सुर्खेत- कर्णाली राजमार्ग अन्तर्गत दैलेखदेखि जुम्लासम्मको खण्डमा पर्ने टाकुल्ला खोलामा पुल निर्माण सुरु भएको ६ वर्ष पूरा भइसक्यो। आर्थिक वर्ष २०६८/०६९ मा जागृति–तुल्छी दुर्गा जेभीले पुल निर्माणको जिम्मा लिए पनि समयमै पूरा नगर्दा पुलको दुई वटा पिल्लरमुनि खोलाबाटै सवारी गुड्दै आएका छन्।
सोही सडक खण्ड अन्तर्गतको घट्टेखोला पुलको निर्माण कार्य पनि सात वर्षदेखि अलपत्र छ। चार करोड ५१ लाख लागतको घट्टेखोला पुल निर्माणका सम्झौता भए पनि अझै निर्माण सम्पन्न हुन सकेको छैन। १५ महिनामा काम सक्ने गरी जिम्मेवारी लिएको कम्पनीले सात वर्षसम्म पुल निर्माण नगरेको हो।
याक्थुम्हाङ गोल्डेनगुड जेभीले सात वर्षअघि जग खनेर अलपत्र पारेको पुल पुनः आफैले निर्माण गर्न सुरु गरेको छ। समयमै निर्माण नगरेको भन्दै सडक विभागले कालो सूचीका लागि तयारी थालेपछि अहिले निर्माणको काम सुरु गरेको हो।
ठेकेदार कम्पनीहरुको चरम लापरबाहीका कारण टाकुल्ला र घट्टेखोलामा जस्तै कर्णाली राजमार्गका एक दर्जनभन्दा बढी पुल लामो समयदेखि अलपत्र परेका छन्। खोलामा पुल निर्माण नहुँदा कर्णाली राजमार्गको यात्रा थप जोखिमपूर्ण बनेको यात्रुहरु बताउँछन्। बर्सातमा ठूलो पहिरोका कारण हप्तौंसम्म यही खोलामा सवारी रोकिने गरेका छन्। राजमार्गका पुलहरू बन्न नसक्दा ढुक्कसँग सवारी चलाउन सकिने अवस्था नभएको सवारी चालकहरूको गुनासो छ।
सात वर्षअघिबाट सुरु गरिएको पुल हालसम्म निर्माण नसक्ने कम्पनीलाई सरकारले भने कारबाही गर्न नसकेको नागरिक समाज जुम्लाका अध्यक्ष राजबहादुर महतले बताए। उनले खोलाहरुमा पुल नबन्दा यात्रुहरुले हरेक पटकको यात्रामा सास्ती भोग्नुपरेको गुनासो गरे। ‘साँघुरो बाटोले हैरानी भएको राजमार्गमा पुल नबन्दा झन् पीडा भएको छ,’ उनले भने। उनले जिम्मा लिएर काम नगर्ने ठेकेदारलाई राजनीतिक दलको आडमा संरक्षण गरेकै कारण काम हुन नसकेको आरोप लगाए। उनले कर्णाली राजमार्गको तत्काल स्तरोन्नति गर्नुपर्ने माग राखे।
कर्णाली राजमार्गमा निर्माणधिन अवस्थामा रहेका पाँच वटा पुल नेपाल सरकारको १५ करोड लागतमा बन्दै छन्। यस्तै १८ वटा पुल बिश्व बैंकको सहयोगमा ६० करोड लागतमा बन्दै गरेको सडक डिभिजन कार्यालय जुम्लाले जनाएको छ। सडक डिभिजनको निरन्तर प्रयासका कारण राजमार्गमा रहेका ठूला खोलामाथिका तीन वटा पुलको काम भने अन्तिम चरणमा पुगेको छ।
आफ्नो जिम्मेवारीमा आएको एक वर्षमा नै सडकले पुल निर्माण सम्पन्न गराउने कार्यलाई प्राथामिकता दिएको थियो। गत माघमा नेपाली सेनाको नेतृत्वबाट आफ्नो जिम्मेवारीमा लिएको सडक डिजिजनले अधुरा पुल निर्माण कार्य र सडक चौडाइ गर्ने कार्यलाई तीव्रता दिएको हो। जस अनुसार यसै आर्थिक वर्षमा तीन वटा पुल सञ्चालनमा आउने भएका छन्।
बाँकी रहेका ६ वटा पुलमध्ये यसै आर्थिक वर्ष भित्रमा तीन वटा पुल सञ्चालनमा आउने तयारी भइरहेको कार्यालयले जनाएको छ। सडक डिभिजन प्रमुख माधवप्रसाद अधिकारीले लामो समयसम्म अल्झाएका कारण निर्माण कम्पनीले नै अब सम्पूर्ण खर्च बेहोर्ने र काम सम्पन्न भएपछि मात्रै भुक्तानी पाउने बताए।
उनले सडक स्तरोन्नतिका लागि आवश्यक बजेट नहुँदा समस्या परेको जनाए। थोरै रकम कर्मचारी खटनपटनदेखि निर्माण कार्यमा खर्च गर्नुपर्ने भएकाले सोचे अनुसारको स्तरोन्नति हुन नसकेको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
