सुर्खेत- फराकिलो ताल, नजिकै स्वीमिङ पुल। नुहाउनका लागि छुट्टै धारा, पिकनिक पार्कसहित मनोरम उद्यान। तालमा नियमित डुंगा सञ्चालन हुनेछन्। हेर्नका लागि आन्तरिक तथा बाह्य पर्यटकहरु ओइरिनेछन्।
सुर्खेत उपत्यका नगर विकास समितिले बनाएको गुरुयोजनाको परिकल्पना हो, यो।
‘हेर्न लायक बुलबुले’ बनाउने लक्ष्यसहित नगर विकास समितिले बुलबुले विकास गुरुयोजना सार्वजनिक गरेको छ। गुरुयोजनामा बुलबुलेको स्तरोन्नति गरी आकर्षक पर्यटकीय गन्तव्य बनाउने परिकल्पना गरिएको छ।
पछिल्लो समय बुलबुले उद्यान व्यवस्थापनलाई तीव्र पारेको सुर्खेत उपत्यका नगर विकास समितिले गुरुयोजना बनाएर काम अघि बढाएको हो। ३१ बिघा १४ कट्ठा क्षेत्रफलमा फैलिएको बुलबुले उद्यानलाई व्यवस्थित गर्न गुरुयोजना निर्माण गरिएको नगर विकास समितिले जानकारी दिएको छ।
दोब्बर ठूलो ताल
गुरुयोजनाको परिकल्पना अनुसार बुलबुले ताल अहिलेको भन्दा दोब्बरले ठूलो हुनेछ। जिल्लाको सबैभन्दा महत्वपूर्ण पर्यटकीय स्थलका रुपमा रहेको बुलबुले ताललाई फराकिलो बनाउने योजना समितिले बनाएको हो।
डुंगा सञ्चालनमा ल्याउने गरी ताललाई फराकिलो बनाइने भएको हो। ताललाई ३ दशमलव ५ बिघा क्षेत्रफलमा विस्तार गर्न लागिएको हो। तालको पूर्वतर्फ खाली रहेको भूभागलाई कटान गरिने भएको छ। पश्चितर्फ ताल फराकिलो बनाउँदा रुख र प्राकृतिक सम्पदाहरु मासिने भन्दै पूर्वतर्फ विस्तार गरिने भएको हो। हाल तालको क्षेत्रफल १ दशमलव ७५ बिघा मात्रै छ।
नियमित डुंगा सञ्चालन
पर्यटकहरुलाई आकर्षित गर्न तालमा नियमित डुंगा सञ्चालन गर्ने योजना पनि समितिले बनाएको छ। ताल अवलोकनका लागि आउने आन्तरिक तथा बाह्य पर्यटकहरुलाई डुंगामार्फत मनोरञ्जन प्रदान गर्ने उद्देश्यले तालमा नियमित डुंगा सञ्चालन गरिने भएको हो।
विगतमा पनि पटकपटक डुंगा सञ्चालन गरिए पनि नियमित हुन सकेको छैन। तर अब भने तालको क्षेत्रफल विस्तार गरी नियमित रुपमा डुंगा सञ्चान गरिने जनाइएको छ।
१० वटा ‘पिकनिक स्पट’
सार्वजनिक गुरुयोजना अनुसार बुलबुले उद्यानभित्र १० ‘पिकनिक स्पट’ बनाइने भएको छ। जिल्लाभित्रका साथै बाह्य जिल्लाहरुबाट समेत हरेक वर्ष बुलबुलेमा पिकनिक खानका लागि आउनेहरुको भिड लाग्ने गर्दछ। अव्यवस्थित रुपमा हुने पिकनिकलाई व्यवस्थित गर्न बेग्लाबेग्लै १० वटा पिकनिक पार्क बनाउने योजना समितिले अघि सारेको हो।
उद्यानभित्र पिकनिक पार्क, मन्दिर क्षेत्र र प्रवेश क्षेत्र गरी तीन क्षेत्रमा विभाजन गरिएको छ। जसअनुसार पार्कभित्रै पिकनिक पार्क स्थापना गर्न लागिएको हो। यसले अव्यवस्थित रुपमा आयोजना हुने पिकनिकलाई व्यवस्थित गर्न सहयोग पुग्ने अपेक्षा समितिले गरेको छ।
स्वीमिङ पुल निर्माण
गुरुयोजनामा स्वीमिङ पुलको समेत अवधारणा अगाडि सारिएको छ। खुल्ला रुपमा नुहाउँदा बुलबुले तालको शोभामा असर परेको भन्दै उद्यान क्षेत्रभित्रै स्वीमिङ पुल निर्माण गरिने समितिले जनाएको छ।
यस्तै, उद्यान भित्र प्रवेशसँगै ठाउँठाउँमा भेला भएर बस्न मिल्ने पार्क, दोस्रो गेटबाहिर पार्किङ स्थल, विभिन्न स्थालमा वृक्षारोपण गरी हरियाली बनाइने भएको छ। बुलबुले तालभित्र रहेका १० वटा धारालाई समेत व्यवस्थित गरिने भएको छ। सबै धार्मिक क्रियाकलापहरुलाई व्यवस्थित गर्न धार्मिक क्षेत्र नै तोकिने समितिले जनाएको छ। बालबालिकाका लागि बालपार्क, हेर्न लायक बुलबुले बनाउन समितिले गुरुयोजना सार्वजनिक गरेको हो। विगतमा संरक्षण अभावले अस्तव्यस्त बनेको बुलबुले उद्यान क्षेत्र व्यवस्थित बनाउन थालिएको छ।
साढे ३१ करोड लाग्ने
आर्किटेक्ट डिजाइन सेन्टरले तयार पारेको गुरुयोजना अनुसार बुलबुलेलाई आकर्षक बनाउन करिब ३१ करोड ७३ लाख ३२ हजार रुपैयाँ लागत लाग्ने बताइएको छ। बुलबुलेको प्राकृतिक स्वरुपमा असर नपर्ने गरी उद्यानलाई व्यवस्थित बनाइने डिजाइन सेन्टरका सुमन महर्जनले बताए।
हाल बुलबुलेको स्वरुप कल्पना गरे जस्तो नभएको भन्दै उनले व्यवस्थापनका लागि स्थानीय, प्रदेश र संघ सरकारले प्राथमिकता दिनुपर्नेमा जोड दिइरहेका छन्। आर्थिक अभावका बीच सार्वजनिक गरिएको गुरुयोजना कार्यान्वयनका लागि चुनौतीपूर्ण बनेको उनले बताए।
कर्णाली प्रदेशका पर्यटकीय सम्पदाहरुको फोटोहरुसमेत पार्क भित्र अवलोकनको व्यवस्था मिलाइने भएको छ। हाल उद्यान व्यवस्थापनका लागि बजेट अभाव रहेको सुर्खेत उपत्यका नगर विकास समितिका सभापति नारायण कोइराला बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
