काठमाडौं– रुपन्देहीको तिलोत्तमा नगरपालिका–१० कान्छीबजारका कृष्ण पुनमगरले पशु फार्म सञ्चालन गर्दै आएका थिए। करिब डेढ महिनाअघि कृष्णलाई फोन गर्दै उनको पशुफार्ममा काम गर्न तयार रहेको एक युवाले बताए।
उनले पनि ती युवाको प्रस्ताव स्वीकार्दै काम गर्न आउन भने। ती युवक कृष्णले सञ्चालन गरेको मैनहवास्थित गंगादेवी पशु फार्ममा काम गर्न थाले। यसरी डेढ महिना अघिदेखि गंगादेवी पशु फार्ममा काम गर्ने तिनै युवक हुन्, जसले ५ जनाको बिभत्स हत्या गरेका छन्। उनी हुन् सुर्खेतको लेकबेंसी नगरपालिका–५ घर भएका ३१ वर्षीय झसेन्द्र बहादुर सिंजाली। अहिले उनी जिल्ला प्रहरी कार्यालय रुपन्देहीको हिरासतमा छन्।
‘पहिला नचिनेको नम्बरबाट फोन गर्दै काम गर्ने बताएको थियो,’ प्रहरी समक्ष पशु फर्म सञ्चालक कृष्णले भनेका छन्, ‘पछि बुझ्दा मेरै साथीको फार्ममा काम गर्ने मान्छे रहेछ सिंजाली। 'राम्रै छ, काम गर्छ' भनेर साथीले भनेपछि काममा लगाएको हुँ।’
फार्म सञ्चालक कृष्णका अनुसार सिंजाली कम बोल्थे। प्रायजसो रक्सी पिइरहन्थे। पशु फर्म र कृष्णको घरको दूरी नजिकै छ। सधैंजस्तै घटना भएको दिन २६ गते रातको ९ बजेतिर उनी कृष्णको घरमा खाना खान गएका थिए। खाना खान गएको बेला भने सिंजालीले रक्सी नपिएको फार्म संचालक कृष्णको भनाइ छ। त्यसपछि फर्ममा फर्किएका उनी रक्सीको बोतल लिएर फर्किएको प्रहरी अनुसन्धाबाट खुलेको छ।
रूपन्देही मुगिया बालापुरका ४० वर्षीय माधव मुसहर र उनकी ३७ वर्षीया श्रीमती जानकी मुसहर, सिंजालीका सहकर्मी थिए। उनीहरुसँगै फार्ममा काम गर्थे। त्यहीं सुत्थे। अर्का मृतक १६ वर्षीय पोखराज मुसहर भने अनाथ रहेको र फार्म संचालक कृष्णले सानैदेखि अभिभावकत्व आएका थिए। घटना भएको दिन पोखराज पनि फर्ममै थिए। पोखराजसँगै एउटै स्कूलमा पढ्ने तिलोत्तमा–१० का १६ वर्षीय करण चौधरी, १५ वर्षीय आशिष थारु पनि त्यसदिन फर्ममै सुतेका थिए। ‘सँगै स्कुल पढ्ने भएपछि उनीहरुबीच आउजाउ भइरहने रहेछ। त्यही भएर त्यो दिन फर्ममा सुत्न उनका दुई साथी पनि पुगेका रहेछन्,’ प्रदेश ५ का डिआइजी रवीन्द्र धानुकले भने।
प्रहरीका अनुसार खाना खाएर फार्ममा फर्किएका सिंजालीले लगेको रक्सी फार्ममा रहेका अरुले पनि पिएका थिए। रक्सीले लठ्ठ भएर सुतेको अवस्थामा राती करिब ११ बजेतिरै घटना भएको पाइएको अनुसन्धान समितिका संयोजक राजकुमार वैदवार बताउँछन्।
घटनास्थलमा अनुसन्धान तथा प्रमाण संकलन गर्दै प्रहरी।
सिंजालीले सुरुमा लौराले हिर्काएका थिए। पछि कोदालो भेटेपछि कोदालाले हानेर हत्या गरेको स्वीकार गरेको एसएसपी वैदवारको भनाइ छ।
