अटो

कर्णाली प्रदेशले पायो ३१ लाखमै बिएमडब्लू कार

शिव बोहरा बुधबार, जेठ २८, २०७७ १५:०९

काठमाडौं- दुई वर्षअघि काठमाडौंमा बेवारिसे रुपमा रहेको बिएमडब्लूको एसयुभी गाडी गएको भदौमा त्रिभुवन विमानस्थल भन्सार कार्यालयले जफत गरी माघमा कर्णाली प्रदेशलाई हस्तारन्तरण गरेको छ। अर्थ मन्त्रालयको सहमतिमा भन्सार कार्यालयले उक्त एसयुभी गाडीको मूल्य ३१ लाख रुपैयाँ कायम गरी कर्णाली प्रदेशका मुख्यमन्त्री तथा मन्त्रिपरिषद् कार्यालयलाई उपलब्ध गराउने निर्णय गरेको हो।

बिएमडब्लूको एसयुभी एक्सथ्री एम मोडलको यो कार २०१६ मोडलको हो। यो कारको इन्जिन नम्बर ७६०५८०९२ छ। यो कार त्रिभुवन विमानस्थल भन्सार कार्यालयबाट कर्णाली प्रदेशको मुख्यमन्त्री तथा मन्त्रिपरिषद् कार्यालयका अधिकृतले २०७६ माघ १ गते बुझिलिएका छन्।

कर्णाली प्रदेशले उक्त कारको नम्बर प्रदान गर्न बागमती प्रदेशलाई आग्रह गरेअनुरुप हेटौंडामा रहेको सवारी दर्ता कार्यालयमा दर्ता भएको हो। बिएमडब्लू एक्सथ्री एमको मूल्य भन्सार कार्यालयले ३१ लाख कायम गरेको भएपनि त्यस कारले इन्जिन क्षमताका आधारमा भन्सार, अन्तःशुल्क मूल्य अधिवृद्धि कर तथा सडक मर्मत तथा सम्भार दस्तुर नियमअनुसार तिर्नुपर्छ।

जफत भएर त्रिभुवन भन्सार कार्यालयले अर्थ मन्त्रालयको सहमतिमा एउटा मूल्य कायम गरेर हस्तान्तरण गरेकाले कर तिर्नेलगायत प्रक्रियाका लागि उक्त कार बागमती प्रदेशमा दर्ता गर्न कर्णालीले आग्रह गरेको कार्यालयका एक अधिकृतले जानकारी दिए। ‘जफत भएर अर्थको सहमतिमा भन्सार कार्यालयले कर्णालीलाई दिएको सो कार दर्ताका लागि प्रदेश ३ मा आएको हो,’ ती अधिकृतले भने, ‘कर तिर्नका लागि गाडीको नम्बर कायम हुनुपर्ने व्यवस्था छ। लकडाउन र प्रदेश सरकारले निर्णय गरेर काम गर्नुपर्ने भएकाले प्रक्रियाकै क्रममा छ।’

भारतीय नम्बर प्लेटको उक्त कार काठमाडौंको बानेश्वर क्षेत्रमा दुई वर्षसम्म त्यसै रहेको थियो। उक्त कार कसले लिएर आएको भन्ने हालसम्म खुल्न सकेको छैन। गत वर्षको भदौमा उक्त बेवारिसे कार त्रिभुवन विमानस्थल भन्सार कार्यालयले जफत गरेको थियो। जफत गरिएको सो कार लिलाम गर्ने वा सरकारले उपयोग गर्ने भन्ने विषयमा छलफल चलेपछि कर्णली प्रदेश सरकारलाई दिने निर्णण भएको हो। उक्त कार कर्णाली प्रदेशको मुख्यमन्त्री तथा मन्त्रिपरिषद्को कार्यालयले उपयोग गर्ने छ।

केही दिनअघि नेपाली बजारमा बिएमडब्लूको कार पुनः आधिकारिक बिक्रेता सहित भित्रिएको हो। बिएमडब्लूको एक्स सिरिजको एक्सथ्री एक्सड्राइभ कारसहित पाँच कार आएका थिए। १९ सय ९८ सिसी इन्जिन क्षमताको यो एसयुभीको बजार मूल्य २ करोड रुपैयाँभन्दा बढी पर्ने अनुमान गरिएको छ।
तर कर्णाली प्रदेशले पाएको उक्त कार दुई वर्षसम्म बेवारिसे अवस्थामा रहेकाले इन्जिनलगायत गाडीको अन्य पार्टमा समस्या देखिएको थियो। उक्त गाडी मर्मत गरेर दर्ता गरिएको हो। गाडीको मर्मत उपभोक्ता कर्णाली प्रदेश भएकाले यसैले गरेको कार्यालयको अनुमान छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।