सुर्खेत– नयाँ वर्ष २०७५ को पूर्वसन्ध्यामै कर्णालीमा विशेष चहल पहल थियो। प्रधानमन्त्री केपी शर्मा ओलीसहित मन्त्रीहरु र अन्य थुप्रै विशिष्ट व्यक्तिको जम्बो टोली मुगुको रारा पुगेको थियो। त्यसैले पनि मुलुकको ध्यान कर्णालीमा केन्द्रित हुन पुग्यो।
नयाँ वर्षको पहिलो दिन बिहानै प्रधानमन्त्री ओलीले राराबाटै देशवासीका नाममा सम्बोधन गरे। यसले कर्णालीको चर्चा र त्यसप्रतिको चासो सर्वत्र छाएको छ। जुन, सबैभन्दा कान्छो प्रदेश कर्णालीका लागि नयाँ वर्षको सुखद सुरुवात बन्न पुगेको छ।
प्रधानमन्त्रीको सम्बोधनले मात्र होइन आजै प्रधानमन्त्रीले कर्णाली–रारा पर्यटन वर्षको उद्घाटन पनि गरेका छन्। जसले कर्णालीका लागि नयाँ वर्ष सुखद् र थप विशेष बनाएको चर्चा नागरिकतहमा चलिरहेको छ। यहाँका आमनागरिकमा नयाँ वर्षले समृद्धिको आशा जगाएको छ।
पर्यटन वर्षले उत्साह
राराबाट देशवासीलाई सम्बोधनका क्रममा नयाँ वर्षको शुभकामना दिँदै प्रधानमन्त्री ओलीले भने, ‘नयाँ बर्षको पहिलो बिहानी प्रकृतिको यस अनुपम सिर्जना राराको आँगनमा उभिएर यहाँहरुलाई सम्बोधन गर्न पाउँदा निकै खुशी लागेको छ। रारा आफैंमा प्रतीक हो– हाम्रो प्राकृतिक सौन्दर्य र वैभवको, हाम्रो सम्भावना र भविष्यको।’
ओलीको सम्बोधन सुनेर ताली बजाइरहँदा कर्णालीबासीले कल्पना गरिरहेका छन्, प्रकृतिको त्यही अनुपम सिर्जना राराबाट नयाँ वर्षको पहिलो दिन सुभारम्भ भएको कर्णाली–रारा पर्यटन वर्ष २०७५ ले हाम्रो प्राकृतिक सौन्दर्य र वैभवको सदुपयोग गर्दै सम्भावनाले युक्त भविष्य सुन्दर बनेको।
आर्थिक रुपमा गरिब, मानव विकास सूचकांकमा कमजोर, पूर्वाधार विकासमा पछाडि र काठमाडौंको सिंहदरबारबाट उपेक्षित क्षेत्र हो, कर्णाली। यहाँका अनुपम प्राकृतिक स्रोत र सम्भावनाहरुको सधैं ‘भजन’ गाएर तर त्यसको सदुपयोग नगरेर ‘गरिब’ बनेको प्रदेश हो, कर्णाली। स्थानीय उत्पादनले आत्मनिर्भर क्षेत्रलाई आयातित वस्तु र उत्पादनले विस्थापित गरी परनिर्भर बनाइएको प्रदेश पनि हो, कर्णाली।
कर्णालीको विगतको यही विद्रुप विम्ब नयाँ वर्षले बदल्ने अपेक्षामा छन्, कर्णालीवासी। यहाँका नागरिकमा पर्यटन वर्षको घोषणाले उत्साह थपेको छ।
प्रदेश सरकारको तदारुकता
चुनावी वर्षको रुपमा बिदा भएको २०७४ ले तीन वटा चुनाव सम्पन्न गराउनुका साथै स्थानीय, प्रदेश र संघीय सरकार दिएर गएको छ। तीन वटै तहका सरकारले आफ्नो कार्यआरम्भ गरिसकेका छन्। मुलुकका सात वटा प्रदेश सरकारमध्ये कर्णाली एक मात्रै त्यस्तो प्रदेश हो, जसले प्रदेशको नाम र राजधानीको टुंगो लगाइसकेको छ। त्यो पनि निर्विवाद। प्रदेश सरकारले सुरुवातदेखि नै देखाएको तदारुकताले पनि यहाँका नागरिकमा आशाको सञ्चार गराएको छ।
