काठमाडौं– ‘बिचौलियाहरुले प्रहरी हेडक्वार्टर कब्जा गरे ।’ बुधबार सार्वजनिक लेखा समितिमा बोल्दै रास्वपा सांसद खगेन्द्र सुनार आईजीपी दानबहादुर कार्कीमाथि खनिए । म्यादी प्रहरीको पोशाक खरिदमा भएको भ्रष्टाचारका बारेमा आफूले राखेको बोलीमा पुन: अडान राख्दै सांसद सुनार मंगलबार आईजीपी कार्कींमाथि खनिएका हुन् ।
१५ दिनपछि खरिदका कागजात पठाउन भनिएकोमा ‘आयो/आएन’ भनेर प्रश्न गरेका थिए । यसअघि सांसद सुनारले तथ्यहीन आरोप लगाएको र न्यायाधीश बनेर फैसला गर्न खोजेको आशयसहित आइईजीपी कार्कीले ‘जे मन लाग्यो त्यही बोल्या छ’ भनेका थिए ।
जवाफमा बधुबार सांसद सुनारले भने, ‘कसैलाई मान मर्दन भएको लागे उत्तापटी अदालत छ! गएर मुद्दा हाल्नु, जवाफ दिन कठघरामा उभिउँला ।’ सांसद सुनार अझ थपेका थिए, ‘१५ दिनभित्र खरिदका विषय पेश गर्न भनिएकोमा यही बीचमा फेरि करोडौंको टेन्डर आह्वान गरिएको र बिचौलियाहरुले प्रहरी हेक्वार्टर कब्जा गरेको’ आरोप लगाएका थिए । अहिले वास्तवममा भन्ने हो भने आईजीपी कार्की र सांसद सुनारबीच जुहारी जस्तै चलेको छ । यी दुवैको बोली मर्यादाभित्रको देखिँदैन ।
‘जनप्रतिनिधिलाई वरपरी राखेर धम्की दिन मिल्छ ?’ सुनारले आरोप लगाउँदै अहिले नै बर्दी खोल्न लगाएर छानबिन गर्नुपर्ने माग राखेका थिए । अहिल्यै निलम्बन गरेर छानबिन गर्नुपर्ने सुनारको भनाइ थियो ।
त्यसपछि आक्रोशित बनेका आईजीपीले धम्कीको भाषामा सार्वभौम जनप्रतिनिधिलाई खुल्ला रुपमा धम्की दिएको भन्दै एकथरीले आईजीपीको बोलीको पनि आलोचना गरेका छन् ।
आईजीपी कार्कीले नेमिङ, फेमिङ, ब्लेमिङ गर्न हामीलाई पनि आउँछ । क–कसका उजुरी कहाँ छन् ? खोल्नु पर्ने हो ? भन्दै बर्दीको आडमा धम्की दिएको एकथरीको बुझाई छ । अझ आईजीपी कार्कीले कस्ता मान्छेबाट हामी शाषित हुँदैछौं भन्ने किसिमको अभिव्यक्ति दिएका थिए । अझ यो अभिव्यक्तिले त झनै आफ्ना प्रतिनिधि चुन्ने मतदाताको भावनाको समेत कदर गर्न नसकेको बुझाई छ ।
सुनारको आरोपबारे प्रतिरक्षा गर्ने क्रममा आईजीपीले दिएका यी अभिव्यक्तिसमेत मर्यादित थिएनन् । सांसद सुनार र आईजीपी दुबैको प्रस्तुती मर्यादा भन्दा बाहिर गएपछि नेकपाका सांसद वर्षमान पुन सम्झाएका थिए ।
जे मन लाग्यो त्यही बोल्या छ भन्दै सांसद सुनारमाथि आक्रोशित बनेका कार्कीले पनि आफ्नो मर्यादा बिर्सिएर प्रहरीले चाह्यो भने अनेक दुख दिनसक्छ भन्नेतर्फ गम्भीर संकेत पनि गरेका थिए । त्यसो त आईजीपी कार्कीले सांसद सुनारको बोलीमा आपत्ती जनाएजस्तै आईजीपी कार्कीको बोलीमा पनि सांसद सुनारले आज आपत्ति जनाए ।
‘सार्वभौम समितिमा आएर टोपी भुइँमा राखेर जुहारी खेल्न पाइँदैन । सरकारको मानमर्दन गर्न पाइँदैन’ आईजीपीलाई सांसद सुनारले जवाफ दिएका थिए । यसअघिको समितिको बैठकमा सांसद सुनारको अभिव्यक्ति र शैलीप्रति आलोना मात्रै भएर सभामुखले समेत चासो राख्दै आईजीपी, एआईजीसँग भेट गरेका थिए । गृहमन्त्री सुधन गुरुङले त मेरो गैर उपस्थितिमा आईजीपीमाथि भएको व्वहारले आफू खुसी नभएको बताएका थिए ।
पोशाक विवाद के हो ?
गत २१ फागुनमा भर्ना गरिएका म्यादी प्रहरी (निर्वाचन प्रहरी)को पोशाक खरिदमा व्यापक भ्रष्टाचार भएको बताइन्छ । यो विषय अख्तियार दुरुपयोग अनुसन्धान आयोगदेखि अहिले सार्वजनिक लेखा समितिसम्म पुगेको छ ।
विगत लामो समयदेखि अख्तियारले पोशाक खरिदमा भएको भ्रष्टाचारबारे अनुसन्धान गरिरहेको छ । यो प्रकरणमा सोझै भ्रष्टाचार भएको भन्दा पनि घुमाउरो तरिकाले अनियमितता भएको र त्यसको प्रमाण जुटाउन गाह्रो हुने अख्तियारका अधिकारीहरु बताउँछन् ।
वास्तवमा तलबभत्ता, राशन तथा पोशाक वापतको रकम म्यादी प्रहरीको व्यक्तिगत खातामा हालिएको हुन्छ । जसमा पोशाक वापत हिमालमा ११ हजार ५ सय, पहाडमा ७ हजार ९४५ र तराईमा ६ हजार १७० रुपैयाँ दिइन्छ ।
तर ११ हजार दरका पोशाक खरिद नगरी सेटिङमा प्रहरीले नै ठेकदारसँग ३५ सयदेखि ४ हजार दरका पोशाक खरिद गरेर म्याद प्रहरीलाई उपलब्ध गराएको र म्यादी प्रहरीको खातामा हालिएको पोशाक वापतको ११ हजार ५ सय रुपैयाँ नै लिएर घोटाला गरिएको आरोप छ ।
तर यसको प्रमाण भने भेट्न गाह्रो हुने हुँदा मुद्दा जाने सम्भावना नै कम हुने, मुद्दा नै दर्ता भए पनि ठहर हुने सम्भावना झिनो रहेको जानकारहरु बताउँछन् । ‘म्यादीकै खातामा रकम जान्छ । अनि पोशाकको वापतको रकम आफैंले निकालेर नगदै बुझाएको हुँदा प्रमाण भेट्न मुस्किल छ,’ एक अधिकारी भन्छन् ।
सार्वजनिक लेखा समितिमा परेको उजुरी हर्ने हो भने त अझ २ जोरी पोशाक दिनुपर्नेमा एक जोर मात्रै दिएर २० करोड घोटाला गरिएको दाबी छ । अनि जुत्ता, मोजा, टोपीलगायतमा ४० करोड गरी कूल ६० करोड घोटाला भएको दाबी गरिएको छ । सुनारले उक्त उजुरीको पत्रसमेत केही दिनअघि सामाजिक सञ्जालमा सार्वजनिक गरेका थिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
