्दा अहिले सरकारको सक्रियता बढेको बताए। ‘हामीले धेरै अनुरोध गरेपछि सरकार सक्रिय भएको छ, नरैनापुरमा अब सेना परिचालन हुँदैछ, सेनाले बस्ने ठाउँ हेरिसकेको छ,’ उनले भने।

कोरोना भाइरसका कारण अवस्था भयावह बन्न थालेपछि गाउँपालिकाले प्रधानमन्त्री कार्यालय र प्रदेश सरकारसँग सहयोगका लागि पत्र लेखेर अपिल गरेको थियो।