नयाँ वर्षसँगै सुरु भएको पर्यटन वर्ष कर्णालीको समृद्धिसँग जोडिएको विषय हो। प्रदेश सरकारले यसलाई पर्वकै रुपमा मनाउने तयारी गरेको छ। पर्यटन यहाँको अर्थतन्त्र बलियो बनाउने आम्दानीको प्रमुख स्रोतमध्येको एक हो। यो प्रदेशमा रारासहित शे–फोक्सुण्डो ताल, काँक्रेबिहार, बुलबुले ताल, पचाल झरना, त्रिपुरासुन्दरी मन्दिर, देउतीबज्यै मन्दिर लगायत दर्जर्नौ पर्यटकीय स्थल छन्। जसको संरक्षण, सम्वद्र्धन र प्रचार–प्रसार गरी आन्तरिक तथा वाह्य पर्यटकलाई आकर्षित गर्न सकेको खण्डमा प्रदेशले ठूलो धनराशि आर्जन गर्न सक्नेछ।
पर्यटकको आगमनसँगै यहाँको स्थानीय उत्पादनले समेत बजार पाउनेछन्। र यसबाट नागरिकको आयआर्जनमा वृद्धि भई जीवनस्तरमा समेत सुधार आउनेछ। त्यसकारण पनि कर्णाली–रारा पर्यटन वर्ष सरकारको एउटा महत्वाकांक्षी योजना मात्र नभएर आम नागरिकको जनजीविकासँग प्रत्यक्ष प्रभाव राख्ने कार्यक्रम पनि हो।
पूर्वाधार विकास हुँदै
विकट भौगोलिक अवस्थाबाट गुज्रिरहेको कर्णाली प्रदेशमा पूर्वाधार विकासको काम पनि धमाधम अघि बढ्दैछन्। २०७५ मा दीर्घकालीन महत्वका ठूला योजना सञ्चालनमा आउँदैछन्।
नयाँ वर्षको पूर्वसन्ध्यामा शुक्रबार रारा किनारमा बसेको कर्णाली प्रदेश सरकारको मन्त्रिपरिषद बैठकले प्रदेशको समृद्धिसँग जोडिएका महत्वपूर्ण योजना सञ्चालन गर्ने निर्णय गरेको छ। बैठकले कर्णालीको समृद्धिसँग जोडिएका दीर्घकालीन योजनाहरु निर्माणका लागि केन्द्र सरकारलाई ध्यानाकर्षण समेत गराएको छ। केन्द्र सरकारसँगको पहलमा कर्णाली पर्यटन प्राधिकरण गठन गर्ने निर्णय बैठकले गरेको छ। एकीकृत रुपमा पर्यटन विकासका लागि कर्णाली पर्यटन प्राधिकरण गठन गर्ने निर्णय गरिएको हो।
त्यसैगरी, सुर्खेतदेखि हुम्लाको हिल्सासम्म जोड्ने द्रूत मार्ग निर्माण गर्ने र त्यसलाई प्रधानमन्त्री द्रूर्तमार्ग नामाकरण गर्ने निर्णय पनि गरिएको छ। भेरी–कर्णाली करिडोर निर्माणका लागि केन्द्र सरकारसँग प्रदेश सरकारले पहल गरिसकेको छ।
यस्तै, छिमेकी मुलुक चीनसँगको उत्तरी नाका खुलाउनका लागि पनि सरकारले पहल थासिकेको छ। मुख्यमन्त्री महेन्द्रबहादुर शाहीले यसै वर्षभित्र हुम्लाको हिल्सा नाका सञ्चालनमा आउने बताइसकेका छन् भने अन्य दुई नाका पनि सञ्चालनका लागि पहल भइरहेको छ। यी नाका कर्णालीको विकास र समृद्धिका लागि अर्को महत्वपूर्ण आधार हुन्।
नागरिक अपेक्षा
प्रधानमन्त्री ओलीले आफ्नो सम्बोधनको अन्तिममा पुनः शुभाकामना दोहोर्याउँदै भनेका छन्, ‘हामी सबै एकताबद्ध भई नेपाललाई विकासको मार्गमा द्रूत गतिले अगाडि बढाउन सकौं...।’
नयाँ वर्षको सुखद् सुरुवातले प्रधानमन्त्री ओलीले भनेजस्तै कर्णाली विकासको मार्गमा द्रूत गतिले अगाडि बढ्ने अपेक्षामा छन् यहाँका नागरिक।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