000
सधैंजसो बिहान साढे ५ बजेतिर फार्ममा जाने गरेका कृष्ण २७ गते पनि बिहानै फार्ममा पुगेका थिए। ‘म जाँदा कहिले गेट खुल्लै हुन्थ्यो त कहिले बोलाएर खोल्न लगाउँथे। तर त्यसदिन जति बोलाए पनि ढोका खुलेन,’ प्रहरीसमक्ष फार्म संचालक कृष्णले भनेका छन्, ‘त्यसपछि फर्म नजिकै बस्ने गरेकी जानकी मुसहरकी बहिनीलाई बोलाएँ।’ उनले गेट खोलिदिएपछि कृष्ण फार्मभित्र प्रवेश गरेर हेर्दा अनुहार र भुईंभरी रगत लत्पतिएको र तन्नाले शरीर ढाकेको अवस्थामा पाँच जना लडिरहेका थिए। त्यसपछि कृष्णले प्रहरीलाई खबर गरेपछि प्रहरी घटनास्थल पुगेको थियो।
हत्या अभियुक्त भनिएका सिंजालीलाई प्रहरीले फार्म नजिकैबाट बेहोस अवस्थामा फेला पारेको थियो। त्यसपछि तत्काल उपचारका लागि सिंजालीलाई क्रिमसन अस्पताल मणिग्राम पठाइएको थियो। त्यहाँबाट उनलाई थप उपचारकै लागि लुम्बिनी अस्पताल बुटवल पठाइएको थियो। अस्पतालबाट डिस्चार्ज भएपछि जिल्ला अदालत रुपन्देहीबाट एक साताको म्याद थप गरेर प्रहरीले अनुसन्धान सुरु गरेको छ।
प्रारम्भिक अनुसन्धानका क्रममा सिंजालीले अपराध स्वीकार गरेको एसएसपी वैदवारले बताए। सिंजालीले आफूलाई हेप्ने, चरित्र हत्या गर्ने, गाउँमा समेत नराम्रो हल्ला फैलाउने गरेकाले त्यसबाट विक्षिप्त भएर आवेगमा आएर हत्या गरेको प्रहरीलाई बयान दिएका छन्। सिंजालीले प्रहरीसमक्ष सिंजालीले भनेका छन्, ‘रिसले चुर भएको थिएँ। हान्दिएँ।’
सिंजालीलाई श्रीमतीले समेत केही महिना पहिला छाडेर गएकी थिइन्। श्रीमतीले छाडेको तनाव छँदै थियो। त्यहाँमाथि काममा समेत किचकिच हुने र हेप्ने गरेकाले मानसिक रूपमा चोट पुग्न गई घटना भएको देखिएको प्रहरीको अनुसन्धानले देखाएको छ। ‘माधव मसुहरका दम्पतीले दिएको पीडाले मानसिक रूपमा चोट पुगेको देखिएको र उचित मौका हेरी सबैलाई ठिक लगाउँछु भन्ने साचेर उक्त हत्याकाण्ड गराएको देखियो,’ प्रहरीले जारी गरेको प्रेस विज्ञप्तिमा उल्लेख छ। योबाहेक घटनामा अरुको संलग्नता छ कि छैन, घटनापछिका अन्य कारण के के हुन् भन्नेबारे थप अनुसन्धान भइरहेको रुपन्देही प्रहरीले जनाएको छ।
प्रहरीले घटनास्थलबाट हत्या गर्न प्रयोग गरिएको कोदालो, लौरो तन्ना, रक्सीका बोतलहरू प्रमाणका रूपमा संकलन गरेको छ। लुम्बिनी प्रादेशीक अस्पतालमा पोष्टमार्टमपछि मृतक पाँचै जनाको शव बुधबार नै आफन्तको जिम्मा लगाइएको छ। मृतकको भिसेरा परीक्षणको लागि प्रहरीको विधि विज्ञान प्रयोगशालामा नमुना पठाइएको रुपन्देही प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
