काठमाडौं- नेपाल वायुसेवा निगमले खरिद गर्न लागेको वाइड बडी ए ३३०–२०० विमान खरिदका विषयमा महालेखा परीक्षकको कार्यालयले प्रश्न उठाएको छ।
विमान खरिदका लागि विमान निर्माता कम्पनीसँग नभई विमानका पाटपुर्जा बिक्री गर्ने कम्पनीसँग सम्झौता गरेकाले प्रश्न उठाइएको महालेखा परीक्षक टंकमणि शर्माले बताए।
विमान खरिदका लागि निगमले प्रतिविमान अमेरिकी डलर ११ करोड ८१ लाख ६३ हजार लागत अनुमान गरी प्रतिविमान अमेरिकी डलर १० करोड ४८ लाखका दरले २ वटा विमान खरिद गर्न २० करोड ९६ लाख अमेरिकी डलरमा सम्झौता गरेको छ।
विमान खरिदका लागि १ मार्च २०१७ मा अमेरिकी डलर १० लाख र १९ जुन २०१७ मा अमेरिकी डलर ७ करोड ९० लाख गरी अमेरिकी डलर १८ करोड पेस्की रकम दिएको छ। नेपाल वायुसेवा निगमको आर्थिक विनियमावली, २०६५ को विनियम २३६ (१) अनुसार निर्माता कम्पनीसँग मात्र नयाँ विमान खरिद गर्न सकिनेमा विमान निर्माता कम्पनीसँग खरिद नगरी १ हजार घन्टा उडेको भनी पुरानो विमान खरिद गर्ने प्रक्रिया अपनाई सम्झौता गरेको भनी महालेखको प्रतिवेदनमा भनिएको छ।
बिक्रीपछिको मर्मत सेवा तथा पार्टपुर्जा आपूर्तिमा हुनसक्ने उपलब्धि, तालिम, प्राविधिक सहयोग र वारेन्टी जस्ता पक्षलाई महत्व नदिई बिचौलियाका रुपमा रहेका आपूर्तिकर्ता मार्फत एयरबस कम्पनीको विमान खरिद गर्ने सम्झौता कानुन सम्मत नभएको महालेखाको प्रतिवेदनमा उल्लेख छ।
एयरबसको वेबसाइटमा उल्लिखित सूचीकृत मूल्यमा एयरबस कम्पनीले बिक्रीमा ठूलो छुट दिने गरेको समेत प्रतिवेदनमा उल्लेख छ। विगतमा एयरबसको न्यारोबडी विमान खरिद गरेको र हाल एयरबससँग निगमको प्रत्यक्ष सञ्चार सम्पर्क रहेको अवस्थामा एयरबससँग सोझै खरिद गर्दा तिर्नुपर्ने मूल्य कम हुने प्रतिवेदनमा उल्लेख गरिएको छ।
निगमको विनियमावलीमा नयाँ विमान खरिद गर्न विमान कम्पनीहरुसँग मात्र प्रतिस्पर्धा गर्नुपर्ने प्रावधान रहेकोमा सो प्रक्रिया नअपनाई पुरानो वा नयाँ स्पष्ट उल्लेख नै नगरी १ हजार उडान घन्टा ननाघेको भनी पुरानो विमान खरिद गर्ने प्रक्रियाद्वारा बोलपत्र आह्वान गरी नयाँ विमान खरिद गर्न गरिएको सम्झौता कानुनसम्मत नभएको महालेखाले जनाएको छ।
आपूर्तिकर्ताले निश्चित रकम नाफा नलिई विमान आपूर्ति गर्ने सम्भावना नरहने हुँदा निगमले गरेको सम्झौता मूल्य मितव्ययी भएको यकिन गर्न सकिने अवस्था नदेखिएको महालेखाले प्रतिवेदनमा उल्लेख गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
